މެލޭޝިއާގެ މިނިވަންދުވަހުގެ ތަހުނިޔާ ރައީސުލްޖުމްހޫރިއްޔާ ފޮނުއްވައިފި
-
މިއަދަކީ މެލޭޝިއާގެ 67 ވަނަ މިނިވަން ދުވަސް
-
ދެޤައުމުގެ ރައްޔިތުންގެ މެދުގައި އޮތް ގާތްގުޅުން ފާހަގަކުރައްވާފައި
-
މުސްތަޤްބަލުގައި މިގުޅުން އިތުރަށް ބަދަހިވެގެންދާނެ ކަމަށް ރައީސް ވިދާޅުވި
މެލޭޝިއާގެ މިނިވަންދުވަހުގެ ތަހުނިޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފިއެވެ.
މެލޭޝިއާގެ 67 ވަނަ މިނިވަން ދުވަހުގެ މުނާސަބަތުގައި، ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ފޮނުއްވެވި ތަހުނިޔާގެ މެސެޖުގައި ވަނީ، އެޤައުމުގެ ރަސްގެފާން ސުލްތާން އިބްރާހީމަށާއި، ބޮޑު ވަޒީރު އަންވަރު އިބްރާހީމަށާއި އެޤައުމުގެ އެންމެހާ ރައްޔިތުންނަށް ދުވަހުގެ ހެޔޮ އެދުންތައް އަރިސްކުރައްވާފައެވެ.
ރައީސުލްޖުމްހޫރިއްޔާ ވަނީ ދެ ޤައުމުގެ ދެމެދުގައި އުފެދިފައިވާ ދެމެހެއްޓެނިވި ރަޙްމަތްތެރިކަމާއި، ދެޤައުމުގެ ރައްޔިތުންގެ މެދުގައި އޮތް ގާތްގުޅުން ފާހަގަކުރައްވާފައެވެ. އަދި މުސްތަޤްބަލުގައި މިގުޅުން އިތުރަށް ބަދަހިވެ، ދެޤައުމަށްވެސް އޭގެ ފައިދާ ކުރާނެ ކަމަށް ޔަޤީންކުރައްވާކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ މެސެޖު ނިންމަވާލެއްވީ މެލޭޝިއާގެ ރަސްގެފާނަށާއި، ބޮޑުވަޒީރަށް ދުޅަހެޔޮ ޞިއްޙަތަކަށް އެދިވަޑައިގަންނަވަމުންނެވެ. އަދި، އެ ޤައުމުގެ ރައްޔިތުންނަށް ކުރިއެރުމާއި ފާގަތިކަން ލިބިގެންދިއުމަށް އެދިވަޑައިގަންނަވާ ކަމަށްވެސް ރައީސުލްޖުމްހޫރިއްޔާ ފޮނުއްވެވި މެސެޖުގައި ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިތުރުން ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފްވެސް ވަނީ މެލޭޝިއާގެ މިނިވަން ދުވަހުގެ ތަހުނިޔާ އެ ޤައުމުގެ ވެރިންނަށާއި ރައްޔިތުންނަށް ފޮނުއްވާފައެވެ. ސޯޝަލް މީޑިއާގައި ކުރެއްވި ޕޯސްޓެއްގައި ނައިބު ރައީސް ވަނީ ރާއްޖެއާއި މެލޭޝިއާއާ ދެމެދު އޮތް ގާތްގުޅުން ފާހަގަކުރައްވާ، މި ގުޅުން މިގޮތުގައި ކުރިއަށްދާނެކަމަށް އުއްމީދުކުރައްވާކަމަށް ވިދާޅުވެފައެވެ.
ދިވެހިރާއްޖެއާއި މެލޭޝިއާއާ ދެމެދު ސިޔާސީ ގުޅުން ޤާއިމްކޮށްފައިވަނީ 1968 ގައެވެ.