އިނގިރޭސި ގައުމީ ފުޓްބޯޅަ ޓީމުގެ ދާއިމީ ކޯޗުގެ މަގާމާ ހަވާލުވާން ޖަރުމަންގެ ތޯމަސް ޓުޗެލް އެއްބަސްވެއްޖެއެވެ.
އިނގިރޭސި ޕްރިމިއާ ލީގުގެ ޗެލްސީއަށް ކުރިން ކޯޗުކޮށްދިން ޓުޗެލް އިނގިރޭސި ގައުމީ ޓީމާއި ހަވާލުވުމާއެކު އޭނާ ވެގެންދާނީ ގައުމީ ޓީމަށް ކޯޗުކޮށްދޭ އިނގިރޭސިވިލާތަށް ނިސްބަތްނުވާ ތިންވަނަ ކޯޗަށެވެ. މީގެ ކުރިން އިނގިރޭސި ނޫން ދެ ކޯޗުންނަކީ އިޓަލީގެ ފަބިއޯ ކަޕެއްލޯ އާއި ސްވިޑަންގެ ސްވެން ގޯރަން އެރިކްސަން އެވެ.
ޖެހިޖެހިގެން ޔޫރޯ ފުޓްބޯޅަ މުބާރާތުގެ ފައިނަލުން ދެ ފަހަރު މަތިން ބަލިވެފައިވާ އިނގިރޭސިވިލާތުގެ ދާއިމީ ކޯޗަކަށް މީހަކު ހޯދަން ފަށާފައިވަނީ އެ މަގާމުގައި ކުރިން ހުރި ގެރެތު ސައުތުގޭޓް މަގާމުން އަމިއްލައަށް އިސްތިއުފާ ދިނުމުންނެވެ. ދާއިމީ ކޯޗެއް ހަމަޖެހެންދެން ވަގުތީ ގޮތުން ކޯޗެއްގެ ޒިންމާ އަދާކުރަމުންދަނީ އިނގިރޭސިވިލާތުގެ 21 އަހަރުން ދަށުގެ ޓީމުގެ ކޯޗަކަށް ހުރި ލީ ކާސްލީ އެވެ.
ކާސްލީއާއިއެކު އިނގިރޭސިން ކުޅުނު ފުރަތަމަ ދެ މެޗުގައި ރަގަޅު ކުޅުމެއް ދެއްކި ނަމަވެސް ތިންވަމަ މެޗުގައި އަމިއްލަ ގައުމުގައި ގްރީސް އަތުން ބަލިވި މެޗަށްފަހު މީޑިޔާގައިވަނީ ދާއިމީ ކޯޗެއްގެ ވާހަކަ ދެއްކުން ގިނަވެފަ އެވެ.
ޓުޗެލް އިނގިރޭސި ގައުމީ ޓީމުގެ ކޯޗުކަމާއި ހަވާލުވާން އެއްބަސްވެފައިވާއިރު, އޭނާ އާއިއެކު 2028 ގެ ނިޔަލަށް ކުރިއަށް ދިއުމަށް އެއްބަސްވެ މިއަދުގެ ވަގުތެއްގައި އިނގިރޭސި ގައުމީ ޓީމުގެ ކޯޗުގެ ގޮތުގައި ޓުޗެލް ނޫސްވެރިންނަށް ދެއްކުމަށްވަނީ ހަމަޖެހިފަ އެވެ.
އިނގިރޭސި ގައުމީ ޓީމުގެ ދާއިމީ ކޯޗެއް ހޯދުމުގެ މަސައްކަތް އިނގިރޭސި އެފްއޭ އިން ކުރިއިރު, އެފްއޭ އިން ވަނީ މެންޗެސްޓަރ ސިޓީގެ ޕެޕް ގަޑިއޯލާގެ އިތުރުން ފްރާންސްގެ ޒިނެޑިން ޒިދާން އާއިވެސް މަޝްވަރާކޮށްފަ އެވެ.
2021 އިން 2022 ވަނަ އަހަރުގެ ނިޔަލަށް ޗެލްސީގެ ކޯޗަކަށް ޓުޗެލް ހުރިއިރު އޭނާއަކީ އިނގިރޭސި ފުޓްބޯޅަ އަށް އާ މޫނެއް ނޫނެވެ. އަދި އުމުރުން 51 އަހަރުގެ ޓުޗެލް ވަނީ ޗެލްސީއާއިއެކު ޔޫއެފާ ޗެމްޕިއަންސް ލީގުގެ އިތުރުން ފީފާ ކްލަބް ވޯލްޑް ކަޕާއި ޔޫއެފާ ސުޕަރ ކަޕް ކާމިޔާބުކޮށްފަ އެވެ.
ޖަރުމަނުގެ ބޮރޫޝިއާ ޑޯޓްމަންޑަށް ކުރިން ކޯޗުކޮށްދީފައިވާ ޓުޗެލް ވަނީ އެ ޓީމާއިއެކު ޖަރުމަން ކަޕް ކާމިޔާބުކޮށްފަ އެވެ. އަދި ފްރާންސްގެ ޕީއެސްޖީ އާއިއެކު ދެ ފަހަރު މަތިން ފްރެންޗް ލީގު ހޯދާފައިވެ އެވެ.