އަހަރެންގެ ޕްރައިވެސީ ގެއްލިއްޖެ, ބޭނުމީ ކުރީގެ ދިރިއުޅުން- ވޮޒިންހާ
-
ފެންނަ ކޮންމެ ތާކުން ފޮޓޯ ނަގާމީހުން ކިޔުގައި
ވޯލްޑް ކަޕްގައި ލިބުނުނ މަޝްހޫރުކަމާ ގުޅިގެން ޕްރައިވެސީ ގެއްލިއްޖެ ކަމަށާއި, ކުރީގެ ދިރިއުޅުމަށް އެނބުރިދާން ބޭނުންވާ ކަމަށް ކޭޕް ވާޑްގެ ގޯލް ކީޕަރު ވޮޒިންހާ ބުނެފިއެވެ.
ވޯލްޑް ކަޕްގެ ކުރިން ގައުމުގެ މީހުން ފިޔަވާ ވޮޒިންހާ ދަންނަ މީހަކު ނެތެވެ. އެކަމަކު ވޯލްޑް ކަޕްގައި ކޭޕް ވާޑް ކުޅުނު ފުރަތަމަ މެޗުގައި އެމުބާރާތުގެ ޗެމްޕިއަން ސްޕެއިންއާ ލަނޑެއް ނުޖެހި އެއްވަރުވި މެޗާއެކު ވޮޒިންހާ ވަރަށް ބޮޑަށް މަގްބޫލުވެ, ދުނިޔޭގެ ތަރިއަކަށް ވިއެވެ. އެއީ އެމެޗުގައި ސްޕެއިން ހިފަހައްޓަން އޭނާ މަތަކުރި ބޯޅަތަކުގެ ސަބަބުންނެވެ. އަދި އޭގެ ފަހުންވެސް މުބާރާތުގައި ދެއްކި މޮޅު ކުޅުމުގެ ސަބަބުންނެވެ.
ވޯލްޑް ކަޕްގައި ސްޕެއިން މެޗަށް ނިކުއިންއިރު ވޮޒިންހާގެ އިންސްޓަގްރާމް ފޮލޯވާސްގެ އަދަދަކީ ބައިލައްކަ އެވެ. އެކަމަކު ސްޕެއިން ހިފެހެއްޓި މެޗަށްފަހު އެއަދަދު 28.4 މިލިއަނަށް އެރިއެވެ. 40 އަހަރުގެ ވޮޒިންހާ ވޯލްޑްކަޕް ތެރޭގައި ބުނީ އަދި ދެ އަހަރެއް ވަރު މަތީ ފަންތީގައި ބޯޅަ ކުޅެން ބޭނުންވާ ކަމަށާއި, ރަނގަޅު ފުރުޞަތަކަށް ބަލަމުންދާ ކަމަށެވެ. ވޯލްޑްކަޕަށްފަހު ވޮޒިންހާ ގުޅުނީ ޗިލީގެ ޓޮޕް ކްލަބެއް ކަމަށްވާ ކޯލޯ ކޯލޯއާއެވެ.
ދުނިޔޭގެ މީޑިޔާއިންވެސް ވޮޒިންހާގެ ފިޔަވަޅުތަކަށް ދަނީ ފާރަލަމުންނެވެ. އޭގެއިތުރުން އޭނާ ތަރިއަކަށް ބަދަލުވުމުން, ކޮންމެ ތަނަކުން އޭނާއާއެކު ފޮޓޯ ނަގަން ބޭނުންވާ މީހުންނާއި, އޮޓޯގްރާފް ހޯދަން ބޭނުންވާ މީހުންގެ އަދަދު އިންތިހާއަށް ގިނަވެފައިވާކަން ވޮޒިންހާ ފާހަގަކުރިއެވެ. މީގެއިތުރުން އޭނާ ފެނުމުން ވީޑިއޯ އާއި ފޮޓޯ ނަގާ މީހުންގެ އަދަދު އިތުރުވެ, ވޮޒިންހާ ބުނީ އޭނާގެ ޕްރައިވެސީ މުޅިން ގެއްލިއްޖެ ކަމަށެވެ. އަދި އޭނާއަށް ލިބުނު މަޝްހޫރުކަމާއެކު އޭނާގެ މަންމައާއި ބައްޕަގެ ޕްރައިވެސީއަށްވެސް އަސަރުކޮށްފައިވާކަން ފާހަގަކުރިއެވެ.
"އަހަރެންގެ ޕްރައިވެސީ ގެއްލިއްޖެ, ހަމަޖެހުމާއި ސްޓްރެސް ފްރީ ދިރިއުޅުން ގެއްލިއްޖެ. އަހަރެން ބޭރަށްދާ ކޮންމެ ފަހަރަކު އަހަރެންނާއެކު ފޮޓޯ ނަގަން ބޭނުންވާ, އޮޓޯގްރާފް ހޯދަން ބޭނުންވާ ކޮންމެސް ބަޔަކު ތިބޭ. މިހާރު އަހަރެންނަށް އަހަރެންގެ ކުރީގެ ދިރިއުޅުމާއި މިދިރިއުޅުމުގެ ތެރެއިން ދިރިއުޅުމެއް އިހުތިޔާރު ކުރަން ލިބިއްޖެނަމަ ޔަގީނުންވެސް އަހަރެން އިހުތިޔާރު ކުރާނީ ކުރީގެ ދިރިއުޅުން.ވޮޒިންހާ
ވޮޒިންހާ ބުނީ ގިނަ މީހުން މަޝްހޫރުކަމާއި, ޕަބްލިސިޓީ ބޭނުންވާ ކަމަށާއި, އެކަމަކު އެމީހުންނަށް ފެންނަނީ އެކަމުގައި ހުރި ރަނގަޅު ކަންތައްތައް ނުވަތަ ރަނގަޅު ފަރާތް ކަމަށެވެ. ވޮޒިންހާ ވަނީ ވޯލްޑްކަޕަށް ކޮލިފައިވި އެންމެ އާބާދީ މަދު ދެވަނަ ގައުމާއެކު ސްޕެއިންގެ އިތުރުން އުރުގުއޭ އާއި ސައުދީ އެރެބިޔާވެސް ހުއްޓުވާފައެވެ. މުބާރާތުގެ ނޮކްއައުޓް ބުރަށް ދަތުރުކުރިއެވެ. ގަދަ 32 ޓީމްގެ ބުރުގައި ކެޓީ އިތުރު ވަގުތުވެސް ކުޅެ, އާޖެންޓީނާ އަތުން ބަލިވެގެންނެވެ.
ވޮޒިންހާ ވަނީ ބެލޮންޑިއޯ އެވޯޑް ހަފްލާގައި ހޮވާ އެންމެ މޮޅު ކީޕަރުގެ އެވޯޑަށްވެސް ނޮމިނޭޓް ވެފައެވެ.