ނަޝީދު ވަކިކުރެއްވުމުގެ މައްސަލާގައި ގޮތެއް ހޯދަން އެމްޑީޕީން ސުޕްރީމް ކޯޓަށް

ރައްޔިތުންގެ މަޖިލީހުގެ ރައީސް، މުޙައްމަދު ނަޝީދުގެ އިތުބާރު ނެތްކަމަށް ރައްޔިތުންގެ މަޖިލީހަށް ހުށައަޅަފައިވާ މައްސަލަ ކުރިއަށް ގެންދެވޭނެ ގޮތެއް ހޯދުމަށް އެމްޑީޕީން ސުޕްރީމް ކޯޓަށް މައްސަލައެއް ހުށައަޅައިފިއެވެ.

ރައްޔިތުން މަޖިލީހުގެ ރައީސް، ރައީސް މުޙައްމަދު ނަޝީދު މަގާމުން ވަކިކުރުމަށް އެމްޑީޕީގެ 49 މެންބަރުން ސޮއިކުރައްވާ ހުށައެޅުއްވި މައްސަލަ މިއަދުގެ ޖަލްސާއަށް އެޖެންޑާކުރިނަމަވެސް، މަޖިލީހުގެ ނާއިބު ރައީސް އީވާ ޢަބްދުﷲ އާލާސްކަންފުޅަ އުޅުއްވާތީ ސަލާމުގައި ހުންނެވުން ޖަލްސާ ވަނީ ކެންސަލް ކޮށްފައެވެ.

މިކަމާއި ގުޅިގެން އެމްޑީޕީގެ ޕާލިމަންޓްރީ ގްރޫޕުގެ ބައެއް މެންބަރުން ވިދާޅުވީ، ރައީސް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދެވޭނެ ގޮތެއް ހޯދުމަށް ސުޕްރީމް ކޯޓަށް މައްސަލައެއް ހުށައަޅުއްވާފައިވާކަމަށެވެ. އެމްޑީޕީގެ މަޖިލިސް މެންބަރުން ޤަބޫލުފުޅު ކުރައްވާގޮތުގައި މި މައްސަލަ ކުރިއަށް ގެންދެވޭނެ ގޮތް މަޖިލީހުގެ ޤަވާއިދުގައި ބަޔާންކުރެއެވެ. އެގޮތުން މަޖިލީހުގެ ރައީސާއި ނައިބު ރައީސަށް ޖަލްސާގެ ރިޔާސަތު ނުބެލެހެއްޓޭނަމަ މަޖިލީހުގެ ރައީސް ކަނޑައަޅުއްވާ މެމްބަރަކު ރިޔާސަތު ބަލަހަންޓަން ވާނެކަމަށް މަޖިލީހުގެ ޤަވާއިދުގައި ބަޔާންކުރާކަން އެމެންބަރުން ފާހަގަކުރެއްވިއެވެ.

ނަމަވެސް މަޖިލީހުގެ އަމީން ޢާންމު ވިދާޅުވީ މަޖިލީހުގެ ގަވައިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަގައި ރިޔާސަތު ބަލަހައްޓަވަންޖެހޭނީ މަޖިލީހުގެ ނައިބް ރައީސްކަމަށް ޤަވާއިދުގައި ބުނާކަމަށެވެ. މަޖިލީހުގެ ނައިބް ރައީސް ނެތް ހާލަތެއްގައި ކަންކުރަންވީ ގޮތެއް މަޖިލީހުގެ ގަވައިދުގައި ހިމަނާފައެއްނުވާކަމަށް މަޖިލީހުގެ އަމީން ޢާންމު ވަނީ ވިދާޅުވެފައެވެ.

އެމްޑީޕީ ޕާލިމަންޓްރީ ގްރޫޕުން ވިދާޅުވީ، ރައީސް ނަޝީދުގެ އިތުބާރު ނެތްކަމުގެ މައްސަލަ ކޯޓުން ގޮތެއް ހޯދައިގެންވެސް ކުރިއަށް ގެންދެވޭނެ ގޮތެއް ހޯދުން މުހިންމުކަމަށެވެ. އަދި މަޖިލީހުގެ ރައީސްއާއި ނާއިބު ރައީސް ނެތި މަޖިލިސް ހުއްޓުވާފައި ބޭއްވޭނެ ގޮތެއް ޤާވާއިދުގައިވެސް ނެތްކަމަށް އެމްޑީޕީގެ މެންބަރުން ފާހަގަކުރެއްވިއެވެ.

ރައްޔިތުންގެ މަޖިލީހުގެ ޤަވާއިދުގެ 250 ވަނަ މާއްދާގައި ބަޔާންކުރަނީ، މަޖިލީހުގެ ނިންމުންތަކުންނާއި އަމަލުކުރަމުން އައިސްފައިވާ އުސޫލުތަކުން އެއްވެސް ހައްލެއް ނުފެނިއްޖެނަމަ ދެން ބަލަން ޖެހޭނީ ރިޔާސީ ނިޒާމް ޤާއިމްކުރެވިފައިވާ ޤައުމުތަކުގެ ޤާނޫނު ހަދާ މަޖިލިސްތަކުގައި އެފަދަ ހާކލަތްތަކުގައި އަމަލުކުރާ ޢާންމު އުސޫލަށްކަމަށެވެ.

މަޖިލީހުގެ ރައީސްގެ މަޤާމުން ރައީސް ނަޝީދު ވަކިކުރެއްވުމަށްފަހު ނޫނީ މަޖިލީހުގެ މަސައްކަތްތަކަށް އެއްބާރުލުން ނުދެއްވާނެކަމަށް އެމްޑީޕީ ޕާލިމަންޓްރީ ގްރޫޕުން ވަނީ ވިދާޅުވެފައެވެ.