ހޯދަން އެންގީ 2018ގެ ނޮވެމްބަރުގެ ކުރިން ހިންގާފައިވާ މުޢާމަލާތަކާގުޅޭ ފައިސާ: ފެނަކަ

އެންޓި ކޮރަޕްޝަން ކޮމިޝަން، އޭ.ސީ.ސީން ހޯދުމަށް އަންގާފައިވާ 20 މިލިއަން ރުފިޔާއަކީ 2018 ވަނަ އަހަރުގެ ނޮވެމްބަރުގެ ކުރިން ހިންގާފައިވާ 4 މުޢާމަލާތަކާގުޅޭ ފައިސާކަމަށް ފެނަކަ ކޯރޕަރޭޝަނުން ހާމަކޮށްފިއެވެ.

ފެނަކަ ކޯޕަރޭޝަނާއި ގުޅޭ ކޮރަޕްޝަންގެ 75 މައްސަލައެއް ތަޙުޤީޤުކުރަމުންދާއިރު، 20 މިލިއަނަށްވުރެ ގިނަ ރުފިޔާ އަނބުރާ ހޯދަން އޭ.ސީ.ސީއިން ވަނީ އެކޯޕަރރޭޝަނަށް އަންގާފައެވެ.

އޭ.ސީ.ސީއިން ބަލަމުންދާ ފެނަކައިގެ 75 މައްސަލައިގެ ތެރޭގައި، ކުންފުނި ހިންގުމުގައި މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި، ހޯދައިދިނުމާ ގުޅޭ މައްސަލަތަކާއި، އުޞޫލުތަކުގެ ބޭރުން އެކި މީހުންނަށް ވަޒީފާ ހަމަޖައްސާފައިވާކަމުގެ ތުޙުމަތުތަކުގެ މައްސަލަތަކާއި، ކުންފުނީގެ ޕްރޮކިއުމަންޓު އުޞޫލުތަކާ ޚިލާފުވުމުގެ މައްސަލަތައް ހިމެނޭކަމަށެވެ. އަދި ކުންފުނިން ފައިސާ ދޫކުރުމާ ގުޅޭގޮތުން އެކަށައަޅާފައިވާ އުޞޫލުތަކާ ޚިލާފަށް ފައިސާ ދޫކުރުމުގެ ތުޙުމަތުތަކުގެ މައްސަލަތައް ހިމެނެއެވެ.

މިކަމާއި ގުޅިގެން ފެނަކަ ކޯރޕަރޭޝަނުން ނެރެފައިވާ ނޫސްބަޔާނެއްގައި ބުނެފައިވަނީ ބަލަމުންދާ މައްސަލަތަކުގެ އަދަދުކަމަށް ބަޔާންކޮށް އޭ.ސީ.ސީން ހާމަކޮށްފައިވާ ތަފާސްހިސާބަކީ، 2012 ވަނަ އަހަރު އެކުންފުނި ވުޖޫދު ކުރެވުނު ދުވަހުން ފެށިގެން މިއަދާ ހަމައަށް ހުރި މައްސަލަތަކުގެ އަދަދު ކަމަށެވެ.

އެގޮތުން ޒިންމާވާ ފަރާތްތަކުގެ އަތުން ކުންފުންޏަށް ހޯދުމަށް އެ ކޮމިޝަނުން އަންގާފައިވާ 20 މިލިއަންއަކީ 2011 ވަނަ އަހަރުން 2017 ވަނަ އަހަރުގެ ނިޔަލަށް ކުންފުނިން ހިންގާފައިވާ ޖުމްލަ 4 މުޢާމަލާތަކާ ގުޅިގެން ހޯދުމަށް އަންގާފައިވާ ފައިސާކަމަށްވެސް ފެނަކައިން ހާމަކުރެއެވެ.

