ދެ ކޮރެޔާގެ ދެމެދުގައި ރޭލު ދަތުރުފަތުރުގެ ޚިދުމަތް ދިނުމަށް ބޭނުންކުރާ މަގަށް އުތުރުން ޙަމަލާދީފި

ދެ ކޮރެޔާގެ ދެމުގައި ރޭލު ދަތުރުފަތުރުގެ ޚިދުމަތް ދިނުމަށް ބިނާ ކޮށްފައިވާ މަގަށް އުތުރު ކޮރެޔާއިން ޙަމަލާދީ, ބޮޑެތި ގެއްލުންތަކެއް ދީފިއެވެ. އުތުރު ކޮރެޔާއިން ގެއްލުން ދީފައި ވަނީ, ހަތިޔާރު ގެންގުޅުން މަނާ ސަރަޙައްދުގެ އެ ޤައުމާ ވީ ފަޅީގައި އޮތް ރޭލު ދަތުރުކުރާ މަގަށެވެ. އެ ތަނަށް ގެއްލުން ދިނުމާ ގުޅިގެން, ދެކުނު ކޮރެޔާއިން އިންޒާރުގެ ޙަމަލާތަކެއް ދިނެވެ.

އުތުރު ކޮރެޔާގެ މިނިވަން ދައުލަތެއް ޤާއިމު ކުރުމަށް ކުރަމުންދާ މަސައްކަތްތަކުގެ ދަށުން, ދެ ކޮރެޔާގެ ދެމެދުގައި ބިނާކޮށްފައިވާ ރޭލު ދަތުރުކުރާ މަގު ބަންދު ކުރާނެ ކަމަށް ބުނެ, އުތުރު ކޮރެޔާގެ ވެރިރަށް ޕްޔުންގޔަންގުން ހުސްވި ހަފުތާގައި އިންޒާރު ދީފައިވެއެވެ. އަދި, ދެ ކޮރެޔާ ގުޅޭ ސަރަޙައްދީ ރޮނގު ކައިރީގައި ދިފާޢީ ފިޔަވަޅުތައް އިތުރަށް ހަރުދަނާ ކުރާނެ ކަމުގައި ވެސް ޕްޔުންގޔަންގުން ބުންޏެވެ. ރޭލު ދަތުރުކުރާ މަގަށް ޙަމަލާދީ, ގެއްލުންތަކެއް ދީފައި މި ވަނީ އެ އިންޒާރަށް ފަހުއެވެ.

އުތުރު ކޮރެޔާއިން ކުރިން ވަކާލާތު ކުރަމުން ގޮސްފައި ވަނީ ދެ ކޮރެޔާ އެއްކޮށްލުމަށެވެ. ނަމަވެސް, އެ ސިޔާސަތު ބަދަލުކޮށް, އުތުރު ކޮރެޔާއިން މިހާރު މަސައްކަތް ކުރަމުން ދަނީ ދެ ކޮރެޔާގެ މިނިވަން ދެ ދައުލަތް ޤާއިމު ކުރުމަށެވެ. ދެ ކޮރެޔާގެ ދެމެދުގައި ދަތުރުފަތުރު ކުރުމަށް ބިނާ ކޮށްފައިވާ މަގަށް އުތުރު ކޮރެޔާއިން ޙަމަލާދީ, ގެއްލުންތަކެއް ދީފައިވާ ކަން ދެކުނު ކޮރެޔާގެ އަސްކަރިއްޔާއިން ވެސް ކަށަވަރު ކޮށްދިނެވެ.

