މަތިވެރީގައި ބޭއްވި މަސް ރޭހުން ލިބުނު ފައިސާ ފަލަސްތީން ފަންޑަށް

ޤައުމީ ޒުވާނުންގެ ދުވަހާއި ގުޅުވައިގެން އއ. މަތިވެރީގައި ބޭއްވި މަސް ރޭހުން ވަނަތަކަށް ހޮވުނު ފަރާތްތަކަށް ލިބުނު ފައިސާގެ އިނާމާއި، މަސް ރޭހުގައި ބޭނި މަސް ވިއްކައިގެން ލިބުނު ފައިސާ ފަލަސްތީން ފަންޑަށް ހަދިޔާކޮށްފިއެވެ.

މި މަސްރޭހުގައިގައި 7 ޓީމަކުން ބައިވެރިވެފައިވެއެވެ. މި މުބާރާތް ޝަރަފްވެރިކޮށްދިނީ މިވަގުތު މަތިވެރީގައި ޗުއްޓީ ހޭދަ ކުރަމުންދާ ފަލަސްޠީނުގެ ފަތުރުވެރިއެކެވެ.

މި މުބާރާތުގެ ޓީމުތަކުން ބޭނި މަސްތައް ކިރައި ވަނަތައް ވަނީ ހޯދާފައެވެ.

ވަނަތަކަށް ހޮވިފައިވާ ޓީމްތައް:

• 89 ކިލޯ އާއެކު 1 ވަނަ ހޯދީ ”ޓީމް ހަމާސް“
• 44 ކިލޯގެ މަސް ބާނައިގެން 2 ވަނަ ހޯދީ ”ޓީމް ހަމަނުޖެހޭ“
• 3 ވަނަ ހޯދީ 32 ކިލޯގެ މަސް ބޭނި ”ޓީމް ވައިރޯޅި“

މި ޓީމް ތަކަށް ކައުންސިލުން ދިން ފައިސާގެ އިނާމް ތަކަކީ 1 ވަނައަށް 3،000 ރުފިޔާ، 2 ވަނައަށް 2،000 ރުފިޔާ، އަދި 3 ވަނައަށް 1،000 ރުފިޔާއެވެ.

މި 3 ޓީމަށް ލިބުނު ފައިސާގެ އިނާމްތައް އަދި ހުރިހާ ޓީމުތަކުން ބޭނި މަސްތައް ވިއްކައިގެން ލިބުނު ފައިސާ ވަނީ ފަލަސްތީނުގެ ނިކަމެތި ރައްޔިތުންނަށް އެހީވުމަށް ހިންގާ ފަންޑަށް ހަދިޔާކޮށްފައެވެ.

މަތިވެރި ކައުންސިލުން ވިދާޅުވީ، މަސް ވިއްކައިގެން 6071 ރުފިޔާ، އަދި ވަނަތަކަށް ހޮވުނު ފަރާތްތަކުގެ ފަރާތުން 4500 ރުފިޔާއާއި އެކު ޖުމްލަ 10517 ރުފިޔާ ފަލަސްތީނު ފަންޑަށް ޖަމާކުރުމަށް ހަމަޖެހިފައިވާ ކަމަށެވެ.

މި މަހުގެ 7 ވަނަ ދުވަހު ހަމާސް ޖަމާއަތުން އިސްރާއީލަށް ދިން ކުއްލި ހަމަލާއަށްފަހު އިޒްރޭލުން ވަނީ ފަލަސްތީނާ ދެކޮޅަށް ހަނގުރާމަ އިޢުލާނުކޮށްފައެވެ. ޔަހޫދީ އިސްރާއީލް ސިފައިން ދެމުންދާ ހަމަލާތަކުގައި ފަލަސްތީނަށް ބޮޑެތި ގެއްލުންތަކެއް ލިބި، އެތައް ބަޔަކު ވަނީ ޝަހީދު ކޮށްލައިފައެވެ.

މި ހަމަލާތަކުގެ ސަބަބުން ގެދޮރުގެއްލި ހާލުގައި ޖެހިފައިވާ ފަލަސްތީނުގެ މުސްލިމުންނަށް އެހީތެރިކަން ފޯރުކޮށްދިނުމަށް އެކި ފަރާތްތަކުން ކުރާ މަސައްކަތްތަކުގައި ދިވެހިންވެސް އަންނަނީ ބައިވެރިވެ އެހީތެރިކަން ފޯރުކޮށްދެމުންނެވެ.

ފަލަސްތީނުގެ ރައްޔިތުންނަށް އެހީވުމަށް އިންޓަރނޭޝަނަލް އެއިޑް ކެމްޕޭން، އައި.އޭ.ސީން ޚާއްސަ ފަންޑެއް ހުޅުވާފައިވާއިރު، މި ފަންޑަށް ގިނަ ފަރާތްތަކުން ދަނީ ފައިސާ ހަދިޔާކުރަމުންނެވެ.

އައި.އޭ.ސީގެ އިތުރުން، ފަލަސްތީނުގައި އިންސާނީ އެހީ ފޯރުކޮށްދިނުމަށް ހަރަކާތްތެރިވާ ފަލަސްތީނު ރެޑް ކްރެސެންޓަށް އެހީވުމަށް ދިވެހި ރެޑް ކްރެސެންޓުންވެސް ވަނީ ޚާއްސަ ފަންޑެއް ހުޅުވާފައެވެ. މީގެ އިތުރުން ރާއްޖޭގެ އެކި ކަންކޮޅުތަކުގައި ފަންޑު އެއްކުރުމަށް ތަފާތު ހަރަކާތްތައް އަންނަނީ ހިންގަމުންނެވެ.

ފަލަސްތީނުގެ މުސްލިމް ރައްޔިތުންނާއި ދެކޮޅަށް އިސްރާއީލުން ހިންގާ ލާއިންސާނީ ޖަރީމާތައް ވަގުތުން ވަގުތަށް ހުއްޓާލުމަށް ގޮވާލާ ދުނިޔޭގެ އެކި ކަންކޮޅުތަކުގައި އަންނަނީ ފަލަސްތީނު ރައްޔިތުންގެ ހައްޤުގައި އަޑުއުފުލަމުންނެވެ.