އިސްލާމީ ކަންތައްތަކާ ބެހޭ ވުޒާރާގެ އީ-ލައިބްރަރީއަށް ފޮތް ހަދިޔާކުރަން އެދިއްޖެ

އިސްލާމީ ކަންތައްތަކާބެހޭ ވުޒާރާގެ ވެބްސައިޓުގައި ހިމެނޭ އޮންލައިން-ބުކް ލައިބްރަރީއަށް ފޮތް ހަދިޔާކުރުމަށް ލިޔުންތެރިންގެ ކިބައިން ވަޒީރު ޑރ. މުޙައްމަދު ޝަހީމް ޢަލީ ސަޢީދު އެދިވަޑައިގެންފިއެވެ.

މިދިޔަ ހުކުރު ދުވަހު ލޯންޗުކުރި އިސްލާމީ ކަންތައްތަކާ ބެހޭ ވުޒާރާގެ އައު ވެބްސައިޓުގައި އޮންލައިން ލައިބްރަރީއެއް ހިމެނެއެވެ. މި ލައިބްރަރީގައި 2008 ވަނަ އަހަރުން ފެށިގެން އެ ވުޒާރާއިން ނެރެފައިވާ ފޮތްތައް އޮންލައިންކޮށް ކިޔައިލެވެއެވެ.

އެކްސްގައި ކުރެއްވި ޕޯސްޓެއްގައި އިސްލާމީ ކަންތައްތަކާ ބެހޭ ޑރ. ޝަހީމް ވިދާޅުވީ އަމާޒަކީ އިސްލާމީ އަދި ތަފާތު ދާއިރާތަކުން ވީހާވެސް ގިނަ އަދަދެއްގެ ފޮތްތައް، ވުޒާރާގެ އީ-ލައިބްރަރީން ކިޔޭނެ ގޮތް ހެދުން ކަމަށެވެ. އަދި ހުރިހާ ޢިލްމުވެރިންނާއި ލިޔުންތެރިން، އީ-ލައިބްރަރީއަށް ފޮތް ހަދިޔާކުރެއްވުމަށް ޕޯސްޓުގައި ވަޒީރު ވަނީ އެދިވަޑައިގެންފައެވެ.

އަޅުގަނޑުމެންގެ އަމާޒަކީ އިސްލާމީ އަދި ތަފާތު ދާއިރާތަކުން ވީހާ ވެސް ގިނަ އަދަދެއްގެ ފޮތްތައް އޮންލައިންކޮށް ލިބޭ ގޮތް ހެދުން.އަޅުގަނޑު އެދެނީ އިލްމުވެރިންނާއި މުޞައްނިފުން ފޮތް ހަދިޔާކުރެއްވުން.https://t.co/yugtvmK9Ak

— Mohamed Shaheem Ali Saeed (@Mohamedshaheem1) July 28, 2024

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، އެ ވުޒާރާއަށް ގުޅައިގެން އޮންލައިން ލައިބްރަރީއަށް ފޮތް ހަދިޔާ ކުރެވޭނެއެވެ.

އިސްލާމީ ކަންތައްތަކާ ބެހޭ ވުޒާރާގެ އޮންލައިން ލައިބްރަރީގައި މަޝްހޫރު ދީނީ ފޮތްތައްކަމަށްވާ ރިޔާޟުއްޞާލިޙީން އަދި ފިޤުހުއްސުންނާ ފަދަ ފޮތްތަކުގެ ދިވެހި ތަރުޖަމާ ހިމެނެއެވެ. މީގެ އިތުރުން އިސްލާމީ ޢަޤީދާއާއި، ފިޤުހާއި، ކީރިތި ރަސޫލާގެ ސުންނަތާއި، ހިދާޔަތުގެ އަލި މަޖައްލާ ފަދަ ފޮތްތަކާއި މަޖައްލާތައް މި ލައިބްރަރީގައި އޮންލައިންކޮށް ކިޔެން ހުރެއެވެ.

އިސްލާމީ ކަންތައްތަކާ ބެހޭ ވުޒާރާގައި، އެތަނަށް ގޮސްވެސް ފޮތްކިޔޭނެފަދަ ލައިބްރަރީއެއް ޤާއިމްކޮށްފައިހުރެއެވެ. ނަމަވެސް އެ ލައިބްރަރީ މިވަގުތު ހުރީ ބަންދުކޮށްފައެވެ.