ޔާމީންގެ ކެނޑިޑަސީ މައްސަލައިގެ ތެރެއަށް ބަންޑާރަ ނައިބާއި ޕީޕީއެމް

ޕީޕީއެމްގެ ރިޔާސީ ކެނޑިޑޭޓް ރައީސް އަބްދުﷲ ޔާމީންގެ ކެނޑިޑަސީ ބަލއިނުގަތުމުން ސުޕްރީމް ކޯޓަށް ހުށައެޅީ މައްސަލައަށް ދައުލަތުގެ ބަންޑާރަ ނައިބް ތަދައްހުލު ކުރުވައިފިއެވެ.

ދައުލަތުގެ ބަންޑާރަ ނައިބު މި މައްސަލައިގެ ތެރެއަށް ވަދެފައިވަނީ ސުޕްރީމް ކޯޓުގެ އެންވުމަކަށެވެ. މި މައްސަލައިގެ ތެރެއަށް ޕީޕޢެމުންވެސް ވަނީ ވަދެފައެވެ. މި މައްސަލައިގެ ފުރަތަމަ އަޑުއެހުން މާދަމާގެ މެންދުރަށް ތާވަލުކޮށް އެކަން ވަނީ އިލެކްޝަންސް ކޮމިޝަނާއި ރައީސް ޔާމީންގެ ވަކީލުންނަށް ސުޕްރީމްކޯޓުން ޗިޓް ފޮނުއްވާފައެވެ.

ރައީސް ޔާމިންގެ ކެނޑިޑަސީ ބަލައިނުގަތުމަށް ނިންމި ނިންމުމާއި ގުޅިގެން ލިޔުމުން ޖަވާބްދާރީވުމަށް ސުޕްރީމްކޯޓުން އިލެކްޝަންސް ކޮމިޝަނަށް ވަނީ އަންގަވާފައެވެ. މިއަދުގެ 15:00ގެ ކުރިން ކޯޓަށް ޖަވާބުދާރީވެޑައިގަންނަވާނެކަން އިލެކްޝަންސް ކޮމިޝަނުންވެސް ވަނީ ހާމަކުރައްވާފައެވެ.

ރައީސް ޔާމީންގެ ކެނޑިޑަސީ ބަލައިނުގަތުމަށް އިލެކްޝަންސް ކޮމިޝަނުން ނިންމެވީ ގާނޫނު އަސާސީގައި ބުނާ ޝަރުތު އުނިވެފަައިވާކަމަށް ކަނޑައެޅުއްވުމަށްފަހުއެވެ.

އެމްއެމްޕީއާރުސީގެ ބޮޑު ހިޔާނާތުގައި ވ. އާރަށް ކުއްޔަށް ދޫކުރުމުގައި ރިޝްވަތު ނެގުމާއި މަނީ ލޯންޑަރކުރުމުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.

ޤާނޫނު އަސާސީ ބުނާގޮތުން ރައީސުލްޖުމްހޫރިއްޔާއަށްވުމުގެ ޝަރުތުތަކުގެ ތެރޭގައި ޖިނާއި ކުށެއް ސާބިތުވެގެން އެއް އަހަރަށްވުރެ ދިގު މުއްދަތެއްގެ ހުކުމެއް އޮތްނަމަ އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފުކުރިތާ 3 އަހަރުވެފައިވާ މީހަކަށް ވާންޖެހެއެވެ.

އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެނޑިޑެސީއާއި މެދު ސުވާލު އުފެއްދިއްޖެ ނަމަ އެ މައްސަލަ ހުށައެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މި ފަދަ މައްސަލަތައް ނިންމަންވާނީ ސުޕްރީމްކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި ސުޕްރީމްކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައިވަނީ ބަޔާންކޮށްފައެވެ.