ސަރުކާރުން އިޢުލާންކުރެއްވި ގެދޮރުވެރި ލޯނު، މިއަހަރުގެ ތެރޭގައި ދޫކުރައްވާނެކަމަށް ހައުސިންގ މިނިސްޓަރ ވިދާޅުވެއްޖެއެވެ.
ހައުސިންގ މިނިސްޓަރ ވިދާޅުވީ މާލޭގައި ގޯތި އޮވެ، ގެދޮރު އިމާރާތްކުރުމުގެ މާލީ ދަތިކަން ހުރި ފަރާތްތަކަށް ޚާއްސަކުރައްވައިގެން ސަރުކާރުން އިޢުލާން ކުރެއްވި ގެދޮރުވެރިލުރުވުމުގެ ލޯނު ސްކީމްގެ ދަށުން ވަރަށް އަވަހަށް ލޯނަށް އެދު ހުށަހަޅާ ފޯމް ދޫކުރައްވަން ފަށްޓަވާނެ ކަމަށެވެ. މިނިސްޓަރ ވިދާޅުވީ، މިއަހަރުގެ ބަޖެޓުގައި، ގެދޮރުވެރިކުރުވުމުގެ ލޯނަށް ސަތޭކަ މިލިއަން ރުފިޔާ ކަނޑައަޅުވާފައި އޮތްނަމަވެސް ޢަމާޒަކީ ވީހާވެސް ގިނަ ބަޔަކަށް މި ލޯން ދޫކުރެއްވުން ކަމަށެވެ.
މި ސްކީމްގެ ދަށުން ހައުސިންގ މިނިސްޓްރީން، ހައުސިންގ ޑިވެލޮޕްމެންޓް އެންޑް ފައިނޭންސް ކޯޕަރޭޝަން މެދުވެރިކޮށް ގެދޮރު އިމާރާތް ކުރުމަށްދާ ޚަރަދުގެ 20 އިންސައްތަ ލުއި ލޯނުގެ ގޮތުގައެވެ، މިކަމަށް އެދޭ ފަރާތްތަކަށް ދިނުމަށް ވަނީ ހަމަޖެހިފައެވެ. މި ސްކީމްގެ ދަށުން ލޯން ލިބޭ ފަރާތްތަކަށް ގެދޮރު ޢިމާރާތްކުރުމަށް ފަށްޓަވާ އަދި ޢިމާރާތްކޮށް ނިންމުމަށް 80 އިންސައްތަ ލޯނުގެ ގޮތުގައި އެޗްޑީއެފްސީ މެދުވެރިކޮށް ލިބުމުގެ މަގުފަހި ވެގެންދާނެއެވެ. މި ސްކީމްގެ ދަށުން ނަގާ ފައިސާ ދެއްކުމުގެ އެންމެ ދިގު މުއްދަތަކީ 20 އަހަރެވެ. ލޯންގެ އިންޓަރެސްޓް ރޭޓަކީ ފަހެއް އިންސައްތައެވެ.
ރާއްޖޭގެ އެކި ސަރަޙައްދުތަކުގައި އަމިއްލަ ގޯތިއޮވެމެ، ގެދޮރު ބިނާކުރުމުގެ މާލީ އެހީތެރިކަން ބޭނުންވެފައި ތިބި އެތައް ބަޔަކު އެބަތިއްބެވެ. އަތޮޅުތެރޭގައި ތިބި މިފަދަ ފަރާތްތަކަށް ޙައްލެއްގެ ގޮތުން އިސްލާމިކް ފެސިލިޓީގެ ދަށުން ލޯނު ދޫކުރައްވަން ވަނީ ފަށްޓަވާފައެވެ. އިސްލާމިކް ފެސިލިޓީގެ ފުރަތަމަ ބުރުގައި 109 ފަރާތަކަށް ވަނީ ލޯނު ލިބިފައެވެ.