"ފުރަތަމަ މެޗުގައި އަހަރެންގެ މަސައްކަތަކަށްވީ ޑިފެންސަށް ރައްކާތެރިކަން ދިނުން. ދެން ކުޅުނު މެޗުގައި ޗުއަމެނީ އެންމެ ފަހަތަށް ކުޅުމުން، އަހަރެންނަށް ޕްލޭމޭކިންގ ރޯލެއް ކުޅުމަށް ފަސޭހަވި.ފްރާންސްގެ މިޑްފީލްޑަރު، އެންގޯލޯ ކާންޓޭ
ޔޫރޯ 2024 ގްރޫޕް ޑީ ގައި މިރޭ ޕޮލެންޑާ ދެކޮޅަށް ނިކުތުމުގެ ކުރީން ފްރާންސްގެ ކޯޗު، ޑިޑިއޭ ޑެޝޯމްޕްސް ވަނީ، މިވަގުތަށް އެންމެ މުހިއްމީ ގްރޫޕުން އެންމެ ރަނގަޅު މަގާމު ހާސިލްކޮށް، ކޮލިފައިވުން ކަމަށް ބުނެފައެވެ.
ޑެޝޯމްޕްސް މިހެން ބުނީ، މެޗުގެ ކުރީން އިއްޔެ ބޭއްވި ނޫސްވެރިންގެ ބައްދަލުވުމުގައެވެ.
މެޗުގެ ކުރިން ދެއްކި ވާހަކައިގައި ޑެޝޯމްޕްސް ބުނީ، ކޮންމެ މެޗެއް އެނަލައިޒް ކުރާ ކަމަށާއި، ކޮންމެ މެޗެއްގައި ކުޅެނީ ތަފާތު ޓީމަކާ ދެކޮޅަށް ކަމަށެވެ. އަދި އެންމެ ފަހުން ކުޅުނު މެޗަށްފަހު މިވީ ހަތަރު ދުވަހުގެ ތެރޭގައި ގްރޫޕުގެ ފަހު މެޗަށްޓަކައި މިހާތަނަށް ހެދިފައިވާ ގޯސްތައް ރަނގަޅުކޮށް، ވަރަށް ރަނގަޅަށް ތައްޔާރުވެފައިވާ ކަމަށް ޑެޝޯމްޕްސް ބުންޏެވެ.
ޑެޝޯމްޕްސް ވަނީ، އިދިކޮޅު ޓީމަށް އަބަދުވެސް ދޭންވާ ފުރިހަމަ އިހުތިރާމް ދޭނެ ކަމަށާއި، އަދި އޭނާ ގަބޫލުކުރާ ގޮތުގައި ޕޮލެންޑުން ނިކުންނާނީ ފްރާންސް ޓީމުގެ މައްޗަށް ކުރިހޯދުމަށް ކަމަށް ވެސް ބުނެފައެވެ. މިއީ އެންމެ މަތީ ލެވެލްގެ ފުޓްބޯޅަ ކަމަށްވުމާއެކު ޕޮލެންޑުން މުބާރާތް ނިންމާލައިގެން ތިބެ، އެ ވިސްނުމުގައި ފްރާންސާ ދެކޮޅަށް ނުނިކުންނާނެ ކަމަށް ވެސް ޑެޝޯމްޕްސްގެ ވާހަކައިގައި ފާހަގަކުރިއެވެ.
ފްރާންސްގެ މިޑްފީލްޑަރު، އެންގޯލޯ ކާންޓޭ ބުނީ، އެ ޓީމުގެ ހުރިހާ ކުޅުންތެރިންވެސް ތިބީ ރަނގަޅު މޫޑެއްގައި ކަމަށާއި، އަދި މިހާތަނަށް ރަނގަޅު ދެ މެޗު ކުޅެފައިވާ ކަމަށެވެ. ދެން އޮތް ތިން ވަނަ މެޗު ކުރިމަތީގައި އޮތްއިރު އެންމެ ބޮޑު ސަމާލުކަމެއްދޭނީ ގްރޫޕުގެ އެއްވަނަ ޓީމުގެ ގޮތުގައި އަނެއް ބުރަށް ކޮލިފައިވުމަށް ކަމަށް އެންގޯލޯ ކާންޓޭ ވަނީ ބުނެފައެވެ.
ކާންޓޭ ވަނީ، ފްރާންސް ޓީމުގެ ހުރިހާ ކުޅުންތެރިން ވެސް އަރާމުކުރުމަށް ފަހު މިހާރު ހުރިހާ ވިސްނުމެއް ހުރީ ޕޮލެންޑާ ދެކޮޅަށް ކުޅުމަށް ހަމަޖެހިފައިވާ މެޗަށް ކަމަށް ބުނެފައެވެ.
ފްރާންސްގެ ޖާޒީގައި އަލުން މުބާރާތެއްގައި ކުޅެވޭތީވެ، ވަރަށް އުފާވާ ކަމަށާއި، މިއީ ގްރޫޕް ސްޓޭޖު ކަމަށްވުމުން ލިބެމުންދާ ތައުރީފަށް މާބޮޑު ސަމާލުކަމެއްނުދީ ބުރަކޮށް މަސައްކަތްކުރަންޖެހޭ ކަމަށް ވެސް ކާންޓޭ ބުނެފައިވެއެވެ.
މުބާރާތުގައި ފްރާންސާއި ޕޮލެންޑް ބައްދަލުކުރާ މެޗު ފެށުމަށް ހަމަޖެހިފައިވަނީ މިރޭ ރާއްޖޭގަޑިން 9 ޖަހާއިރު އެވެ.