ސަރުކާރުން ރައްޔިތުންނަށް ބޯހިޔާވަހިކަން ލިބިދެއްވުމަށް ހިންގަވާ މަޝްރޫއުތަކުގެ ދަށުން ފްލެޓްތައް ދޫކުރެއްވުމުގައި ކޮރަޕްޝަންގެ އެއްވެސް އަމަލެއް ނުހިންގާނެކަމުގެ ޔަޤީންކަން ހައުސިންގ މިނިސްޓަރ ޑރ. މުޙައްމަދު މުޢިއްޒު ދެއްވައިފިއެވެ.
ޕީއެސްއެމް ނިއުސްއަށް ދެއްވި ޚާއްޞަ އިންޓަރވިއުއެއްގައި މިނިސްޓަރ ވިދާޅުވީ، ފްލެޓްތައް ދޫކުރެއްވުމުގައި ކޮރަޕްޝަން އޮންނަކަމަށް ބުނެ، ދެކެވޭ ވާހަކަތަކަކީ ޙަޤީޤތެއް ނޫންކަމަށާއި، މުއައްސަސާތަކުގައި ތިބޭ މީހުން މަސައްކަތްކުރަން ޖެހޭނީ، ތެދުވެރިކަމާއި، އިޚްލާޞްތެރިކަމާއެކު، ޖަވާބުދާރީވެވޭގޮތަށް ކަމަށެވެ. އަދި ހައުސިންގ މިނިސްޓްރީ ތެރެއިން އެފަދަ ކަމަކަށް ފުރުޞަތު ނުދެއްވާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ހައުސިންގ މިނިސްޓްރީގެ ތެރެއިން އެފަދަ ޢަމަލެއް ހިނގާކަމަށް ޝައްކުކުރެވޭނަމަ ސިސްޓަމްގެ ތެރެއިން އެކި ފަރާތްތަކަށް ހުޅަހެޅުއްވުމުގެ ފުރުޞަތު އޮންނާނެ ކަމަށެވެ. އަދި އެފަދަ މައްސަލަތަކުގައި އެއްބާރުލުން ދެއްވާނެ ކަމުގައިވެސް މިނިސްޓަރ ވިދާޅުވިއެވެ.