ގާބިލް މުވައްޒަފުންނަށް ވަޒީފާދެވޭކަން ކަށަވަރުކުރުމަށް އެސްއޯއީތަކުގެ އެޗްއާރު ގައިޑްލައިނަށް ބަދަލުތަކެއް
-
އައު ގައިޑްލައިނާއެކު ކުންފުނިތަކަށް ނުކަތާ ވަރަށް މުވައްޒަފުން ނެގުން ހުއްޓުމަކަށް ގެނެވޭނެ
-
އައު ގައިޑްލައިންގައި ރަނގަޅު އެޗްއާރު ނިޒާމެއްގައި ހިމެނޭ ބައިތައް ފުރިހަމަވާނެ
ވަޒީފާދެވެނީ ކަމަށް ޤާބިލް މުވައްޒަފުންނަށްކަން ކަށަވަރުކުރުމަށް ސަރުކާރު ހިއްސާވާ ކުންފުނިތަކުގެ އެޗްއާރު ގައިޑްލައިނަށް ބަދަލުތަކެއް ގެނައުމުގެ މަސައްކަތް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު، ޕީސީބީން ފަށައިފިއެވެ.
ސަރުކާރު ހިއްސާވާ ކުންފުނިތަކުގެ އެޗްއާރު ގައިޑްލައިނަށް ބަދަލުތަކެއް ގެނައުމަށް މަސައްކަތު ބައްދަލުވުންތަކެއް ޕީސީބީން ފަށާފައިވަނީ މިދިޔަ އާދިއްތަ ދުވަހުއެވެ. އަދި އިތުރު ބައްދަލުވުމެއް އަންނަ ބުރާސްފަތި ދުވަހު އޮންނާނެކަމަށް ޕީސީބީން ވިދާޅުވިއެވެ.
ޕީސީބީން ވިދާޅުވީ މި ބައްދަލުވުންތަކުގައި ސަރުކާރު ހިއްސާވާ ކުންފުނިތަކުން ބައިވެރިވެ، އައު ގައިޑްލައިން ފަރުމާކުރުމަށް ބޭނުންވާ ޚިޔާލާއި މަޝްވަރާ ހުށައަޅުއްވަމުންދާ ކަމަށެވެ.
ޕީސީބީން ވިދާޅުވީ އަލަށް އެކުލަވާލެވޭ ހިއުމަން ރިސޯސަސް ގައިޑްލައިނާއެކު ކުންފުނިތަކަށް ނުކަތާ ވަރަށް މުވައްޒަފުން ނެގުން ހުއްޓުމަކަށް ގެނެވޭނެ ކަމަށެވެ. އަދި ބޭކާރު ޚަރަދުކުރުމާއި ކޮރަޕްޝަނަށް މަގުފަހިވާގޮތަށް މުވައްޒަފުން ނެގުމާއި މުސާރަ ދިނުން ހުއްޓުމަކަށް ގެނެވޭނެ ކަމަށެވެ. މީގެއިތުރުން ކުންފުންޏަށް ނެގޭ މުވައްޒަފުންނަކީ ތަޢުލީމީ، ތަޖުރިބާހުރި ކަމަށް ޤާބިލް ބައެއްކަން އަލަށް އެކުލަވާލާ ގައިޑްލައިނުން ކަށަވަރަކުރެވޭނެކަމަށް ޕީސީބީން ފާހަގަކުރައްވައެވެ.
ޕީސީބީން މަޢުލޫމާތުދޭ ގޮތުގައި އަލަށް އެކުލަވާލާ ގައިޑްލައިންގައި ރަނގަޅު އެޗްއާރު ނިޒާމެއްގައި ހުންނަންޖެހޭ ކަންކަން ފުރިހަމަވާނެ ކަމަށެވެ. އެގޮތުން ފިޔަވަޅު އެޅޭނެ އުޞޫލްތަކާއި ކުންފުންޏެއްގައި އޮންނަންޖެހޭ ކޮމިޓީތަކާއި މުސާރައާއި އިދާރީ އޮނިގަނޑުތައް އޮންނަންވާނެގޮތްތައް ގައިޑްލައިންގައި ބަޔާންކުރެވޭނެކަމަށް ޕީސީބީން މަޢުލޫމާތުދެއެވެ.