ވާދޫގައި 100 އެނދުގެ ސިޓީ ހޮޓަލެއް، ފަރެސްމާތޮޑާއާއި ކަޅައިދޫ ގުޅުވާލަނީ

ގދ.ވާދޫގައި 100 އެނދުގެ ސިޓީ ހޮޓަލަކާއި ގދ. ފަރެސްމާތޮޑާގެ ބިން ހިއްކައި އެ ރަށާ ކައިރީގައި އޮންނަ ކަޅައިދޫ ގުޅާލައްވާނެކަމަށް ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓް އިބްރާޙިމް މުޙައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރިޔާސީ އިންތީޚާބަށް ކެމްޕެއިން ކުރެއްވުމަށް ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގައި އެ ދެރަށުގައި ވަކިވަކިން ބޭއްވި ބައްދަލުވުންތަކުގައެވެ. މިގޮތުން މިއަދު ހެނދުނު އެމަނިކުފާނު ގދ. ވާދޫއަށް ވަޑައިގެން ދެއްކެވި ވާހަކަފުޅުގައި ވަނީ ދެވަނަ ދައުރެއް ލިބިވަޑައިގެންފިނަމަ އެރަށުގައި ގިނަ ކަންތައްތަކެއް ކޮށްދެއްވާނެކަމަށް ވިދާޅުވެފައެވެ. އެގޮތުން އެރަށުގައި 100 އެނދުގެ ސިޓީ ހޮޓަލެއްގެ އިތުރަށް 9 ކަމެއް ކޮށްދެއްވާނެކަމަށް ވައުދުވެވަޑައިގެންނެވިއެވެ. އެގޮތުން ރަށުގެ ސިއްޙީ މަރުކަޒަށް ބޭނުންވާ ކަންކަމާއި ކޫލިވަރުގެ ވަޞީލަތްތައް ޤާއިމްކުރުމާއި މަގުތައް ތަރައްޤީކުރެއްވުމަށް ވައުދުވެވަޑައިގެންނެވިއެވެ.

"ފަތާ ފެންގަނޑެއް ހަދައި، ސަރަހައްދީ ފެންވަރުގެ ވޮލީ ކޯޓެއް އަޅާނަން، އަދި ރޯހައުސް އާއި ފްލެޓު ވެސް ރަށުގައި އަޅާނަންއިރާދަކުރެއްވިއްޔާ މި ރަށަށް ވެސް ބޮޑު ބަދަލުތަކެއް އަންނާނެ." ވާދޫގައި ވާހަކަދައްކަވަމުން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހް ވިދާޅުވިއެވެ.

ވާދޫއަށް ފަހު ދެން އެމަނިކުފާނު ވަޑައިގެންނެވީ ފަރެސްމާތޮޑާއަށެވެ. އެރަށަށް ވަޑައިގެން ރައީސް ވަނީ ދެވަނަ ދައުރުގައި ފަރެސްމާތޮޑާއަށްވެސް ކޮށްދެއްވަން ނިންމަވާފައިވާ 9 ކަމެއް އިޢުލާންކުރައްވާފައެވެ. އެގޮތުން ފަރެސްމާތޮޑާގެ ބިން ހިއްކައި އެ ރަށާއި ކައިރީގައި އޮންނަ ގދ. ކަޅައިދޫ ގުޅާލައްވާނެކަމަށް ވިދާޅުވިއެވެ. އަދި އެއރަޕޯޓް ކައިރީގައި ސިޓީ ހޮޓާ އަޅުއްވައިދޭނެކަމާއި ފްލެޓް ނުވަތަ ރޯ ހައުސްއާއި މަގުތައް ޒަމާނީ ފެންވަަރަށް ތަރައްޤީ ކުރައްވާނެކަން ހާމަކުރެއްވިއެވެ.

"ރާއްޖޭގެ ކޮންމެ ރަށަކަށް ބޭނުންވެފައި ހުރި ކަންކަން އެބަހުރި .ރައްޔިތުން ބޭނުންވާ އެ ބަދަލު ކުރިއަށް އޮތް ފަސް އަހަރު ދުވަހުގެ ތެރޭގައި ގެންނަވާނެ އަޅުގަނޑުމެން ބޭނުން ވަނީ އުފާވެރި އަމާން ރާއްޖެއެއް ރާއްޖޭގެ ހުރިހާ ކަންކޮޅުތަކުގައި ތިބި ރައްޔިތުންނަށް ހޯދައި ދިނުން." ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހް ވިދާޅުވިއެވެ.

މިހާރު ކުރިއަށްދާ ރިޔާސީ ކެމްޕޭނުގައި އެމްޑީޕީގެ ކެންޑިޑޭޓު، ރައީސް އިބްރާހިމް މުހައްމަދު ޞާލިހް ގދ. އަތޮޅުގެ ރަށްތަކަށް ވަޑައިގަތުމަށްފަހު މިހަރު ވަނީ ގއ. އަތޮޅުގެ ރަށްތަކަށް ދަތުރު ފަށްޓަވާފައެވެ. މިއިން ކޮންމެ ރަށަކަށް ވަޑައިގެން ރައީސް ގެންދަވަނީ ރަށްރަށުގެ ތަރައްޤީއަށް ކުރެއްވުމަށް ރާވާފައިވާ ހުރި މަސައްކަތްތައް ހާމަކުރައްވަމުންނެވެ، ހުވަދު އަތޮޅަށް ރައީސް ކުރައްވާ މި ދަތުރުގައި 17 ރަށަކަށް ވަޑައިގަންނަވާނެއެވެ.