ދެ ކޮރެޔާގެ ދެމެދުގައި ގުޅުން ބަދަހި ކުރުމުގެ ކަންކަން ވިލަރެސް ކުރާ ދެކުނު ކޮރެޔާގެ ވުޒާރާއިން ވަނީ އުތުރު ކޮރެޔާގެ އަމަލުތައް ކުށްވެރި ކޮށްފައެވެ. އަދި, އެއީ ދެ ކޮރެޔާގެ ދެމެދުގައި ޤާއިމު ކޮށްފައިވާ އެއްބަސްވުންތަކާ ޚިލާފު އަމަލެއްގެ ގޮތުގައި ސިފަ ކޮށްފައެވެ. "އުތުރު ކޮރެޔާއިން އެ ފަދަ ދަށުދަރައިގެ އަމަލުތައް ހިންގުމަކީ ހިތާމަވެރި ކަމެއް،" އެ ވުޒާރާގެ ތަރުޖަމާނު ކޫ ބިޔޮންގ-ސަން ވިދާޅުވިއެވެ.

ދެ ކޮރެޔާގެ ދެމެދުގައި އެންމެ ފަހުން ނުތަނަވަސް ކަން އިތުރުވެފައި ވަނީ, ދެކުނު ކޮރެޔާއިން ޕްޔުންގޔަންގގެ ވައިގެ ސަރަޙައްދަށް ޑްރޯންތަކެއް ފޮނުވި މައްސަލައިގައެވެ. ޕްޔުންގޔަންގުން ތުހުމަތު ކުރި ގޮތުގައި, އެ ރަށަށް ޑްރޯންތަކެއް ފޮނުވައި ދެކުނު ކޮރެޔާއިން ވަނީ ލީފްލެޓް ނުވަތަ ލިޔުންތަކެއް ވައިގެ ތެރެއަށް ދޫކޮށްލާފައެވެ. މި ކަމާ މެދު އުތުރު ކޮރެޔާގެ ޒައީމް ކިމް ޖޮންގ އުންގެ ކޮއްކޮ ކިމް ޔޯ ޖޮންގ ހިތްހަމަ ނުޖެހިފައިވާ ކަމުގައި ވެސް ޕްޔުންގޔަންގުން ބުންޏެވެ. އަދި, އެ ކަމުގެ ބަދަލު ހިފާނެ ކަމުގެ އިންޒާރު ދީފައިވާ ކަމަށް ވެސް ޕްޔުންގޔަންގުން ހާމަކުރިއެވެ.

އުތުރު ކޮރެޔާގެ ޒައީމް ކިމްއާ ދެކޮޅު ލިޔުންތައް ލިޔެފައިވާ ކަރުދާސްތަކެއް ޕްޔުންގޔަންގުގެ ވައިގެ ތެރެއަށް ދޫކޮށްލާފައިވާ ކަމަށް އުތުރު ކޮރެޔާއިން ކުރާ ތުހުމަތުތަކަށް ދެކުނުން ރައްދުދީފައެއް ނެތެވެ. މިއީ, ދެ ކޮރެޔާގެ ދެމެދުގައި މި ފަދަ ހާދިސާއެއް ހިނގާފައިވާ ފުރަތަމަ ފަހަރެއް ނޫނެވެ. މޭ މަހުގެ ތެރޭގައި ކުނި ބަރުކޮށްފައިވާ ބޮޑެތި ފުއްޕާހަންތަކެއް އުތުރު ކޮރެޔާއިން ދެކުނުގެ ވައިގެ ސަރަޙައްދަށް ފޮނުވުމާ ގުޅިގެން ވެސް ދެ ޤައުމުގެ ދެމެދުގައި މަސްރަޙު ހޫނުވިއެވެ.

