ޓެކްސް އެޕީލް ޓްރައިބިއުނަލްގެ ރައީސާއި ނައިބު ރައީސް މަޤާމުން ވަކިކުރަން ލަފާދޭން މަޖިލީހުން ފާސްކޮށްފި

ޓެކްސް އެޕީލް ޓްރައިބިއުނަލްގެ ރައީސާއި ނައިބު ރައީސް، މަޤާމުން ވަކިކުރުމަށް ރައީސުލްޖުމްހޫރިއްޔާއަށް ލަފާ އެރުވުމަށް ރައްޔިތުންގެ މަޖިލީހުން ފާސްކޮށްފިއެވެ.

ޓެކްސް އެޕީލް ޓްރައިބިއުނަލްގައި މައްސަލަތަކެއް ހުރިކަން ފާހަގަކޮށް ރައްޔިތުންގެ މަޖިލީހުގެ އިދާރާއަށް ހުށައެޅި ސިޓީއަކާ ގުޅިގެން އެކަން ޖުޑިޝަރީ ކޮމިޓީންވަނީ ދިރާސާކޮށްފައެވެ. އަދި ދިރާސާކުރުމަށްފަހު، މައްސަލަ ނިންމި ގޮތުގެ ރިޕޯޓު، ޖުޑިޝަރީ ކޮމިޓީންވަނީ މަޖިލީހުގެ މިއަދުގެ ޖަލްސާއަށް ހުށައަޅާފައެވެ.

ޓެކްސް އެޕީލް ޓްރައިބިއުނަލާ ގުޅޭ މައްސަލަ ކޮމިޓީން ނިންމިގޮތަށް ހުށައެޅުމަށްފަހު އެގޮތަށް ފާސްކުރުމަށް ޖަލްސާގައިވަނީ ވޯޓަށް އެހުމުން 63 މެންބަރުންވަނީ އެގޮތަށް ފާސްކުރުމަށް ވޯޓު ދެއްވާފައެވެ. ނުފެންނަކަމަށް 10 މެންބަރުން ވޯޓު ދެއްވިއެވެ.

މައްސަލަ ނިންމިގޮތުގެ ރިޕޯޓު ހުށައަޅުއްވަމުން ޖުޑިޝަރީ ކޮމިޓީގެ މުޤައްރިރު އަދި މަނަދޫ ދާއިރާގެ މެންބަރު ޙުސްނީ މުބާރިކް ވިދާޅުވީ ޓްރައިބިއުނަލްއާ ގުޅޭ މައްސަލަ ބެލި ބެލުމުން، އެ އިދާރާއިން މިދިޔަ ސަރުކާރުގައި ކޮރަޕްޝަނަށް ތުހުމަތުވާގޮތަށް އެތައް ކަމެއް ކޮށްފައިހުރިކަން ފާހަގަކުރެވިފައިވާ ކަމަށެވެ. އަދި ޚަރަދު ކުޑަކޮށް ކުރެވެންހުރި ކަންކަން ދައުލަތުގެ މާލިއްޔަތަށް ބުރަވާގޮތަށް، ބޮޑު އަގުގައި ކޮށްފައިހުރިކަންވެސް ކޮމިޓީން ބެލި ބެލުމުން ފާހަގަކުރެވިފައިވާކަމަށް ޙުސްނީ މުބާރިކް ވިދާޅުވިއެވެ.

މެންބަރު ވިދާޅުވީ ޓްރައިބިއުނަލްގައި ކޮރަޕްޝަނަށް ތުހުމަތުވާ ގޮތަށް ކަންކަން ކޮށްފައިހުރިކަން ފާހަގަކުރެވޭތީ އެކަންކަން ބެލުމަށް އެންޓި ކޮރަޕްޝަން ކޮމިޝަނަށް ހުށައެޅުމަށް ކޮމިޓީން ނިންމާފައިވާ ކަމަށެވެ. އަދި އެއްކުރި މަޢުލޫމާތަށް ރިޢާޔަތްކޮށް ޓްރައިބިއުނަލްގެ ރައީސާއި ނައިބު ރައީސްގެ އިތުރުން 2 މެންބަރަކު މަޤާމުގެ މަސްއޫލިއްޔަތުތައް އަދާކުރުމުގައި އިހުމާލުވެފައިވާކަމަށް ފާހަގަކުރެވޭތީ އެ ފަރާތްތައް މަޤާމުން ވަކިކުރުމަށް ރައީސުލްޖުމްހޫރިއްޔާއަށް ލަފާއެރުވުމަށްވެސް ކޮމިޓީން ފާސްކޮށްފައިވާ ކަމަށް މެންބަރު ޙުސްނީ މުބާރިކް ވިދާޅުވިއެވެ.

ޓްރައިބިއުނަލްއިން ވަކިކުރުމަށް ރައީސަށް ލަފާދެއްވުމަށް ފާސްކުރި 4 މީހުން:

• ޓްރައިބިއުނަލްގެ ރައީސް މުޙައްމަދު މުނައްވަރު ޢަލީ
• ޓްރައިބިއުނަލްގެ ނައިބު ރައީސް ހުސައިން ޒައިދާން ޖަލީލް
• ޓްރައިބިއުނަލްގެ މެންބަރު އަޙްމަދު އަޝްރަފާ
• ޓްރައިބިއުނަލްގެ މެންބަރު ޚަދީޖާ ނަޢީމް

މީގެ އިތުރުން ޙުސްނީ މުބާރިކް ވިދާޅުވީ ޓްރައިބިއުނަލްއިން މައްސަލަ ބެލުމަށް އޮންނަ މުއްދަތުގައި ގިނަ މައްސަލަތައް ނިމިފައިނުވާކަންވެސް ފާހަގަކުރެވިފައިވާ ކަމަށެވެ.

"ޤާނޫނުގައި އެބަބުނޭ 180 ދުވަހުގެ ތެރޭގައި ޓްރައިބިއުނަލްއަށް ހުށައެޅޭ މައްސަލަތައް ނިންމަންވާނެކަމަށް. އެކަމަކު ޤާނޫނު ވުޖޫދުވި ހިސާބުން ފެށިގެން އެ އިދާރާއަށް ހުށައެޅުނު 51 މައްސަލައިގެ ތެރެއިން މުއްދަތަށް ނިންމުނީ އެންމެ 4 މައްސަލަ. 47 މައްސަލަ މުއްދަތަށް ނުނިމޭ." ޙުސްނީ މުބާރިކް ވިދާޅުވިއެވެ.

ޓެކްސް އެޕީލް ޓްރައިބިއުނަލަކީ ޓެކްސްނެގުމާ ބެހޭ އިދާރީ ޤާނޫނުގެ ދަށުން ޓެކްސްއާ ގުޅޭ މައްސަލަތައް ބެލުމަށް އުފައްދާފައިވާ އިދާރާއެކެވެ. ޓްރައިބިއުނަލްގައި ރައީސާއި ނައިބު ރައީސް ހިމެނޭހެން 5 މެންބަރުން ތިއްބަވައެވެ.