"އަހަރެމެން މިދަނީ ކުރިއެރުން ހޯދަމުން، އަމާޒަށް ވާސިލްވަމުން،ސްޕެއިނުގެ ކޯޗު، ލުއިސް ޑި ލާ ފުއެންޓޭ
ޔޫރޯ 2024 ގެ ގްރޫޕް ބީ ގައި މިރޭ އަލްބޭނިއާ އާ ދެކޮޅަށް ކުޅޭ މެޗުގެ ކުރީން، ސްޕެއިނުގެ ކޯޗު، ލުއިސް ޑެ ލަ ފުއެންޓޭ ބުނީ، އެހެން މެޗުތަކަކޭ އެއްފަދައިން އެ ޓީމުން ކޮންމެ މެޗަކަށް ވެސް ނިކުންނަނީ އެއީ އެންމެ ފަހު މެޗު ކަމަށް ދެކިގެން ކަމަށެވެ.
ފުއެންޓޭ މިހެން ބުނީ، މެޗުގެ ކުރީން އިއްޔެ ބޭއްވި ނޫސްވެރިންގެ ބައްދަލުވުމުގައެވެ.
އެގޮތުން، ފުއެންޓޭ ވަނީ، އަލްބޭނިއާ މެޗަށް ވެސް ނިކުންނާނީ ކުޅުންތެރިންނަށް ވަކި ގޭމްޕްލޭންއަކާ އެކު ކަމަށާއި، މެޗު ކާމިޔާބުކުރުން ނޫން ވިސްނުމެއް ނުގެންގުޅޭ ކަމަށް ބުނެފައެވެ.
ފުރަތަމަ ދެ މެޗެކޭ އެއްގޮތަށް އަލްބޭނިއާ އާ ދެކޮޅަށް ވެސް އެޓޭކިން ފުޓްބޯޅަ ކުޅެން ބޭނުންވާކަމަށް ފުއެންޓޭ ބުންޏެވެ.
މިވަރުގެ މެޗަކަށް ޕްލޭންކުރަންވާނީ ފުރިހަމަ އަށް ފޯކަސްކޮށްގެން ކަމަށާއި، މެޗު ކާމިޔާބުކުރުން ނޫން ވިސްނުމެއް ނުގެންގުޅޭ ކަމަށް ވެސް ފުއެންޓޭ ބުނެފައިވެއެވެ. އޭނާ ބޭނުންވަނީ ހުރިހާ މެޗެއް ކާމިޔާބުކުރަން ކަމަށް ވެސް ފުއެންޓޭ ވަނީ ބުނެފައެވެ.
އަލްބޭނިއާ އާ ދެކޮޅަށް ނިކުންނައިރު އޭނާ ވަރަށް ބޮޑަށް ހަމަޖެހިލައިގެން ހުރިނަމަވެސް އޭނާގެ ޓީމުން ރަނގަޅުކުރަންޖެހޭ ކަންތައްތައް އަދިވެސް އެބަހުރިކަން އެނގޭކަމަށް ފުއެންޓޭ ބުންޏެވެ. އަދި އޭނާ ވަނީ މެޗަކަށްފަހު، މެޗެއް ސްޕެއިނުން ރަނގަޅަށް ކުޅެމުން އަންނަކަން ފާހަގަކޮށްފައެވެ.
ސްޕެއިން ޓީމާ ގުޅޭގޮތުން ފުއެންޓޭ ބުނީ، އޭނާ ބޭނުންވަނީ ވާދަވެރި ޓީމަކަށްވެ، އިދިކޮޅު ޓީމު ބަލިކޮށް މެޗެއްގެ އެކި ހާލަތްތަކަށް އެންމެ ރަނގަޅަށް ހޭނެން ކަމަށެވެ. އަދި އޭނާގެ ޓީމަށް އެކި ގޮތްގޮތަށް ކުޅެވޭނެ ކަމަށާއި، އެހެންވެ އޮޕްޝަންތައް އިތުރުވެ، ޓީމުތަކަށް ލަފާނުކުރެވޭ މިންވަރަށް ތަފާތު ދެއްކޭނެ ކަމަށް ވެސް ފުއެންޓޭ ވަނީ ބުނެފައެވެ. މީގެއިތުރުން، ފުއެންޓޭ ވަނީ، އޭނާގެ ޓީމަށް ފުރިހަމަ އިތުބާރާއެކު ވަރަށް ބޮޑު އުއްމީދެއް ލިބިފައިވާ ކަމަށް ވެސް ބުނެފައެވެ.
އަލްބޭނިއާގެ ކިބައިން ސެޓްޕީސްތަކުގައި ކުރިމަތިވާނެ ނުރައްކަލާ ގުޅޭގޮތުން ފުއެންޓޭ ވަނީ، ސެޓްޕީސްތަކުގައި އެ ޓީމު ވަރަށް ވަރުގަދަ ކަމަށާއި، ކޮންމެ ޓީމަކަށް ވެސް ސެޓްޕީސްތަކުގައި ނުރައްކާ ކުރެވޭނެ ކަމަށެވެ. އެކަމަކު، އޭނާގެ ޓީމުން ވެސް ސެޓްޕީސްތައް ޑިފެންސްކުރުމުގަ އާއި އޭގެ ބޭނުންހިފައި ލަނޑުޖެހުމުގެ ހުރި ގާބިލްކަން ސާބިތުކޮށްދީފައިވާ ކަމަށް ފުއެންޓޭ ބުންޏެވެ.
ފުއެންޓޭ ބުނީ، މެޗެއްގެ ނަތީޖާ ކަނޑައެޅުމުގައި އެންމެ ކުދި ކުދި ކަންތައްތަކުގެ ތަފްޞީލު ވެސް މުހިއްމުވާ ކަމަށާއި، އޭގެއިން ވެސް ނަތީޖާ ބަދަލުކޮށްލުމުގެ ފުރުޞަތު ބޮޑުކަމަށެވެ.
އެހެންކަމުން، އޭނާގެ ޓީމުން ބޭނުންވަނީ އެކަންތައް ކޮންޓްރޯލް ކުރުމަށް ކަމަށާއި، ސެޓްޕީސް އަކުން ހައިރާންކަން ލިބޭކަށް ބޭނުމެއް ނުވާ ކަމަށް ވެސް ފުއެންޓޭ ވަނީ ބުނެފައެވެ.
މުބާރާތުގެ ގްރޫޕް ސްޓޭޖުގައި ސްޕެއިނާ އަލްބޭނިއާ ބައްދަލުކުރުމަށް ހަމަޖެހިފައިވާ މި މެޗު ފަށާނީ ރާއްޖޭގަޑިން މިރޭ 12 ޖަހާއިރު އެވެ.