"ފްރާންސް ކައިރިން ރަނގަޅު ނަތީޖާއެއް ހޯދޭނީ ވަރަށް ރަނގަޅަށް ކުޅެގެން،ނެދަލެންޑްސްގެ ކޯޗު، ރޮނަލްޑް ކޫމަން
ޔޫރޯ 2024 ގެ ގްރޫޕް ޑީގައި މިރޭ ފްރާންސާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން، އިއްޔެ ބޭއްވި ނޫސްވެރިންގެ ބައްދަލުވުމުގައި ނެދަލެންޑްސްގެ ކޯޗު، ރޮނަލްޑް ކޫމަން ބުނީ، ހިތްވަރާއެކު ރަނގަޅަށް ކުޅެގެން ފްރާންސް ބަލިކުރެވިދާނެ ކަމަށެވެ.
ކޫމަން ވަނީ، މެޗުގައި ބޭނުންކުރާނެ ކުޅުންތެރިން ކަނޑައަޅާނީ ގޭމްޕްލޭންއާ އެއްގޮތްވާގޮތުގެ މަތީން ކަމަށް ބުނެފައެވެ. އެންމެ މުހިއްމީ އެކަންތައް ކަމަށް ކޫމަން ބުންޏެވެ.
ކޫމަން ބުނީ، ޕޮލެންޑް މެޗުން ދަސްވި ފިލާވަޅަކީ، މެޗެއްގެ 60 ވަނަ މިނެޓާ ހަމައިން ފަސޭހަކޮށްލައިގެން ނުވާނެ ކަމާއި، 90 މިނެޓު ވަންދެން އެންމެ މަތީ ލެވެލްގައި ކުޅެން ޖެހޭނެކަމުގައި ކަމަށެވެ. އަދި ބޯޅަ ގެއްލިއްޖެނަމަ ފަހުން ވާނެ ގޮތަކާ މެދު ވިސްނައިގެން ތިބެންޖެހޭނެ ކަން އަބަދުވެސް ހަނދާނުގައި ބަހައްޓަންޖެހޭނެ ކަމަށް ވެސް ކޫމަން ފާހަގަކުރިއެވެ.
ކޫމަން ދެއްކި ވާހަކައިގައި ވަނީ، ގްރޫޕު ސްޓޭޖުގެ ފުރަތަމަ މެޗުން މޮޅުވެ، ހަމަޖެހުމާއެކު އިތުބާރު ލިބިފައިވާކަން ފާހަގަކޮށް، ދެން އޮތް މެޗުގައި ފްރާންސާ ދެކޮޅަށް ވެސް އެ ހުރިހާ ކަމެއް ބޭނުންވާނެ ކަމަށާއި، އެ ނޫން ގޮތަކަށް އެ ޓީމު ކައިރިން ހިތްހަމަޖެހޭ ފަދަ ނަތީޖާއެއް ނުހޯދޭނެ ކަމަށް ބުނެފައެވެ. މީގެއިތުރުން، ކޫމަން ވަނީ، އޭނާ އަބަދުވެސް މަސައްކަތްކުރަނީ ކޮންމެ މެޗެއްގައި އެންމެ ފުރިހަމައަށް ސްކޮޑުގެ ބޭނުންހިފުމަށް ކަމަށް ބުނެފައެވެ.
ނިންމާލަމުން ކޫމަން ބުނީ، އޭނާގެ ޓީމުގައި މެޗު ފަށަން ހާއްސަ ކުޅުންތެރިންނާއި، ނިންމާލަން ބޭނުންވާނަމަ އެކަމަށް ބޭނުންކުރެވޭނެ ކުޅުންތެރިން އެބަތިބި ކަމަށެވެ. އަދި، ކޫމަން ވަނީ ފްރާންސް މެޗުގައި އޭނާގެ ޕްލޭންގެ ތެރެއަށް ވައުޓް ވެގްހޯސްޓް ފިޓްވާނެގޮތް ފެނިގެންދާނެ ކަމަށް ވެސް ބުނެފައެވެ.
ނެދަލެންޑްސްގެ ޑިފެންޑަރު، ނޭތަން އަކޭ ބުނީ، ފްރާންސްގެ ފޯވާޑްލައިންގައި ވަރަށް ހަލުވި ކުޅުންތެރިން އެބަތިބި ކަމަށާއި، އެހެންކަމުން އެޓޭކުތަކަށް ކުރިއަށްދިއުމުގަ އާއި ޑިފެންސްކުރުމުގައި ވަރަށް ވިސްނަންޖެހޭނެ ކަމަށެވެ. އަދި ހަމައެކަނި ޑިފެންސްކުރުމަކުން ނުފުދޭނެ ކަމަށާއި، އެޓޭކްވެސް ކުރަންޖެހޭނެ ކަމަށް އަކޭ ބުންޏެވެ.
މުބާރާތުގައި ފްރާންސާ ނެދަލެންޑްސް ބައްދަލުކުރުމަށް ހަމަޖެހިފައިވާ މި މެޗު ފަށާނީ ރާއްޖޭގަޑިން މިރޭ 12 ޖަހާއިރު އެވެ.