ޢައްޒާގެ ސްކޫލަށް ދިން ހަމަލާއަކީ ޔަހޫދީން ހިންގި ޤަތުލްޢާއްމެއް: ދިވެހި ސަރުކާރު
-
ޔަހޫދީ އިޒްރޭލުން ދިން ހަމަލާގައި 100 އަށްވުރެ ގިނަ މީހުން ޝަހީދުކޮށްލި
-
މި ހަމަލާއަކީ ނަސްލު ނައްތާލުމުގެ ޢަމަލެއް ކަމަށް ދިވެހި ސަރުކާރުން ސިފަކުރޭ
ހައްދުފަހަނައަޅާފައިވާ ޔަހޫދީން ޢައްޒާގެ ތަބިޢީން ސްކޫލަށް ދިން ނުރައްކާތެރި ހަމަލާ ދިވެހި ސަރުކާރުން ކުށްވެރިކޮށްފިއެވެ.
ފަލަސްތީނުގެ އެތައް ހާސް ރެފިއުޖީންނެއް ވަގުތީ ހިޔަލެއްގެ ގޮތުގައި ބޭނުން ކުރަމުންދިޔަ ތަބިޢީން ސްކޫލަށް ޔަހޫދީން ދިން ހަމަލާގައި ސަތޭކައަށްވުރެ ގިނަ މީހުން ވަނީ މަރުވެފައެވެ. މި ހަމަލާ ދީފައިވަނީ ގިނަ ޢަދަދެއްގެ ބަޔަކު ފަތިސް ނަމާދުގެ ޖަމާޢަތުގައި ބައިވެރިވެ, ނަމާދު ކުރަމުން ދިޔަ ވަގުތުގައެވެ.
ޚާރިޖީ ވުޒާރާއިން މި ހަމަލާ ކުށްވެރިކޮށް ނެރުނު ނޫސްބަޔާނުގައި ވިދާޅުވީ، ޢައްޒާގެ ތަބިޢީން ސްކޫލަށް ދިން ހަމަލާއަކީ ޔަހޫދީން ހިންގި ޤަތުލްޢާމެއް ކަމަށެވެ. އަދި މިއީ އެ ސްކޫލުގައި ހިޔަވާހިކަން ހޯދަމުން ދިޔަ ފަލަސްޠީނު ރައްޔިތުންނާއި ދެކޮޅަށް ހިންގި ނަސްލު ނައްތާލުމުގެ ޢަމަލެއްކަމަށްވެސް ބަޔާނުގައިވެއެވެ.
ޚާރިޖީ ވުޒާރާގެ ބަޔާނުގައި މި ޢަމަލަކީ ބައިނަލްއަޤްވާމީ ޤާނޫނުތަކާއި، ބައިނަލްއަޤްވާމީ އިންސާނީ ހައްޤުތަކުގެ ޤާނޫނު އަދި އ.ދގެ ސެކިއުރިޓީ ކައުންސިލުގެ 2610 ވަނަ ޤާރާރާއިވެސް ޚިލާފު ކަމެއްކަން ފާހަގަކޮށްފައިވެއެވެ. އަދި ފަލަސްޠީނުގެ ކުށެއް ނެތް އާންމު ރައްޔިތުންނަށް ދެމުންދާ މިފަދަ ހަމަލާތައް ހުއްޓުވުމަށް ބައިނަލްއަޤްވާމީ މުޖްތަމަޢުއިން އެކުގައި މަސައްކަތްކޮށް، ޢައްޒާގެ މައްސަލައަށް ދެމެހެއްޓެނިވި ހައްލެއް ގެނެސް ސަރަޙައްދުގައި ސުލްހަ މަސަލަސްކަން ޤާއިމްކުރަން ޤައުމުތަކުން ގުޅިގެން މަސައްކަތް ކުރުމަށް ދިވެހި ސަރުކާރުން ވަނީ ގޮވާލައްވާފައެވެ.
ސަރުކާރުގެ ބަޔާނުގައި ވަނީ ދިވެހި ސަރުކާރުންނާއި ދިވެހި ރައްޔިތުން އަބަދުވެސް ތިބޭނީ ފަލަސްޠީނުގެ ރައްޔިތުންނާއިއެކުގައިކަމަށް ވިދާޅުވެފައިވެއެވެ. އަދި ފަލަސްޠީނަށް ސިޔާދަތީ ބާރާއި މިނިވަންކަން ހޯދުމަށް ކުރަން ޖެހުނު ހުރިހާ ކަމެއްގައި ސަރުކާރުން އަބަދުވެސް އެއްބާރުލުން ދޭނެކަމަށްވެސް ބަޔާނުގައިވެއެވެ.