މި ސަރުކާރުން ފްލެޓްތައް ތަރައްޤީކުރަނީ ކުރީ ސަރުކާރަށްވުރެ އަގު ހެޔޮކޮށް: މާރިޔާ

މި ސަރުކާރުން ތަރައްޤީކުރަމުން އަންނަ ފްލެޓްތަކަކީ ކުރީގެ ރައީސް އަބްދުﷲ ޔާމީންގެ ސަރުކާރުން ތަރައްޤީކުރި ހިޔާ ފްލެޓްތަކަށް ވުރެ އަގުހެޔޮކޮށް ތަރައްޤީކުރަމުން އަންނަ ފްލެޓްތަކެއްކަމަށް އެމްޑީޕީގެ ރިޔާސީ ކެންޑިޑޭޓްގެ ތަރުޖަމާނު މާރިޔާ އަޙްމަދު ދީދީ ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި މާރިޔާ ވިދާޅުވީ ރައީސް ޔާމީންގެ ސަރުކާރުގައި ތަރައްޤީކުރެއްވި ހިޔާ މަޝްރޫއުގެ ފްލެޓްތަކާއި ރައީސް ޞާލިހްގެ ސަރުކާރުން ތަަރައްޤީކުރަމުން އަންނަ ފްލެޓްތައް ތަރައްޤީކުރުމަށް ހިނގާ ޚަރަދުތައް ހިއްސާކުރައްވާފައެވެ.

މާރިޔާ ވިދާޅުވީ ކުރީ ސަރުކާރުން ތަރައްޤީކޮށްފައިވާ ފްލެޓްތަކަކީ ހަމައެކަނި 2 ކޮޓަރީގެ އެޕަޓްމަންޓްތަކެއްކަމަށެވެ. އެހެންނަމަވެސް މި ސަރުކާރުން ތަރައްޤީކުރަމުން ދަނީ 2 ކޮޓަރިއާއި 3 ކޮޓަރީގެ އެޕާޓްމަންޓްތަކެއްކަން އެކަމަނާ ފާހަގަކުރެއްވިއެވެ.

މާރިޔާ ވިދާޅުވީ ކުރީ ސަރުކާރުން 2 ކޮޓަރީގެ އެޕާޓްމަންޓްތައް ތަރައްޤީކުރުމަށް ޚަރަދުކުރި ވަރަށް މިއަދުގެ ސަރުކާރުން 3 ކޮޓަރީގެ އެޕާޓްމަންޓް ތަރައްޤީކުރުމަށް ޚަރަދުކުރާކަމަށެވެ. އެގޮތުން ކުރީ ސަރުކާރުން ތަރައްޤީކުރި 2 ކޮޓަރީގެ އެޕާޓްމަންޓެއް ތަރައްޤީކުރުމަށް 62000 ޑޮލަރު ހަރަދުކުރި ނަމަވެސް މި ސަރުކާރުން 2 ކޮޓަރީގެ އެޕާޓްމަންޓްތައް ތަރައްޤީކުރެއްވުމަށްޓަކައި ހަރަދުކުރަނީ 45000 އާއި 48000 ޑޮލަރުގެ ދެމެދުގެ އަގެއްކަމަށް މާރިޔާ ވިދާޅުވިއެވެ. އަދި މި ސަރުކާރުން ތަރައްޤީކުރަމުން އަންނަ 3 ރޫމްގެ އެޕާޓްމަންޓްތައް ތަރައްޤީކުރުމަށް ހޭދަވަނީ 67000 އާއި 6900 ދެމެދުގެ ޑޮލަރުގެ އަގެއްކަމަށްވެސް މާރިޔާ ވިދާޅުވިއެވެ.

" ހިޔާ މަޝްރޫގެ ދަށުން ހެދި ފްލެޓްތަކުގައި 3 ރޫމްގެ އެޕާޓްމަންޓްތަކެއް ނެތް. އެތަން ހަވާލުކުރީވެސް 4 ފާރު ރާނާފައި. އެހެންނަމަވެސް މި ސަރުކާރުން ތަރައްޤީކުރާ އެޕަޓްމަންޓްތައް ރައްޔިތުންނަށް ދޭނީ ހުރިހާ މަސައްކަތްތަކެއް ނިންމުމަށްފަހު."މާރިޔާ އަޙްމަދު ދީދީ ވިދަޅުވިއެވެ.

މިއަދުގެ ނޫސްވެރިންގެ ބައްދަލުވުމުގައި މާރިޔާ ވަނީ އިދިކޮޅު ޕީޕީއެމް ޕީއެންސީގެ ރިޔާސީ ކެންޑިޑޭޓް މުޙައްމަދު މުއިއްޒު ގެންގުޅުއްވާ ސިޔާސަތުތަކަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން މުއިއްޒު ވެވަޑައިގަންނަވާ ވައުދުތަކަކީ މި ސަރުކާރުން ކުރަމުންދާ އަދި ކޮށްފައިވާ މަސައްކަތްތަކެއްކަމަށް މާރިޔާ ވިދާޅުވިއެވެ.