އަނބުރާ ހޯދަން އަންގާފައިވާ ފައިސާގެ ތަފްޞީލު:

■ ސަދަން ޔުޓިލިޓީޒް ލިމިޓެޑުގެ ކުރީގެ ފިނޭންސް ޑިރެކްޓަރަކު ކިޔަވަން ދިއުމަށް ކުންފުނީގެ އޭރުގެ މެނޭޖިންގ ޑިރެކްޓަރ، މަޤާމުގެ ނުފޫޒު ބޭނުންކޮށްގެން ކުންފުނީގެ ބެޖެޓުން ދޫކޮށްފައިވާ ކަމަށް ބުނެވޭ 240000 ރުފިޔާ

■ 2015 ވަނަ އަހަރުގެ ތެރޭގައި އަމިއްލަ ކުންފުންޏަކުންކޮށްފައިވާ މުޢާމަލާތްތަކަކާ ގުޅިގެން، ކުންފުނީގެ ޕްރޮކިއުމަންޓް ޕޮލިސީއާ އެއްގޮތަށް އުނިކުރަންޖެހޭ ޖޫރިމަނާ ފައިސާ އުނިނުކޮށް އެ ފަރާތްތަށް ފައިސާ ދައްކާފައިވާތީ އެކުންފުންޏަށް ލިބުނު ގެއްލުމަށްވާ 1017170.44 ރުފިޔާ

■ 2016 ވަނަ އަހަރު ކުންފުންޏަށް ބޭނުންވާ ޑޮލަރު ގަތުމަށް އަމިއްލަ ކުންފުންޏަކާއެކު ކުރެވުނު މުޢާމަލާތުގައި ކުންފުންޏަށް ލިބެންޖެހޭ 17857979.10 ރުފިޔާ

■ 2017 ވަނަ އަހަރު ކުންފުންޏަށް ބޭނުންވާ ބިލިންގ ސޮފްޓްވެއަރ ހޯދުމަށް އަމިއްލަ ކުންފުންޏަކާއެކު ކޮށްފައިވާ މުޢާމަލާތްތުގައި ކުންފުންޏަށް ގެއްލިފައިވާ 1389342 ރުފިޔާ

އޭސީސީން ބަލަމުންދާ މައްސަލަތަކުގެ ތަފްޞީލުތައް ފެނަކައިން ހާމަކޮށްފައިވާއިރު، އޭ.ސީ.ސީއިން ވަނީ ފެނަކައާގުޅޭ އެކި މައްސަލަތަކުގައި 92 ކަމެއް އިސްލާޙު ކުރުމަށްވެސް އަންގާފައެވެ.

އޭގެތެރޭގައި އެ ކުންފުނި ހިންގުމާ ގުޅޭ ކަންކަން ކުރިއަށްގެންގޮސްފައިވާގޮތުގެ 48 ކަމެއް އިސްލާޙުކުރުމަށާއި، ކުންފުނީގެ ސިޔާސަތުތަކާ ގުޅޭ 24 ކަމެއް އިސްލާޙުކުރުމާއި، ކޮރަޕްޝަންގެ ޢަމަލުތަކުގެ ސަބަބުން ކުންފުންޏަށް ގެއްލިފައިވާ ފައިސާ އަނބުރާ ހޯދުމާ ގުޅޭ 6 ކަމަކާއި، ކުންފުނިން ބަލައި ތަޙުޤީގުކުރުމަށް 6 ކަމެއް ހިމެނޭކަމަށް އޭ.ސީ.ސީއިން ވިދާޅުވެއެވެ.

މީގެއިތުރުން ފެނަކަ ކޯރޕަރޭޝަން ލިމިޓެޑް ހިންގުމުގައި ކޮރަޕްޝަންގެ ހިރާސް ހުރި މިންވަރާއި، އެހިރާސްތައް ކުޑަކުރުމަށް އަޅަންޖެހޭ ފިޔަވަޅުތަކާއި، ތަޙުޤީގުކުރުމަށް ދިމާވާ ގޮންޖެހުންތައް ފާހަގަކޮށް ރިޕޯޓެއް އެކުލަވާލާ، އެރިޕޯޓް ރައީސުލްޖުމްހޫރިއްޔާގެ އޮފީހަށާއި، ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް ކޮމިޓީގެ ސަމާލުކަމަށް ގެނެސްފައިވާނެކަމަށްވެސް އޭ.ސީ.ސީއިން ވިދާޅުވެއެވެ.