ދިވެހިން ވޯޓުލުމަށް އަބޫދާބީގައި މިފަހަރު ވޯޓު ފޮށި ބަހައްޓަނީ

އަންނަމަހު ބާއްވާ ރިޔާސީ އިންތިޚާބުގައި ޔުނައިޓެޑް އެރެބް އެމިރޭޓްސްގެ އަބޫދާބީގައި ތިބި ދިވެހިންނަށް ވޯޓުލެވޭނެ އިންތިޒާމް ހަމަޖެއްސުމުގެ ގޮތުން އެ ޤައުމުގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ނިންމަވައިފިއެވެ. މިއީ އޫއޭއީގައި ދިވެހިންނަށް ޚާއްސަކޮށްގެން ވޯޓު ފޮށްޓެއް ބަހައްޓާ ފުރަތަމަ ފަހަރެވެ.

އިލެކްޝަންސް ކޮމިޝަނުން ވިދާޅުވީ އެ ޤައުމުގައި ވޯޓު ފޮށި ބެހެއްޓުމަށް ނިންމާފައިވަނީ 150 އަށްވުރެ ގިނަ މީހުން ރަޖިސްޓްރީ ކުރުމުންކަމަށެވެ.

އަބޫދާބީގެ އިތުރަށް ދިވެހިން ދިރިއުޅޭ އިތުރު 4 ޤައުމެއްގައިވެސް ވޯޓު ފޮށި ބެހެއްޓުމަށް ހަމަޖެހިފައިވެއެވެ. އެއީ އިންޑިޔާގެ ޓްރިވެންޑްރަމް ،ސްރީލަންކާގެ ކޮލަމްބޯ، މެލޭޝިޔާގެ ކުއަލަލަމްޕޫރު އަދި އިނގިރޭސި ވިލާތުގެ ލަންޑަންގައެވެ. އިލެކްޝަންސް ކޮމިޝަނުން މީގެ ކުރިން ނިންމާފައިވަނީ ދިވެހިން ދިރިއުޅޭ 8 ޤައުމެއްގައި ވޯޓު ފޮށި ބެހެއްޓުމަށެވެ. އެ އަދަދު މަދުވެފައިވަނީ ކަނޑައެޅިފައިވާ ވަރަށްވުރެ މަދުން ރަޖިސްޓްރީކޮށްފައިވާތީއެވެ.

ރިޔާސީ އިންތިޚާބުގައި މިހާތަނަށް 65 ރިސޯޓެއްގައިވެސް ވޯޓު ފޮށި ބެހެއްޓުމަށް ވަނީ ނިންމަވާފައެވެ. އިލެކްޝަންސް ކޮމިޝަނުން ވިދާޅުވީ ވޯޓު ފޮށި ބަހައްޓާ އަދަދުތަކަށް ބަދަލުތަކެއް އައުމަކީ އެކަށީގެންވާކަމެއްކަމަށެވެ.

ރިޔާސީ އިންތިޚާބުގައި ރަޖިސްޓްރީވެފައިވާ ރަށް ނޫން އެހެން ރަށެއްގައި ވޯޓްލުމަށް ބޭނުންވާ މީހުން ރީ-ރަޖިސްޓްރީވުމަށް ހުޅުވާލުމުން 35،849 އަށް ވުރެ ގިނަ މީހުން ރަޖިސްޓްރީކޮށްފައިވާ ކަމަށް އިލެކްޝަންސް ކޮމިޝަނުން ވިދާޅުވެއެވެ.