މިއަހަރު ނިމޭއިރު ރާއްޖޭގެ ޖީޑީޕީ 107 ބިލިއަނަށް އަރާނެ: އަމީރު

މި 5 އަހަރު ނިމޭއިރު، ރާއްޖޭގެ އުފެއްދުންތެރިކަމުގެ ނިސްބަތް 81 ބިލިއަން ރުފިޔާއިން، 107 ބިލިއަން ރުފިޔާއަށް އިތުރުކުރެވޭނެ ކަމަށް ފިނޭންސް މިނިސްޓަރ އިބްރާޙިމް އަމީރު ވިދާޅުވެއްޖެއެވެ. މިނިސްޓަރ މިހެން ވިދާޅުވީ ގދ.ގައްދޫގައި ބޭއްވި އެމްޑީޕީގެ ޖަލްސާއެއްގައި ވާހަކަފުޅުދައްކަވަމުންނެވެ.

މިނިސްޓަރ އަމީރު ވިދާޅުވީ 2018ވަނަ އަހަރު، މިސަރުކާރުން ވެރިކަމާއި ހަވާލުވިއިރު ރާއްޖޭގެ އުފެއްދުންތެރިކަން ނުވަތަ ޖީޑީޕީ ހުރީ 81 ބިލިއަން ރުފިޔާގައިކަމަށެވެ. އަމީރު ވިދާޅުވީ ކޯވިޑްގެ ޙާލަތު ކުރިމަތިނުވެ، ސަރުކާރުން ކަނޑައެޅިގޮތަށް މަސައްކަތްތައް ކުރިއަށްގެންދެވުމުގެ ފުރުޞަތު ލިބުނު ނަމަ، ޖީޑީޕީ 140 ބިލިއަން ރުފިޔާއަށް އިތުރުކުރެވޭނެކަމަށެވެ.

ފިނޭންސް މިނިސްޓަރ ވިދާޅުވީ ކޯވިޑްގެ ޙާލަތުގައިވެސް، ރާއްޖޭގެ އިޤްތިޞާދީ ޙާލަތު ވަރަށް ރަނގަޅަށް ހިފެހެއްޓުނުކަމަށެވެ. އެގޮތުން އެންމެ ދަށަށް އިޤްތިޞާދު ދިޔަ ހާލަތުގައިވެސް، 2018ވަނަ އަހަރަށްވުރެ ބޮޑު ކުރިއެރުމެއް ހޯދިކަމަށެވެ. މިނިސްޓަރ ވިދާޅުވީ ކޯވިޑާއެކު ރާއްޖޭގެ ޖީޑީޕީ 57 ބިލިއަނަށް ދަށަށް ދިޔަނަމަވެސް، ރާއްޖޭގެ ޔޫސަބަލް ރިސަރވް ހުރީ 177 މިލިއަން ޑޮލަރުގައިކަމަށެވެ. 2018ވަނަ އަހަރު ރާއްޖޭގެ ޔޫސަބަލް ރިސަރވަކީ، 162 މިލިއަން ޑޮލަރެވެ. 2021ވަނަ އަހަރު ނިންމާލީ، 413 މިލިއަން ޑޮލަރުގެ ޔޫސަބަލް ރިސަރވަކާއެކު ކަމަށްވެސް ފިނޭންސް މިނިސްޓަރ ވިދާޅުވިއެވެ.

މިނިސްޓަރ އަމީރު ވިދާޅުވީ، ކޯވިޑަށް ފަހު ފަތުރުވެރިކަމުގައި ހޯދި ކުރިއެރުމާއި، ކޯވިޑްގައި ސަރުކާރުން އާއްމުންނާއި ވިޔަފާރިތަކަށް ފޯރުކޮށްދިން އެހީއަކީ، މިއަދު އިޤްތިޞާދު އަލުން އާރާސްތުކުރެވުނު ސަބަބުކަމަށެވެ.

އެގޮތުން އިންކަމް ސަޕޯޓްގެ ގޮތުގައި 22946 މީހުންނަށް 421 މިލިއަން ރުފިޔާ ސަރުކާރުން ފޯރުކޮށްދެއްވާފައިވާކަމަށެވެ. އަދި ފްރަންޓްލައިން އެވަންސްގެ ގޮތުގައި 18365 މީހުންނަށް 365މިލިއަން ރުފިޔާ، 2133 ކުދި ވިޔަފާރިއަކަށް 368 މިލިއަން ރުފިޔާ އަދި ބޮޑެތި ވިޔަފާރިތަކުގެ ގޮތުގައި 419 ވިޔަފާރިއަކަށް 146.7 މިލިއަން ރުފިޔާގެ އެހީ ސަރުކާރުން ފޯރުކޮށްދެއްވާފާއިވާކަމަށް އަމީރު ވިދާޅުވިއެވެ.

މިނިސްޓަރ އަމީރު ވިދާޅުވީ، މިއަހަރު ނިމިގެންދާއިރު ވެގެންދާނީ މިހާތަނަށް ރާއްޖޭގެ ޖީޑީޕީ އެންމެ މައްޗަށް ދާ އަހަރަށްކަމަށެވެ.

"ޢަމާޒަކީ އިޤްތިޞާދު ދެގުނަކުރުން. މިއަހަރު ނިމޭއިރު ޖީޑީޕީ 107ބިލިއަނަށް އަރާނެ. އަދި 2028އަށް ދާއިރު ގައުމީ އުފެއްދުންތެރިކަން 160-180 ބިލިއަނަށް އެރުވުން އެއީ ޢަމާޒު." އަމީރު ވިދާޅުވިއެވެ.

އަމީރު ވިދާޅުވީ މި ޢަމާޒަށް ވާސިލްވުމުގައި، ވައިގެ މަގުން ދަތުރުކުރުމުގެ ނިޒާމު ތަރައްޤީކުރުމަށް ސަރުކާރުން ކުރައްވަމުންދާ މަސައްކަތްތައް ބޮޑު ދަޢުރެއް އަދާކުރާނެކަމަށެވެ.

އެގޮތުން ވެލާނާ އިންޓަނޭޝަނަލް އެއަރޕޯޓް، 4މިލިއަން ފަތުރުވެރިންނަށް ޚިދުމަތްދޭ އެއަރޕޯޓަކަށް ބަދަލުވުމާއި، އަދި އައްޑޫ ގަން އެއަރޕޯޓާއި ހަނިމާދޫ އެއަރޕޯޓް ތަރައްޤީވެގެން އައުމަކީވެސް ޤައުމުގެ އުފެއްދުންތެރިކަން ކުރިއެރުމަށް އެޅުނު ބޮޑު ފިޔަވަޅެއްކަމަށެވެ. އަދި ރަށްރަށް ތަރައްޤީކުރުމަށް ޢުމްރާނީ ގޮތުން ކުރާ މަސައްކަތްތަކުގެ ނަތީޖާވެސް ޖީޑީޕީގެ އަދަދުތަކުން ފެންނާނެ ކަމަށް ފިނޭންސް މިނިސްޓަރ ވިދާޅުވިއެވެ.