ދީނީ ހޭލުންތެރިކަމަށް މަސައްކަތްކުރާ ޖަމްޢިއްޔާތަކަށް އެހީތެރިވާނެ ނިޒާމެއް ޤާއިމްކުރަނީ

ދީނީ އަދި އިޖުތިމާޢީ ޖަމްޢިއްޔާތަކަށް ބޭނުންވާ މާލީ އެހީތެރިކަން ފޯރުކޮށްދިނުމަށް ޚާއްސަ އިންތިޒާމުތަކެއް އެކުލަވާލައި، ޖަމްޢިއްޔާތަކަށް އެހީތެރިވުމުގައި ސަރުކާރުން މިހާރަށްވުރެ ހަރުދަނާގޮތެއްގައި މަސައްކަތްކުރައްވާނެކަމަށް އިސްލާމީކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ދީނީ، އިޖްތިމާޢީ ޖަމްޢިއްޔާތަކުގެ މަހާސިންތާ 2024 ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ވަޒީރު ވިދާޅުވީ ދީނީ ކަންކަމަށް ރައްޔިތުން ހޭލުންތެރިކުރުވުމުގައި ޙަރަކާތްތެރިވާ ޖަމްޢިއްޔާތަކުން މާލީ ގޮތުން އަދި ވަޞީލަތް ހޯދުމަށް އިސްލާމީ ކަންތައްތަކާ ބެހޭ ވުޒާރާގައި އެހީތެރިކަމަށް އެދެމުންދާކަމަށާއި، އެކަން ވަކި ނިޒާމެއްގެ ތެރެއިން ޤާއިމުކުރަންޖެހޭކަމަށެވެ.

ރާއްޖޭގެ އެކި ކަންކޮޅުތަކުގައި ދީނީ އަދި އިޖުތިމާޢީ މަސައްކަތްތައް ކުރަމުން އަންނަ ޖަމްޢިއްޔާތަކަށް އަމާޒުކޮށް އިސްލާމީ ކަންތައްތަކާ ބެހޭ ވުޒާރާއިން ބޭއްވި މަހާސިންތާގައި ވާހަކަފުޅު ދައްކަވަމުން އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ، މުހިންމު ގިނަ ޚިދުމަތްތަކެއް ކުރާ ޖަމްޢިއްޔާތައް ރާއްޖޭގެ އެކި ކަންކޮޅުތަކުގައި ޙަރަކާތްތެރިވަމުންދާކަމަށެވެ. އަދި އެފަދަ ޖަމްޢިއްޔާތަކުގެ ދައުރު މިހާރަށްވުރެ ފުޅާކުރަންޖެހޭކަމަށް ވަޒީރު ވިިދާޅުވިއެވެ.

މިގޮތުން މިހާރުވެސް ބައެއް ރަށްރަށުގައި ކީރިތި ޤުރުއާން ކިޔަވައިދޭ ޚާއްސަ ކުލާސްތަކެއް ނެތް ރަށްރަށާއި، ދީނީ ހޭލުންތެރިކަން އިތުރުކުރުމަށް މަސައްކަތްތަކެއް ނުކުރެވޭ އެތައް ރަށެއް އޮތްކަން ވަޒީރު ފާހަގަކުރެއްވިއެވެ. އެފަދަ ރަށްރަށުގައި ޙަރަކާތްތެރިވާ ޖަމްޢިއްޔާތައް އުފައްދަވާ ނުވަތަ އެކަމަށް ބާރު އެޅުމާއި މިހާރު ޙަރަކާތްތެރިވަމުންދާ ޖަމްޢިއްޔާތައް ބާރުވެރިކުރުވުމަކީ މުހިންމުކަމެއްކަމަށް ވަޒީރު ވިދާޅުވިއެވެ.

