ކުންފުނިތަކުގެ މުވައްޒަފުން ވަޒީފާއިން ވަކިނުކުރައްވާނެކަމުގެ ވައުދު މުއިއްޒު ތަކުރާރު ކުރައްވައިފި

ސަރުކާރުގެ ކުންފުނިތަކުގައި ސިޔާސީ މަގާމްތަކުގައި ތިބި މުވައްޒަފުން ފިޔަވައި އެއްވެސް މުވައްޒަފަކު ވަޒީފާއިން ވަކިނުކުރައްވާނެ ކަމަށް ރިޔާސީ ކެމްޕޭންތެރޭގައި ސަތޭކަފަހަރު ވިދާޅުވެފައިވާ ވިދާޅުވުން އަނެއްކާވެސް ތަކުރާރު ކުރައްވައި އިންތިޚާބީ ރައީސް ޑޮކްޓަރ މުހައްމަދު މުއިއްޒު ވާހަކަފުޅު ދައްކަވައިފިއެވެ.

ކާމިޔާބީގެ އުފާފާޅު ކުރުމަށް ރޭ ބޭއްވި އެއްވުމުގައި ޑރ.މުއިއްޒު ވިދާޅުވީ މުވައްޒަފުން ވަޒީފާއިންވަކި ނުކުރައްވާނެކަމަށް ވެވަޑައިގެންނެވި ވައުދަކީ ރަށްރަށަށް ވަޑައިގެން އެންމެ ގިނަ ފަހަރު އެމަނިކުފާނު ދައްކަވަން ޖެހިވަޑައިގަތް ވާހަކަފުޅު ކަމުގައެވެ. އެވައުދު އަނެއްކާވެސް ތަކުރާރު ކުރައްވަން ޖެހިވަޑައިގަތީ ބައެއް ރަށްރަށުގައި އެނޫންގޮތަކަށް އެމަނިކުފާނުގެ ސަރުކާރުގައި ކަންކުރާނެ ކަމަށް ބައެއް ފަހަރާތްތަކުން ދައްކާ ވާހަކަތަކަކާ ގުޅިގެން ކަމަށެވެ. ވަޒީފާއިން މީހުން ވަކިކުރުމުގެ ބަދަލުގައި އެމަނިކުފާނު ބޭނުންވަނީ އިތުރަށް ވަޒީފާ އުފެއްދުމަށް ކަމަށް މުއިއްޒު ވިދާޅުވިއެވެ.

"އަޅުގަނޑު މިދޭ ޔަޤީންކަމަކީ އެއީ ސިޔާސީ ވަޒީފާއަކަށް ނުވަންޏާ ވަޒީފާއިން ވަކި ނުކުރާނެކަން." ޑރ. މުޢިއްޒު ވިދާޅުވިއެވެ.

މުވައްޒަފުން ވަޒީފާއިން ވަކިނުކުރެއްވި ނަމަވެސް ސަރުކާރުގެ ކުންފުނިތައް އޮތީ ވަރަށް ހާލުގައި ކަމަށް އިންތިޚާބީ ރައީސް ވިދާޅުވިއެވެ. ސަރުކާރުގެ މަސައްކަތްތައް ކުރިއަށް ގެންދިޔުމަށް ގެންނަވާނެ ބަދަލުތަކާއި ގުޅޭގޮތުން ވާހަކަފުޅުދައްކަވަމުން ޑރ.މުޙައްމަދު މުޢިއްޒު ވިދާޅުވީ ކުންފުނިތަކުގެ ދަރަނި ވަރަށް ބޮޑަށް އިތުރުވެފައިވާ ކަމަށާއި، ކުންފުނިތައް ކޮޅަށް ނަގަން ޖެހޭ ކަމަށެވެ. އަދި ކުންފުނިތަކުގެ ހިންގުމަށް ބަދަލުތަކެއް ގެންނަވާނެ ކަމަށް މުޢިއްޒު ވިދާޅުވިއެވެ.

" 50ހަކަށް ކުންފުނި އެބައޮތް ހަދާފައި، މި ހުރިހާ ކުންފުނިތަކުގެތެރެއިން ބައެއް ކުންފުނިތައް މާޖްވެސް ކުރެވިގެންދާނެ، އެހެންނަމަވެސް ފެނަކަ ކަހަލަ ބޮޑެތި ކުންފުނިތައް ހިންގަމުންދާނެ،" މުޢިއްޒު ވިދާޅުވިއެވެ.

މުޢިއްޒު ވިދާޅުވީ ކުންފުނިތައް ހިންގުމަށް ހޮވާނީ އެކަމަށް ޤާބިލް ބޭފުޅުންކަމަށެވެ. އަދި ސަރުކާރުގެ ހުރިހާ ދިމާއަކަށްވެސް ލާނީ ވަރުގަދަ ޓީމެއް ކަމަށް ޑރ. މުޢިއްޒު ވިދާޅުވިއެވެ.