ޢީދަށް ޚާއްސަކޮށް ބޭނުން ކުރެވޭނެ ރީތި މަދަހަތަކާއެކު "ޢީދޭ އައީ" އަލްބަމް

އިސްލާމީ ކަންތައްތަކާބެހޭ ވުޒާރާއިން މިއަހަރުގެ ފިޠުރު ޢީދާ ގުޅިގެން “ޢީދޭ އައީ” ނަމުގައި މަދަހަ އަލްބަމެއް ނެރެފިއެވެ. މިމަދަހަ އަލްބަމް ނެރެދެއްވީ އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދެވެ.

މަދަހަ އަލްބަމް ނެރުއްވުމަށް ބޭއްވި ރަސްމިއްޔާތުގައި ވަޒީރު ޑރ. ޝަހީމް ވިދާޅުވީ، ފިޠުރު ޢީދުގެ އުފާ ފާހަގަކުރަމުންދާއިރު، މަދަހަ އަލްބަމެއް އެވުޒާރާއިން ނެރުމުގެ މަޤްސަދަކީ ޢީދު ދުވަހު ބޭނުން ކުރާނެ މަދަހަތަކެއް އާންމުންނަށް ފޯރުކޮށްދިނުން ކަމަށެވެ.

ވަޒީރުވަނީ އަލްބަމްގައި ހިމެނޭ މަދަހަތައް ޢީދުގެ ހަރަކާތްތަކުގައި ބޭނުންކޮށް އަޑު އެއްސެއްވުމަށް އިލްތިމާސްކުރައްވާފައެވެ. މިމަދަހަ އަލްބަމްގައި ކުރީގެ މަދަހަތަކާއި ފަހުގެ މަދަހަތައް ހިމެނޭނެއެވެ. އަދި މިމަދަހަތައް ހިލޭ އެންމެންނަށް ޑައުންލޯޑު ކުރެވޭނެ ކަމަށް އިސްލާމީ ކަންތައްތަކާއި ބެހޭ ވުޒާރާއިން ވިދާޅުވެއެވެ.

މިއަދު ޢީދު ނަމާދަށް ފަހު ނެރުނު މަދަހަ އަލްބަމްގައި ހިމެނޭ ބައެއް މަދަހަތަކުގެ "ޢީދޭ އައީ"، "ޢީދުއައީ ހިނިތުންވަމުން"، "ޢީދު މުބާރަކް"، "ބަރަކާތްތެރި ޢީދުގެ ސަލާމް" އަދި "ތަހުނިޔާ ދޭށޭ ކިޔާ" ފަދަ އާންމުންގެ މެދުގައި މަޤްބޫލު މަދަހަތައް ހިމެނެއެވެ.