ދެކުނު ކޮރެޔާގެ ވެރިރަށް ސޯލާއެކު ބާއްވަމުންދާ ގުޅުންތައް ކަނޑައިލަން ޕްޔުންގޔަންގުން ދަނީ މަސައްކަތް ކުރަމުންނެވެ. ދެކުނު ކޮރެޔާއަކީ ވަކި ދައުލަތެއް ކަމަށާއި, އެއީ އުތުރުގެ އެންމެ ބޮޑު ދުޝްމަނުގެ ގޮތުގައި ދެކޭ ކަމުގައި މި އަހަރުގެ ކުރީކޮޅު ކިމް ވަނީ ބުނެފައެވެ. އަދި, ދެ ޤައުމުގެ ދެމެދުގައި ސުލްޙަ ޤާއިމު ކުރުމަށާއި, ދެ ޤައުމު ގުޅައިލުމުގެ މަސައްކަތް ކުރިއަށް ނުގެންދެވޭނެ ކަން ވެސް އޭނާ ވަނީ އިޢުލާނު ކޮށްފައެެވެ.

1950ވަނަ އަހަރު ދެ ކޮރެޔާގެ ދެމެދުގައި ފެށި ހަނގުރާމަ އަދިވެސް ނިމުމަކަށް އައިސްފައެއް ނުވެއެވެ. 1953ވަނަ އަހަރު ސޮއި ކުރި އެއްބަސްވުމެއްގެ ދަށުން ދެ ފަރާތުގެ ދެމެދުގައި ޙަމަލާ ބަދަލު ކުރުން އޮތީ މެދުކަނޑައިލާފައެވެ. ނަމަވެސް, ދެ ޤައުމުގެ ދެމެދުގައި ސުލްޙައިގެ އެއްބަސްވުމެއްގައި ސޮއިކޮށް, ހަނގުރާމަ ނިމުމަކަށް ގެންނަން އެއްބަސްވެފައެއް ނެތެވެ.

ދެ ކޮރެޔާ ގުޅައިދޭ މަގުތަކާއި ރޭލު ދަތުރު ކުރާ މަގު ބިނާ ކޮށްފައި ވަނީ ދެ ޤައުމުގެ ދެމެދުގައި ސޮއިކޮށްފައިވާ އެއްބަސްވުންތަކެއްގެ ދަށުންނެވެ. އެ މަގުތައް ބިނާ ކޮށްފައި ވަނީ, ދެކުނު ކޮރެޔާއިން އުތުރަށް ފޯރުކޮށްދީފައިވާ 132 މިލިޔަން އެމެރިކާ ޑޮލަރުގެ ލޯނު ބޭނުން ކޮށްގެންނެވެ. ދެ ކޮރެޔާގެ ދެމެދުގައި ރޭލު ދަތުރުފަތުރުުގެ ޚިދުމަތް ދިނުމަށް މަގުތަކެއް ބިނާ ކުރުމަށް އިސްވެ އެދިފައި ވަނީ އުތުރުން ކަމުގައި ސޯލުން ހާމަކުރިއެވެ.

ދެ ކޮރެޔާގެ ދެމެދުގައި ގުޅުން ބަދަހި ކުރުމާ ގުޅޭ މަޝްވަރާތައް ބޭއްވުމަށް ބިނާ ކޮށްފައިވާ އޮފީހަކަށް ވެސް އުތުރު ކޮރެޔާއިން ދާދިފަހުން ގެއްލުން ދީފައިވެއެވެ. ދެ ކޮރެޔާގެ ދެމެދުގައި އޮންނަ ރަށެއްގައި ބިނާ ކޮށްފައިވާ އެ އޮފީހަށް ޙަމަލާދީ, އެ ތަން ގޮއްވައިލާފައި ވަނީ 2020ވަނަ އަހަރު އެމެރިކާއާ އެކު ބާއްވަމުން ދިޔަ މަޝްވަރާތަކެއް ފޭލުވުމާ ގުޅިގެންނެވެ. އެ އޮފީސް ގޮއްވައިލުމުން 33 މިލިޔަން އެމެރިކާ ޑޮލަރުގެ ގެއްލުމެއް ލިބިފައިވާ ކަމަށް ބުނެ, ގެއްލުމުގެ ބަދަލު ހޯދަން ދެކުނު ކޮރެޔާއިން ހުސްވި އަހަރު ދަޢުވާ ކުރިއެވެ.