އިސްލާމީ ކަންތައްތަކާ ބެހޭ ވަޒީރު ވިދާޅުވީ، އެކި ކަންކަން ކުރިއަށްގެންދިޔުމަށް މާލީ އެހީ އަދި ވަޞީލަތް ހޯދުމަށް އެދި އެކި ޖަމްޢިއްޔާތަކުން އެވުޒާރާއަށް އަންނަކަމަށެވެ. އެކަން ކޮށްދިނުމަށް ރަނގަޅު ނިޒާމެއް ޤާއިމުކޮށް، ދެމެހެއްޓެނިވި ގޮތެއްގައި އެމަސައްކަތް ފަށާއިގަތުމަށް ލިޔެކިޔުން ބެލެހެއްޓޭނެ ގޮތެއް ޤާއިމުކުރަންޖެހޭކަމަށްވެސް ވަޒީރު ވިދާޅުވިއެވެ. އަދި ކުރިއަށް އޮތްތަނުގައި ޖަމްޢިއްޔާތަކަށް ބޭނުންވާ އެހީތެރިކަން ފޯރުކޮށްދިނުމަށް ވުޒާރާގެ ފަރާތުން މަސައްކަތްކުރާނެކަމަށާއި، މާލީގޮތުން ޖަމްޢިއްޔާތަކަށް އެހީވުމަށް ވުޒާރާގެ ބަޖެޓުން ހޭދަކުރެވޭނެ މިންވަރެއް ކަނޑައަޅައި އެކަންކުރައްވާނެކަމަށް ވަޒީރު ވިދާޅުވިއެވެ.

"ވަރަށް ގިނަ ޖަމްޢިއްޔާ އެބަހުރި ވަރަށް ޚިދުމަތްތެރި. ވަރަށް މުހިންމު މަސައްކަތްތަކެއް ކުރަމުން އަންނަ. ސަރުކާރުން މަސައްކަތްކުރަމުންދަނީ އިންތިޒާމުތަކެއްގެ ތެރެއިން ދީނީ ކަންކަން ހަރުދަނާކުރުމަށް މަސައްކަތްކުރާ ޖަމްޢިއްޔާތަކަށް އެހީތެރިކަން ފޯރުކޮށްދިނުމަށް." އިސްލާމީ ކަންތައްތަކާބެހޭ ވަޒީރު ވިދާޅުވިއެވެ.

ދީނީ އަދި އިޖުތިމާޢީ ޖަމްޢިއްޔާތަކާއެކު ބޭއްވި ބައްދަލުވުމުގައި ޙާޒިރުވެގެން އަދި އޮންލައިންކޮށް ރާއްޖޭގައި ޙަރަކާތްތެރިވާ 70 ޖަމްޢިއްޔާއަކުން 98 މަންދޫބުންވަނީ ބައިވެރިވެފައެވެ.

މިބައްދަލުވުމުގައި ދީނީ ހޭލުންތެރިކަން އިތުރުކުރުމަށް މިހާރު މަސައްކަތްކުރަމުންދާގޮތާއި، ދީނީ ދަޢުވަތު ފެތުރުމުގެ މަސައްކަތް މިހާރަށްވުރެ ރަނގަޅުކުރުމަށް ބޭނުންވާ ބަދަލުތައް ދެނެގަތުމާއި، ރާއްޖޭގެ ޤާނޫނުތަކާއި ގަވާއިދުތަކުގެ ތެރެއިން ދީނީ ހޭލުންތެރިކަން އިތުރުކުރުމާ ގުޅޭ މަޢުލޫމާތު ދިނުމަށްވަނީ ހަމަޖެހިފައެވެ. ހަމައެއާއެކު މިބައްދަލުވުން ނިމިގެންދާއިރު ދީނީ ހޭލުންތެރިކަން އިތުރުކުރުމަށް މަސައްކަތްކުރުމާއި އެހީތެރިކަން ފޯރުކޮށްދިނުމާ ގުޅޭގޮތުން ޖަމްޢިއްޔާތަކާއެކު އިސްލާމީ ކަންތައްތަކާ ބެހޭ ވުޒާރާއިން އެއްބަސްވުމެއް ޤާއިމުކުރުމަށްވެސްވަނީ ހަމަޖެހިފައެވެ.