"ހޯޕް އައިލެންޑް"ނިމުމުން ނިޒާމުގެ ތެރެއިން ބަލަހައްޓަން ޖެހޭ ކުދިންގެ އަދަދު މަދުވާނެ: ވަޒީރު އިޙްސާން

ދ. ވާނީގައި ޤާޢިމްކުރާ "ހޯޕް އައިލެންޑް" މަޝްރޫއުގެ މަސައްކަތް ނިމި ފުރިހަމައަށް ޚިދުމަތް ދެވެން ފެށުމުން ކުޑަކުންދިންގެ އަދުލުގެ ނިޒާމުގެ ތެރެއިން ދައުލަތުން ބަލަހައްޓަން ޖެހޭ ކުދިންގެ އަދަދު މަދުވެގެން ދާނެކަމަށް ދާޚިލީ ސަލާމާތާއި ފަންނިއްޔާތާއިބެހޭ ވަޒީރު ޢަލީ އިހުސާން ވިދާޅުވެއްޖެއެވެ.

ވަޒީރު މިހެން ވިދާޅުވީ 8 ވަނަ ޖުވެނައިލް ޖަސްޓިސް ތަމްރީނު ޕްރޮގްރާމް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ދާޚިލީ ވަޒީރު އަލީ އިޙްސާން ވިދާޅުވީ، މިހާރު އަމަލުކުރަމުންދާ ކުޑަކުދިންގެ އަދުލުގެ ނިޒާމަކީ އެންމެ ފުރިހަމަ ނިޒާމެއް ނޫން ކަމަށެވެ. ކަންކަން އިސްލާހުކުރުމަށް ތަފާތު ނިޒާމުތައް ބަލައިގަނެ އަމަލުކުރަން ފެށިނަމަވެސް އޭގައި ރަނގަޅުކުރަންޖެހިފައި ހުންނަ ކުދިކުދި ކަންކަން ހޯދައި އޭގެ ބޭނުން ނަހަމަގޮތުގައިހިފާ މީހުން އުޅޭކަމަށެވެ. އެހެންކަމުން އެކަންކަމަށް ސަމާލުވެ، ނިޒާމުގެ ރައްކާތެރިކަން ކަށަވަރުކުރަން މަސައްކަތް ކުރުމުގެ މުހިންމުކަން ވަޒީރު ވަނީ ފާހަގަކުރައްވާފައެވެ.

ވަޒީރު އިޙްސާން ވިދާޅުވީ މިފަދަ ޤާނޫނީ ނިޒާމުތަކުގެ ބޭނުން ނަހަމަގޮތުގައި ހިފާ މިންވަރު އިތުރުވާނަމަ ނިޒާމުގެ މައްޗަށް ރައްޔިތުންގެ އިތުބާރު ގެއްލިގެންދާކަމަށެވެ. މިވަގުތު ރާއްޖޭގެ ޖިނާޢީ އަދުލުގެ ނިޒާމުގެ ތެރޭގައި ހެދިފައިހުރި ޤާނޫނުތަކާއި، އެހެން ނިޒާމުތަކުގައިވެސް ބޮޑެތި ހިރާސްތަކެއް ހުރިކަން ވަޒީރުވަނީ ފާހަގަކުރައްވާފައެވެ.

"މިފަދަ ނިޒާމުތަކާމެދު މީހުން ވަރަށް އަވަހަށް ސުވާލު އުފައްދަން ފަށާނެ މާބޮޑަށް ނިޒާމު އެކްސްޕޮލޮއިޓް ކުރެވޭ ކަމަށްވާނަމަ، ރާއްޖޭގެ ކްރިމިނަލް ޖަސްޓިސް ސިސްޓަމް ތެރޭ ހެދިފައިވާ ހުރިހާ ޤާނޫނެއް އަދި ހުރިހާ ނިޒާމެއް މިވަނީ ރިސްކުގައި. އެހެންކަމުން ޤާނޫނުތަކަށް ގެންނަން ޖެހޭ ބަދަލުތައް އަބަދުވެސް މިދަނީ ބަލަމުން" އިހުސާން ވިދާޅުވިއެވެ.

