ރިޔާސީ އިންތިޚާބު: ރީ-ރަޖިސްޓްރީވުމަށް މިހާތަނަށް 11900 އަށްވުރެ ގިނަ ފޯމު

ރިޔާސީ އިންތިޚާބުގައި އެ މީހެއްގެ އަމިއްލަ ރަށް ނޫން އެހެން ރަށަކުން ވޯޓުލާނަމަ، އެ ރަށަކަށް ރީ-ރަޖިސްޓްރީ ކުރުމަށް ހުޅުވާލި މުއްދަތުގެ ތެރޭގައި މިހާތަނަށް 11900 އަށްވުރެ ގިނަ ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ. ރިޔާސީ އިންތިޚާބަށް ބާކީ 40 ދުވަސް އޮތްއިރު، އޮންލައިންކޮށް ރީ-ރަޖިސްޓްރީވުމަށް ހުޅުވާލި މުއްދަތު މާދަމާގެ ނިޔަލަށް ހަމަވާނެއެވެ.

ރިޔާސީ އިންތިޚާބަށް ރީ-ރަޖިސްޓްރީވުމަށް އިލެކްޝަންސް ކޮމިޝަނުން ފުރުޞަތު ހުޅުވާލީ މިމަހުގެ 16 ވަނަ ދުވަހުން ފެށިގެންނެވެ. ރީ-ރަޖިސްޓްރީ ކުރާ ފަރާތްތަކުން 16 ޖުލައިން ފެށިގެން ޖުލައި މަހުގެ 31 ވަނަ ދުވަހުގެ ނިޔަލަށް އޮންލައިންކޮށް ހުށަހެޅޭނެއެވެ. އަދި 5 އޮގަސްޓާއި ހަމައަށް ކަރުދާސް ފޯމުތައް މެދުވެރިކޮށް ރީ ރަޖިސްޓްރީ ވުމަށް ހުށަހެޅޭނެއެވެ.

އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބް ވިދާޅުވީ، ރީ-ރަޖިސްޓްރީވުމަށް އެދި މިމަހުގެ 29 ގެ ނިޔަލަށް ޖުމްލަ 11933 ފޯމު ކޮމިޝަނަށް ލިބިފައިވާކަމަށެވެ. އޭގެ ތެރޭގައި ހިމެނެނީ އޮންލައިންކޮށް ރީ-ރަޖިސްޓްރީވުމަށް ހުށަހެޅި 8624 ފޯމަކާއި، ކަރުދާސް ފޯމުގެ ގޮތުގައި ހުށަހެޅުނު 3309 ފޯމެކެވެ.

ޙަބީބް ވިދާޅުވީ، ރާއްޖޭން ބޭރުގައި ވޯޓުފޮށި ބެހެއްޓޭކަން މިހާތަނަށް ކަށަވަރުވެފައިވަނީ، މެލޭޝިޔާ އާއި އިނގިރޭސި ވިލާތުގައި އެކަނިކަމަށެވެ. އަދި އެހެން ޤައުމުތަކުގައި ވޯޓުފޮށި ބެހެއްޓޭ ވަރަށް އަދި ވޯޓުލާ މީހުން ރަޖިސްޓަރީ ވެފައިނުވާކަމަށް ޙަބީބް ވިދާޅުވިއެވެ.

މިހާރު ރީ-ރަޖިސްޓްރީވެފައިވާ ފަރާތްތަކުގެ މަޢުލޫމާތު އިލެކްޝަންސް ކޮމިޝަންގެ ވެބްސައިޓުގައި ހާމަކުރުމުގެ އިތުރުން ސިޔާސީ ޕާޓީތަކާވެސް ޙިއްސާކުރަމުންދާކަމަށް އެކޮމިޝަނުން ވިދާޅުވެއެވެ. ރީ-ރަޖިސްޓްރޭޝަން މަރުޙަލާގެ ކަންކަން ވީހާވެސް އަވަހަށް ފުރިހަމަކުރުމަށްޓަކާ، އެންމެ ފަހު ވަގުތަށް ނުތިއްބަވާ، އެކަންކަން ފުރިހަމަކުރެއްވުމަށް އިލެކްޝަންސް ކޮމިޝަނުން ވަނީ އިލްތިމާސްކުރައްވާފައެވެ.

އިލެކްޝަންސް ކޮމިޝަނުން މަޢުލޫމާތު ދިން ގޮތުގައި، އޮންލައިންކޮށް ރީ-ރަޖިސްޓްރީވުމަށް، މީހަކަށް ފަހަރަކު ހުށަހެޅޭނީ 10 ފޯމެވެ. އަދި ސިޔާސީ ޕާޓީއަކުން ނުވަތަ ރަސްމީ މުއައްސަސާއެއް ހިއްސާވާގޮތަށް، ފޯމު ހުށަހަޅާނަމަ، އެ ތަނެއްގެ ތައްގަނޑާއި، ރަސްމީ ސިޓީ އަކާއެކު، ފަހަރަކު 100 ފޯމު ހުށަހެޅޭނެކަމަށްވެސް، އިލެކްޝަންސް ކޮމިޝަނުން މަޢުލޫމާތު ދެއެވެ.

ރާއްޖެއިން ބޭރުގައި އުޅޭ ފަރާތްތަކަށްވެސް، ރީ-ރަޖިސްޓްރީވުމަށް ވަނީ ހުޅުވާލާފައެވެ. އެގޮތުން 8 ޤައުމެއްގެ 9 ސިޓީއެއްގައި ވޯޓުލެވޭ ގޮތަށް އިލެކްޝަންސް ކޮމިޝަނުން ވަނީ ނިންމާފައެވެ.

ރިޔާސީ އިންތިޚާބުގެ ފުރަތަމަ ބުރުގެ ވޯޓުލުން، މިއަންނަ ސެޕްޓެންބަރުމަހުގެ 9 ވަނަ ދުވަހު އޮންނާނެއެވެ. މިފަހަރު ޖުމްލަ 604 ވޯޓު ފޮއްޓެއް، ރާއްޖެއާއި ރާއްޖޭން ބޭރުގައި ބެހެއްޓުމަށް، އިލެކްޝަންސް ކޮމިޝަނުން ވަނީ ނިންމާފައެވެ.