ރާއްޖޭގެ، ފަސް މިލިޔަން ގަސް ޕްރޮގްރާމަށް އެއްބާރުލުންދެއްވުމަށް އިންޑިއާގެ ޚާރިޖީ ވަޒީރު ގަސް އިންދަވައިފި
ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ސަރުކާރުން ފަށާފައިވާ 5 މިލިއަން ގަސް އިންދުމުގެ ޕްރޮގްރާމަށް އެއްބާރުލުން ދެއްވުމަށް އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑރ. ސުބްރަމާނިއަމް ޖަޔަޝަންކަރު ގަހެއް އިންދަވައިދެއްވައިފިއެވެ.
5 މިލިއަން ގަސް އިންދުމުގެ ޕްރޮގްރާމުގައި ބައިވެރިވެވަޑައިގެން އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑޮކްޓަރ ސުބްރަމާނިއަމް ޖަޔަޝަންކަރާއި ރާއްޖޭގެ ޚާރިޖީ ވަޒީރު މޫސާ ޒަމީރު، ލޮނުޒިޔާރަތް ޕާކުގައި އިންދަވައިދެއްވީ ކާމަރަނގަ ގަހެކެވެ.
މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާއިން އެކްސްގައި ކުރެއްވި ޕޯސްޓެއްގައި ވިދާޅުވީ ދެ ވަޒީރުން ގުޅިގެން ގަސް އިންދާފައިވަނީ އިންޑިޔާ ސަރުކާރުން ކުރިއަށްގެންދާ "ޕްލާންޓް ފޮ މަދަރ" ޕްރޮގުރާމުގެ ރަމްޒެއްގެވެސް ގޮތުންކަމަށެވެ.
Foreign Minister @MoosaZameer and India's MEA @DrSJaishankar jointly planted a Carambola (Star Fruit) tree at #LonuziyaaraiyPark, supporting the Maldives' #5MillionTree Project and India's #Plant4Mother initiative symbolizing the enduring friendship between the Maldives and India pic.twitter.com/muLkAxkGlp
— Min. of Climate Change, Environment and Energy (@MoEnvmv) August 10, 2024
އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑރ. ސުބްރަމާނިއަމް ޖަޔަޝަންކަރު މިމަހުގެ 9 އިން 11 އަށް ރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގައި މިއަދު ވަނީ ރައީސުލްޖުމްހޫރިއްޔާގެ އަރިހަށް އިޙްތިރާމުގެ ޒިޔާރަތެއް ކުރައްވާފައެވެ. އަދި އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ރާއްޖޭގައި ކުރިއަށްގެންގޮސްފައިވާ ފެނާއި ނަރުދަމާ ނިޒާމު ގާއިމުކުރުމުގެ 28 މަޝްރޫޢެއް ނިންމައި ވަނީ ދިވެހި ސަރުކާރާ ހަވާލުކުރައްވާފައެވެ.