ވިއްސާރައިގަ ލިބުނު ގެއްލުންތަކުގެ އެސެސްމަންޓް ހެދުމުގެ މަސައްކަތް މާދަމާ ފަށަނީ

މިހަފްތާގައި ރާއްޖެއަށްކުރި ވިއްސާރައިގަ ލިބުނު ގެއްލުންތަކުގެ ތަފްޞީލް ދެނެގަތުމަށް ހަދާ އެސެސްމަންޓުގެ މަސައްކަތް މާދަމާ ފަށާނެކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

ރާއްޖޭގެ ބޮޑު ބަޔަކަށް މޫސުން ގޯސްވެ ވާރޭވެހި، ފެންބޮޑުވުމާއި ގުޅިގެން ގޭބިސީތަކަށް ފެންވަނުމާއި، ވައިގަދަވުމުގެ ސަބަބުން އެކިވަރުގެ ތަފާތު ގެއްލުންތަކެއްވަނީ ލިބިފައެވެ. މިފަދަ ހާދިސާތައް މާލޭގެ އިތުރުން އަތޮޅުތަކުގެ އެކި ރަށްރަށުންވެސް ވަނީ ރިޕޯޓުކޮށްފައެވެ. ގެއްލުންތައް ލިބިފައިވާ ގޭބިސީތައް ދެނެގަތުމަށް ފުރިހަމަ އެސެސްމެންޓެއް ހެދުމުގެ މަސައްކަތް މާދަމާ ފެށުމަށް ތައްޔާރުވަމުންދާކަމަށް އެންޑީއެމްއޭއިން ވިދާޅުވެއެވެ.

ވިއްސާރައާއި ގުޅިގެން ހާލުގައި ޖެހުނު ފަރާތްތަކަށް ބޭނުންވާ އެހީތެރިކަން އެން.ޑީ.އެމް.އޭގެ އިން މިގެންދަނީ ފޯރުކޮށްދެމުން. އަދި ލިބުނު ގެއްލުންތަކުގެ އެސެސްމަންޓް ހެދުމުގެ މަސައްކަތް މާދަމާ ފެށުމަށް މި އޮތޯރިޓީން މި ދަނީ ތައްޔާރުވަމުން.

— NDMA Maldives (@NDMAmv) August 14, 2024

މި ހަފްތާގެ ކުރީކޮޅުން ފެށިގެން ރާއްޖެއަށް ކުރަމުންދާ ވިއްސާރައިގަ އެންމެ ބޮޑު ގެއްލުންތަކެއް ވެފައިވަނީ ވޭތުވެދިޔަ ދެދުވަހު ބޯކޮށް ވާރޭވެހުމާއި ވައިގަދަވުމުގެ ސަބަބުންނެވެ. އަދި އެކި ރަށްރަށަށް ލިބުނު ގެއްލުންތައް އެންޑީއެމްއޭއިން ދިޔައީ ބަލައި ވަގުތީ އެހީތެރިކަން ފޯރުކޮށްދެމުންނެވެ. އެގޮތުން ފެންވަނުމާއި ނަޖިސް ލީކުވުމުގެ ސަބަބުން އަދި ވައި ގަދަވެ ހިނގި ތަފާތު ހާދިސާތަކާ ގުޅިގެން ބައެއް ގެތަކުން ރައްކާތެރި ތަންތަނަށް އާއިލާތައް ބަދަލުކުރިކަން އެންޑީއެމްއޭއާ ކައުންސިލްތަކުންވެސް ވަނީ ފާހަގަކުރައްވާފައެވެ.

ވަގުތީ އެހީތެރިކަން ފޯރުކޮށްދިނުމަށްފަހު، ކަނޑައެޅިފައިވާ އުސޫލުތަކާ އެއްގޮތަށް ލިބުނު ގެއްލުންތަކުގެ ތަފްޞީލު ހޯދުމަށް އެންޑީއެމްއޭއިން އެސެސްމެންޓްތައް ހަދައި ގެއްލުމުގެ ބަދަލުދިނުމުގެ މަސައްކަތް ކުރިއަށްގެންދެއެވެ.

މި ވިއްސާރައާ ގުޅިގެން 250 އަށްވުރެ ގިނަ މީހުން އެހީތެރިކަމަށް އެދިފައިވާކަމަށް އެންޑީއެމްއޭއިން ވަނީ ކުރިން ވިދާޅުވެއެވެ.