ކުޅިވަރުގައި މަނާ ބޭސް ބޭނުންކުރުމުގެ ސަބަބުން ހަތަރު އަހަރު ދުވަހަށް ސަސްޕެންޑްކޮށްފައިވާ ފްރާންސްގެ މިޑްފީލްޑަރު ޕޯލް ޕޮގްބާ، އޭނާ އަކީ މަކަރުވެރިއެއް ނޫން ކަމަށް ބުނެފިއެވެ.
އިޓަލީގެ ޔުވެންޓަސްއަށް ކުޅެނިކޮށް ހެދި ޓެސްޓުން ޕޮގްބާ ޕޮޒިޓީވްވެ ހަތަރު އަހަރު ދުވަހަށް ސަސްޕެންޑް ކުރުމާއި ގުޅިގެން ޕޮގްބާ ވަނީ އެ މައްސަލަ އިސްތިއުނާފުކޮށްފަ އެވެ. އަދި އިސްތިއުނާފުގެ އަޑުއެހުންތަކަށްފަހު ޕޮގްބާގެ ހަތަރު އަހަރުގެ ސަސްޕެންޝަން ވަނީ 18 މަސް ދުވަހަށް ބަދަލުކޮށްފައެވެ.
އުމުރުން 31 އަހަރުގެ ޕޮގްބާ މިދިޔަ ފެބްރުއަރީ މަހު ސަސްޕެންޑް ކޮށްފައިވާތީ އޭނާގެ ސަސްޕެންޝަން 18 މަސް ދުވަހަށް ކުޑަކުރުމާއިގުޅިގެން އަންނަ އަހަރުގެ މާޗު މަހު އޭނާއަށް އަލުން ކުޅުމުގެ ތެރެއަށް އާދެވޭނެ އެވެ. އަދި ޖެނުއަރީ މަހު ފަރިތަކުރުންތަކުގައި ރަސްމީކޮށް ބައިވެރިވެވޭނެ އެވެ.
ޕޮގްބާ ބުނެފައިވަނީ އޭނާއަކީ ފުޓްބޯޅަ ދެކެ އިންތިހާއަށް ލޯބިވާ މީހެއް ކަމަށާއި އަދި އެ ކުޅިވަރާއި ދުރުގައި ހުންނަން ޖެހޭފަދަ އެއްވެސް ކަމެއް އޭނާ ނުކުރާނެ ކަމަށެވެ. އަދި އޭނާއަކީ މަކަރުވެރިއެއް ނޫން ކަމަށްވެސް ޕޮގްބާ ވަނީ ބުނެފަ އެވެ.
ޕޮގްބާ އިތުރަށް ބުނެފައިވަނީ އޭނާ ފުރިހަމައަށް އެ ޒިންމާ ނަގާ ކަމަށާއި ޑޮކްޓަރެއްގެ ލަފާގެ މަތިން ނަމަވެސް އޭނާ އެ ބޭސް ބޭނުންކޮށްފައިވާތީ އެކަމުގެ ފުރިހަމަ ޒިންމާ ނަގާ ކަމަށެވެ.
އިނގިރޭސިވލާތުގެ މެންޗެސްޓަރ ޔުނައިޓެޑްގެ ކޮންޓްރެކްޓް ހަމަވުމުން ޕޮގްބާ ޔުވެންޓަސް އާއި ގުޅިފައިވަނީ 2022 ވަނަ އަހަރު އެވެ. އަދި އޭނާއާއި އެކު އެ ކްލަބުން ހަދާފައިވާ ކޮންޓްރެކްޓްގެ މުއްދަތު 2026 ވަނަ އަހަރުގެ ނިޔަލަށް ހަމަވާއިރު, އަނިޔާގެ ސަބަބުން 2022 ވަނަ އަހަރު ޕޮގްބާއަށް ކުޅެފައިވަނީ އެންމެ 12 މެޗެވެ.