ޗައިނާގައި ކުރިއަށްދިޔަ ވުހާން އޯޕަން ޓެނިސް މުބާރާތް ޖެހިޖެހިގެން ތިންވަނަ ފަހަރަށް އެރީނާ ސަބަލެންކާ ކާމިޔާބުކޮށްފިއެވެ.
މި މުބާރާތުގައި އެއްވަނައަށް ސީޑްކޮށްފައިވާ އުމުރުން 26 އަހަރުގެ ސަބަލެންކާ ޗެމްޕިއަންކަން ހޯދާފައިވަނީ ނިމިދިޔަ ޕެރިސް އޮލިމްޕިކްސްއިން ރަން މެޑަލް ހޯދާފައިވާ ޗައިނާގެ ޒެން ކިންވެންއާ ދެކޮޅަށް ކުޅުނު މެޗު ދެ ސެޓް އެއް ސެޓުން ކާމިޔާބުކޮށްގެންނެވެ.
މި މެޗުގެ ފުރަތަމަ ސެޓް ސަބަލެންކާ ހައެއް ތިނެއްގެ ނަތީޖާއަކުން ކާމިޔާބު ކޮށްފައިވާއިރު، ދެވަނަ ސެޓުގައި ޒެން ވަނީ މޮޅު ކުޅުމެއް ދައްކައި، ފަހެއް ހަތެއްގެ ނަތީޖާއަކުން މި ސެޓް ކާމިޔާބުކޮށްފައެވެ. ނަމަވެސް ތިންވަނަ ސެޓު ސަބަލެންކާ ވަނީ ހައެއް ތިނެއްގެ ނަތީޖާއަކުން ކާމިޔާބުކޮށް މުބަރާތުގެ ޗެމްޕިއަންކަން ހޯދާފައެވެ.
ބެލަރޫސްގެ ސަބަލެންކާ މި މުބާރާތް ކާމިޔާބު ކުރުމާއެކު، މި އަހަރު އޭނާ ކާމިޔާބުކުރި މުބާރާތްތަކުގެ އަދަދު ވަނީ ހަތަރަކަށް އަރާފައެވެ. އަދި އޭނާގެ ކެރިއަރގައި މިހާތަނަށް ކާމިޔާބުކުރި ސިންގަލްސް މުބާރާތްތަކުގެ އަދަދު ވަނީ 17 އަށް އަރާފައެވެ.
މީގެ އިތުރުން މި މުބާރާތް ކާމިޔާބުކުރުމާއެކު މި އަހަރުގެ ފަހު މުބާރާތަށް ކޮލިފައިވެ ދުނިޔޭގެ އެއްވަނަ އަންހެން ޓެނިސް ކުޅުންތެރިޔާގެ މަގާމު އަލުން ހޯދުމުގެ ފުރުސަތު ސަބަލެންކާއަށް ވަނީ ލިބިފައެވެ.