ޕެރިހުގައި މިހާރު ކުރިއަށްދާ އޮލިމްޕިކްސްގެ ފިރިހެނުންގެ ބާސްކެޓް ބޯޅަ އިވެންޓްގައި ރޭ ބްރެޒިލް ބަލިކޮށް، ފޭވަރިޓުން ކަމަށްވާ އެމެރިކާ އިން ސެމީ ފައިނަލަށް ދަތުރުކޮށްފިއެވެ.
ސެމީގައި އެމެރިކާ ނިކުންނާނީ ސާބިއާ އާ ދެކޮޅަށެވެ. އަނެއް ސެމީގައި ފްރާންސް ބައްދަލުކުރާނީ ޖަރުމަނާ އެވެ.
އެމެރިކާ އިން ރޭގެ މެޗު ކާމިޔާބުކުރީ 122-87 އިންނެވެ. މި މެޗުގައި އެމެރިކާ އަށް އެންމެ ގިނަ ޕޮއިންޓް އެއްކޮށްދިނީ ޑެވިން ބޫކާ އާއި އެންތަނީ އެޑްވާޑްސް އެވެ. ބޫކާ ވަނީ 18 ޕޮއިންޓް އެއްކޮށްފައެވެ. އެޑްވާޑްސް 17 ޕޮއިންޓް އެއްކުރިއިރު، ދެން އެންމެ ރަނގަޅަށް ކުޅުނު ޖޮއެލް އެމްބީޑް ވަނީ 14 ޕޮއިންޓާއެކު ހަތް ރީބައުންޑް ނަގައިފައެވެ. އެ ޓީމުގެ އެންތަނީ ޑޭވިސް ވަނީ 13 ޕޮއިންޓާއެކު 8 ރީބައުންޑް ނަގައިފައެވެ.
އެމެރިކާގެ ޓީމުގައި ހިމެނޭ އެންމެ މުހިއްމު ކުޅުންތެރިޔާ ކަމަށްވާ، ލެބްރަން ޖޭމްސް އަށް އަނިޔާވެގެން ތިންވަނަ ކުއާޓާގައި ވަނީ ބަދަލުކޮށްފައެވެ. އެއީ، ބްރެޒިލްގެ ޖޯޖީނިއޯ ޑެ ޕޯލާގެ އުޅަނބޮށިން މޫނުމަތީގައި ޖެހި ލިބުނު އަނިޔާއަކާ ގުޅިގެންނެވެ. އެހެންނަމަވެސް، މެޗަށްފަހު ލެބްރަން ވަނީ އަނިޔާ ސީރިއަސް ނޫން ކަމަށް ބުނެފައެވެ. ލެބްރަން ވަނީ ރޭގެ މެޗުގައި 12 ޕޮއިންޓާއެކު ނުވަ އެސިސްޓް ހަދައިފައެވެ.
މީގެއިތުރުން، ރޭގެ މެޗުގައި އެމެރިކާގެ ކެވިން ޑުރާންޓް ވަނީ އެއްކުރި 11 ޕޮއިންޓާއެކު އޮލިމްޕިކްސްގެ ތާރީޚުގައި މިހާތަނަށް އެންމެ ގިނަ ޕޮއިންޓް އެއްކުރި ކުޅުންތެރިޔާގެ ރެކޯޑް ގާއިމްކޮށްފައެވެ. އޭނާ ވަނީ މިހާތަނަށް އޮލިމްޕިކްސްގައި އެމެރިކާ އަށް 494 ޕޮއިންޓް އެއްކޮށްދީފައެވެ.
ބާސްކެޓްގައި ރޭ ކުޅުނު ކުއާޓާ ފައިނަލްގެ އެހެން މެޗުތަކުގެ ނަތީޖާއަށް ބަލާއިރު، ގޭމްސްގެ ހޯސްޓް ފްރާންސުން ވަނީ 82-73 އިން ކެނެޑާ ބަލިކޮށްފައެވެ. ޖަރުމަނުން ވަނީ 76-63 އިން ގްރީސް އަތުން މޮޅުވެފައެވެ.
ފޯރިގަދަވި ސާބިއާ އާ އޮސްޓްރޭލިއާގެ ކުރިމަތިލުމުގައި ހަތަރުވަނަ ކުއާޓާ ނިމުނުއިރު ދެ ޓީމު 92-92 އިން އެއްވަރުވުމުން، އޯވާޓައިމްގައި 13-8 އިން ކުރިހޯދީ ސާބިއާ އެވެ.