ޕްރޮގްރެސިވް ޕާޓީ އޮފް މޯލްޑިވްސް، ޕީޕީއެމްގެ ސްޕެޝަލް އެޑްވައިޒަރުގެ ގޮތުގައި ހުންނެވި ކުރީގެ ރައީސް ޑރ.މުޙައްމަދު ވަޙީދު ޙަސަން މަނިކު، އެޕާޓީން ވަކިވެވަޑައިގެންފިއެވެ. 10 އަހަރަށްފަހު ޕީޕީއެމުން ވަކިވެވަޑައިގެންނެވިކަން ޑރ.ވަޙީދު ހާމަކުރެއްވީ ޓްވިޓާގައި އިނގިރޭސިބަހުން ދެންމެ ޢާންމުކުރެއްވި ބަޔާނެއްގައެވެ.
ޑރ.ވަޙީދު ވިދާޅުވީ، ޕީޕީއެމުން ވަކިވެވަޑައިގަތީ އެކަމާއިމެދު ވަރަށް ފުންކޮށް ވިސްނާވަޑައިގަތުމަށްފަހުކަމަށެވެ. އަދި އެ ނިންމުން ނިންމެވީ ރައްޔިތުންނާށް ފައިދާވާނެ ނިންމުންތައް އިޚްލާސްތެރިކަމާއި ތެރުވެރިކަމާއެކު ނިންމާނެ މާހައުލެއް ހޯއްދެވުމަށްކަމަށްވެސް ޑރ.ވަޙީދު ވިދާޅުވިއެވެ.
After having been a member of PPM for 10 years, I am saddened to submit my resignation from the Progressive Party of Maldives (PPM). Please find my statement below. pic.twitter.com/gXO6GazQmI
— Mohamed Waheed (@DrWaheedH) August 10, 2023
ޑރ.ވަޙީދު ޕީޕީއެމުން ވަކިވެވަޑައިގަތީ، ކުރީގެ ރައީސް ޢަބްދުﷲ ޔާމީނަށް ރިޔާސީ އިންތިޚާބުގައި ވާދަނުކުރެއްވޭ ޙާލަތުގައި، ރިޔާސީ ކެންޑިޑޭޓަކަށް ވެވަޑައިގަތުމަށް ޝައުގުވެރިކަން ފާޅު ކުރެއްވުމަށްފަހުއެވެ. މަޢުލޫމާތު ލިބިފައިވާގޮތުގައި، ރައީސް ވަޙިދުގެ ކުށުގެ ރެކޯޑުވެސް ސާފުކުރައްވާފައިވެއެވެ.
ރައީސް ޔާމީންނަށް ރިޔާސީ އިންތިޚާބުގައި ވާދަނުކުރެއްވޭނެކަން ކަށަވަރުވުމާއެކު، ޕީޕީއެމް/ޕީއެންސީ ކޯލިޝަނުގެ ތެރޭގައި އުފެދުނު ޚިޔާލު ތަފާތުވުންތަކަށްފަހު، ރިޔާސީ ޓިކެޓް، މާލެސިޓީގެ މޭޔަރު ޑރ.މުޙައްމަދު މުޢިއްޒު ވަނީ ހޯއްދަވާފައެވެ.