ކުޑަކުދިންގެ އަދުލުގެ ނިޒާމު ފުރިހަމައަށް ތަންފީޒު ކުރުމަށް މާލީގޮތުންނާއި، އިންސާނީ ވަސީލަތުގެ ގޮތުންވެސް ބޮޑެތި ގޮންޖެހުންތައް ހުރިކަން ފާހަގަކުރައްވައި ދާޚިލީ ވަޒީރު ވިދާޅުވީ ސަރުކާރުގެ ވިސްނުމަކީ ކުޑަކުދިންގެ ޖިނާޢީ އަދުލުގެ ނިޒާމު ތަޞައްވަރު ކުރާ ފެސިލިޓީ ދ. ވާނީގައި ޤާއިމްކުރާއިރު އެއްތަނަކުން ހުރިހާ ޚިދުމަތެއް ލިބޭނެ ގޮތަށް ވަސީލަތްތައް ބިނާކުރުން ކަމަށެވެ.

ކޮންމެ ރަށެެއްގައި ހުރިހާ ޚިދުމަތެއް ޤާއިމް ނުކުރެވޭނެކަން ފާހަގަކުރައްވަމުން ވަޒީރު ވަނީ ދ. ވާނީގައި ޤާޢިމްކުރާ އިންތިޒާމުތަކުގެ މައިގަނޑު އަމާޒަކީ ނިޒާމުގެ ތެރެއިން ދައުލަތުން އަޅާލަން ޖެހޭ ކުދިންގެ އަދަދު މަދުކުރުންކަމަށެވެ.

"މިހުރިހާ ނިޒާމެއް ނުވަތަ ފެސިލިޓޭއެއް އެއްދިމާއަކަށް ގެނެވިއްޖެ ނަމަ، ދޭވޭ ޚިދުމަތުގެ ކޮލިޓީ ރަނގަޅުވާނެ ކަމަށް އަޅުގަނޑު ޤަބޫލުކުރަން. އެހެންވެގެން ހޯޕް އައިލޭންޑް ޕްރޮޖެކްޓް ކުރިއަށް މިގެންދަނީ. ﷲގެ އިރާދަފުޅުން މީގެ ނަތީޖާއަކަށް ވާނީ އަޅުގަނޑުމެން މި ނިޒާމުގެ ތެރެއިން އަޅާލަން ޖެހޭ ކުދިންގެ އަދަދު މަދުވެގެންދިއުން" ވަޒީރު އިހުސާން ވިދާޅުވިއެވެ.

ވަޒީރު ވިދާޅުވީ މިފަދަ ތަނެއް ޤާއިމް ކުރުމުގެ މަޤްޞަދަކީ ކުދިން ޖަލަކަށް ލައިގެން އަދަބުދިނުން ނޫންކަމަށާއި އޭގެ ބަދަލުގައި ޤާނޫނުގެ ތެރެއިން ކުދިންނަށް ބޭނުންވާ ތަޢުލީމާއި އެހެނިހެން ޕްރޮގްރާމުތައް ފުރިހަމަކުރާ ޢަޚުލާގު ރަނގަޅު ދަރިންތަކެއް މުޖުތަމަޢަށް ނެރުމަށް އިސްކަންދެއްވާކަމަށެވެ.

ރާއްޖޭގައި ކުށަށް ޒިންމާވާ އުމުރު 12 އަހަރަށް ދަށް ކުރަނީވެސް ކުދިންނަށް ވީހާ އަވަހަށް ނިޒާމުގެ ތެރެއިން ޕްރޮގްރާމުތައް ހިންގައި އެކުދިންނަށް ބޭނުންވާ އެހީތެރިކަން ފޯރުކޮށްދިނުމަށްކަމަށް ވަޒީރު ވިދާޅުވިއެވެ. ވަޒީރު އިހުސާން ވިދާޅުވީ މިހާރު ރާއްޖޭގެ ކުށުގެ ވެއްޓަށް ބަލާއިރު ކުށަށް އަރައިގަންނަ 12 އަހަރާއި 15 އަހަރާއި ދެމެދުގެ ކުދިން ގިނަ ވަމުންދާކަމީ ފެންނަން ހުރި ހަޤީޤަތެއް ކަމަށެވެ. އެހެން ކަމުން ނިޒާމުގެ ތެރެއިން އަވަސް ހައްލުތައް ގެނައުމަކީ މުހިއްމުކަމެއްކަމަށް ވަޒީރު ވިދާޅުވިއެވެ.

ކުށަށް އަރައިގަންނަ ކުޑަކުދިން ކުށުގެ މާޙައުލުން ދުރުކޮށް އެކުދިން ރަނގަޅު މަގަށް ގެނައުމަށް ރީހެބިލިޓޭޝަން ފެސިލިޓީއެއް ޤާއިމްކުރުމަށް ނިންމާފައިވާކަން ދާޚިލީ ވަޒީރު ހާމަކުރައްވާފައިވަނީ މިދިޔަ މޭ މަހުގެ 6 ވަނަ ދުވަހުއެވެ.