"މަސައްކަތުގެ މާޙައުލުގައި ތަފާތުކުރުން ނައްތާލުމަށް މަސައްކަތްކުރުމަކީ އެންމެންގެ ވާޖިބެއް"

ތަފާތުކުރުމާއި އަނިޔާވެރިކަމާ ދެކޮޅަށް ކުރިމަތިލައި، އެކަންކަން، މަސައްކަތުގެ މާޙައުލުން ނައްތާލުމަށް މަސައްކަތްކުރުމަކީ، އެންމެންގެ ވާޖިބެއްކަމަށް މަތީ ތަޢުލީމާއި މަސައްކަތްރިކަމާއި ހުނަރު ތަރައްޤީކުރުމާ ބެހޭ ވަޒީރު ޑރ. މަރްޔަމް މާރިޔާ ވިދާޅުވެއްޖެއެވެ.

ވަޒީރު މިހެން ވިދާޅުވީ މިއަދު ފާހަގަކުރާ ބައިނަލްއަޤްވާމީ މަސައްކަތްތެރިންގެ ދުވަހާއި ގުޅިގެން ދެއްވި ޚިޠާބުގައެވެ. މިއަހަރުގެ ޝިޢާރެއްގެގޮތުގައި އިންޓަރނޭޝަނަލް ލޭބަރ އޮގަނައިޒޭޝަނުން، ކަނޑައަޅުއްވާފައިވަނީ ބަދަލުވަމުން އަންނަ މާޙައުލުގައި މަސައްކަތުގެ ރައްކާތެރިކަމާއި ޞިއްހަތުގެ ކަށަވަރުކަމެވެ.

ބައިނަލްއަޤްވާމީ މަސައްކަތްތެރިންގެ ދުވަހާއި ގުޅިގެން ދެއްވި ޚިޠާބުގައި މަތީ ތަޢުލީމާއި މަސައްކަތްރިކަމާއި ހުނަރު ތަރައްޤީކުރުމާ ބެހޭ ވަޒީރު ޑރ. މަރްޔަމް މާރިޔާ ވަނީ ރާއްޖޭގައި ބައިނަލްއަޤްވާމީ މަސައްކަތްތެރިންގެ ދުވަސް ރަސްމީކޮށް ފާހަގަކުރާތާ، މިހާރު 15 އަހަރުވެފައިވާކަން ފާހަގަކުރައްވާފައެވެ. އަދި މަސައްކަތުގެ މާޙައުލުގެ ރައްކާތެރިކަމާއި ސިއްހަތު ކަށަވަރުކުރުމަށް ކުރިއެރުންތަކެއް ލިބިފައިވާކަމަށް ވަޒީރު ވިދާޅުވިއެވެ.

އެގޮތުން، ޤާނޫނީ އޮނިގަނޑުގެ ތެރެއިން މަސައްކަތުގެ މާހައުލުގެ ރައްކާތެރިކަމާއި ޞިއްޙަތު ކަށަވަރުކުރުމުގެ ޙައްޤު މިހާރު ލިބިފައިވާތީ އެކަން ފާހަގަކޮށް، މި ޤާނޫނުގެ ފޮނިމީރުކަން ދިވެހި މަސައްކަތްތެރިންނަށް ވަރަށް އަވަހަށް ލިބިގެންދާނެކަމަށް އެކަމަނާ ވިދާޅުވިއެވެ.

ވަޒީރު ވިދާޅުވީ މަސައްކަތުގެ މާޙައުލާއި އެންމެންނަށް އަބުރުވެރި މަސައްކަތެއް ހޯދުމުގައި ގޮންޖެހުންތައް އެބަހުރި ކަމަށެވެ. ތަފާތުކުރުމާއި، ގަނާކުރުމާއި ނުތަނަވަސްކަމުގެ ހާދިސާތައް ހިނގާއިރު، މަސައްކަތްތެރިންގެ ޙައްޤުގައި، މި ފަދަ ތަފާތުކުރުމާއި އަނިޔާވެރިކަމާ ދެކޮޅަށް ކުރިމަތިލައި، އެކަންކަން، މަސައްކަތުގެ މާޙައުލުން ނައްތާލުމަށް މަސައްކަތް ކުރުމަކީ، އެންމެންގެ ވާޖިބެއްކަމަށް ހަދަން ޖެހޭކަމަށް ވަޒީރު ވިދާޅުވިއެވެ.

ވަޒީރު ޑރ. މާރިޔާ ވިދާޅުވީ މަސައްކަތްތެރިންގެ ދުވަހު، އިންސާފުވެރި އުޖޫރަޔާ، ރައްކާތެރި މަސައްކަތުގެ މާޙައުލާ ދޭތެރޭ ވިސްނަން ޖެހޭ ކަމަށެވެ.

ރާއްޖޭގެ ކޮންމެ މަސައްކަތްތެރިއަކަށްވެސް، އެމީހަކަށް ހައްޤުވާ ކަރާމާތާއި އިޙްތިރާމް ލިބިދިނުމަކީ ސަރުކާރުގެ ވަރައްބޮޑު އަމާޒެއްކަމަށް ވިދާޅުވެ، ވަޒީރުވަނީ މަސައްކަތްތެރިންނަށް ޙައްޤުވާ އިޙްތިރާމް، އޭގެ ފުރިހަމަ މާނާގައި، އެފަރާތްތަކަށް ލިބިދެވޭނެ ގޮތަށް، ސިޔާސަތުތަކާއި އުޞޫލުތައް ބައްޓަންކޮށް، އެކަންކަން، ޢަމަލުން ދެއްކުމަށް އިލްތިމާސްކުރައްވާފައެވެ.

ވަޒީރު ޑރ. މާރިޔާ ވަނީ މަސައްކަތުގެ މާޙައުލު ރަގަނޅުކޮށް، ހަމަހަމަ މަސައްކަތްތެރިންގެ މާރުކޭޓެއް އުފެއްދުމަށް، ކުރާ މަސައްކަތްތައް ދެގުނައަށް އިތުރުކުރުމަށް އެދިވަޑައިގަންނަވާފައެވެ.