އެންޑީއެމްއޭ އިން 5 ރަށަކަށް ފެންހިއްކާ ޕަންޕް ފޯރުކޮށްދީފި

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން 5 ރަށަކަށް ފެންހިއްކާ ޕަންޕު ފޯރުކޮށްދީފިއެވެ.

ރަށްރަށުގެ ވިލުންވެރިކަން އިތުރުކުމަށް ސަރުކާރުން ދެއްވާ ހާއްސަ އަޙައްމިޔަތުގެ ދަށުން ޑީވޯޓަރިންގ ޕަމްޕު ފޯރުކޮށްދިނުމަށް އެން.ޑީ.އެމް.އޭއިން އެކުލަވާ؛ި ޕްރޮޖެޓްގެ ދަށުން ފެންހިއްކާ ޕަމްޕު ހަވާލުކުރުމަށް ހަމަޖެހިފައިވާ ފުރަތަމަ 5 ރަށުގެ ކައުންސިލާއި އެތަކެތި ވަނީ ޙަވާލުކޮށްފައެވެ.

އެން.ޑީ.އެމް.އޭއިން އެކުލަވާލި ޑީވޯޓަރިންގ ޕަމްޕް ފޯރުކޮށް ދިނުމުގެ ޕްރޮޖެކްޓްގެ ދަށުން ފެންހިއްކާ ޕަންޕާއި އޭގެ އެސެސަރީސް ހަވާލުކުރި 5 ރަށަކީ ބ. މާޅޮސް، ބ. ކެންދޫ، ބ. ތުޅާދޫ، ޅ. ނައިފަރު އަދި ޅ. ހިންނަވަރެވެ. މި ރަށްތަކުގެ ކައުންސިލާއި މި ތަކެތި ހަވާލުކޮށްދިނުމަށް އެން.ޑީ.އެމް.އޭއާއި މިނިސްޓްރީ އޮފް ޑިފެންންސް އަދި މޯލްޑިވްސް ނެޝަނަލް ޑިފެންސް ފޯސްގެ ވަފުދެއް ވަނީ މި އޮގަސްޓް މަހުގެ 27 އިން 29 އަށް މި ރަށްތަކަށް ޒިޔާރަތްކޮށްފައެވެ.

ކައުންސިލްތަކަށް މިތަކެތި ހަވާލުކޮށްދެއްވީ މިނިސްޓްރީ އޮފް ޑިފެންސްގެ ނައިބު ހުސެން ޒާހިރުއެވެ. އެމަނިކުފާނުގެ އަރިހުގައި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ޙިސާން ހަސަން އާއި ވައިސް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުލް ރަހީމް ޢަބްދުލް ލަތީފްއާއި އެމް.އެން.ޑީ.އެފް ނޮދަން އޭރިޔާ ކޮމާންޑްގެ އިސް އޮފިސަރުން ބައިވެރިވެވަޑައިގެންނެވިއެވެ.

ސަރުކާރުގެ ސްޓްރެޓެޖިކް އެކްޝަން ޕްލޭންގައި ހިމަނައިގެން އެންމެ ނާޒުކު އަދި ފެންބޮޑުވުމުގެ ހާދިސާތައް ތަކުރާރުކޮށް ދިމާވާ އަދި އެފަދަ ހާދިސާތަކުގެ ސަބަބުން ބޮޑެތި ގެއްލުންތަކެއް ތަޙައްމަލް ކުރަންޖެހޭ ރަށްތަކުގެ ތެރެއިން މިހާތަނަށް އެފަދަ ވަޞީލަތެއް ނެތް 18 ރަށެއް އެކަށައަޅައި އެކަމަށް ބޭނުންވާ ވަޞީލަތްތައް ޤާއިމްކޮށް ދިނުމުގެ މަސައްކަތް އެން.ޑީ.އެމް.އޭއިން އަންނަނީ ކުރަމުންނެވެ.

މި މަސައްކަތަކީ ފެންބޮޑުވާ ރަށްރަށުގެ ވިލުންވެރިކަން އިތުރުކުރުމަށް ވަޞީލަތްތައް އެކަމަށް އެންމެ ބޭނުންޖެހިފައިވާ ރަށްތަކަށް އިސްކަންދީގެން ޤާއިމްކޮށްދިނުމަށް ހިންގޭ މިފަދަ އެންމެ ބޮޑު ޕްރޮޖެކްޓްކަމަށް އެ އޮތޯރިޓީން ވިދާޅުވެއެވެ. މިގޮތުން މިޕްރޮޖެކްޓަށް ސަރުކާރުން 1.4 މިލިއަން ރުފިޔާ ހޭދަކުރައްވާފައިވާކަމަށް އެން.ޑީ.އެމް.އޭއިން ވިދާޅުވެއެވެ.

މި ޕްރޮޖެކްޓަގެ ދަށުން ޑީވޯޓަރިން ޕަމްޕު އަދި އޭގެ އެސެސަރީސް ފޯރުކޮށްދިނުމަށް ކަނޑައެޅިފައިވާ ބާކީ 13 ރަށަށް ބޭނުންވާ ވަޞީލަތްތައް ވީ އެންމެ އަވަހަކަށް އެރަށްތަކަށް ފޯރުކޮށްދިނުމަށް އެން.ޑީ.އެމް.އޭއިން އަންނަނީ މަސައްކަތް ކުރަމުންނެވެ.