ބޭންކް ފަންޑަށް އެދި ހުށަހެޅުމުގެ އިތުރު ފުރުސަތެއް ހުޅުވާލައިފި

ދެމެހެއްޓެނިވި ޕްރޮޖެކްޓްތަކަށް މާލީ އެހީތެރިކަން ފޯރުކޮށްދިނުމާއި ޖަމްޢިއްޔާތައް ބާރުވެރިކޮށް، މުޖުތަމަޢަށް އެހީވުމަށް ބޭންކް އޮފް މޯލްޑިވްސް އިން ތައާރަފްކުރި 'ބޭންކް ފަންޑް' އަށް އެދި ހުށަހެޅުމުގެ އިތުރު ފުރުސަތެއް ހުޅުވާލައިފިއެވެ.

މިފަހަރު ހުޅުވާލި ފުރުސަތުގެ މުއްދަތު 8 ސެޕްޓެމްބަރުވާ އާދިއްތަ ދުވަހުގެ ހަވީރު 4:00 އަށް ހަމަވާނެކަމަށް ބީއެމްއެލްއިން ވަނީ ބުނެފައެވެ.

'ބޭންކް ފަންޑް' ހުޅުވާލާފައިވަނީ ރާއްޖޭގައި ރަޖިސްޓްރީކޮށްގެން ހިންގާ ޖަމްޢިއްޔާ ޖަމާޢަތް އަދި ކްލަބްތަކަށެވެ. މި ފަންޑަށް އެދި ފޯމާއި ޕްރޮޕޯސަލް ހުށަހަޅަންޖެހޭނީ [email protected] އަށް އީމެއިލް މެދުވެރިކޮށްކަމަށް ބީއެމްއެލްއިން ވަނީ ބުނެފައެވެ.

މި ފަންޑުގެ ދަށުން ތައުލީމާއި، ތިމާވެއްޓާއި، ކުޅިވަރާއި މުޖުތަމަޢަށް ފައިދާކުރާ ދާއިރާތަކުން 5 ޕްރޮޖެކްޓެއް ހޮވައި، ކޮންމެ ޕްރޮޖެކްޓެއް ހިންގުމަށް 200،000 ރުފިޔާގެ ހިލޭ އެހީ ދިނުމަށް ހަމަޖެހިފައިވާކަމަށް ބީއެމްއެލްއިން ބުނެއެވެ.