ޔުއެފާ ނޭޝަންސް ލީގުގައި މިދިޔަ ހޯމަ ދުވަހުގެރޭ ޖަރުމަނުން ކުޅުނު މެޗުގައި ލިބުނު އަނިޔާއަކާ ގުޅިގެން ބަޔާ ލެވަކޫސަންގެ ފްލޯރިއަން ވާޓްޒްއަށް އެ ޓީމަށް ކުރިއަށް އޮތް މެޗުގައި ކުޅެވިދާނެކަމާ މެދު ސުވާލު އުފެދިއްޖެއެވެ.
ނެދަލެންޑްސްއާ ދެކޮޅަށް ޖަރުމަނު ކުޅުނު އެ މެޗުން 1-0 އިން މޮޅުވިއިރު، ވާޓްޒް ވަނީ ފުރަތަމަ އެގާރައިގައި ހިމެނިގެން ކުޅެފައެވެ. އެކަމަކު، އެ މެޗުގެ ފުރަތަމަ ހާފުގައި ވާޓްޒްގެ ފައިގެ ކުޑަހުޅަށް ލިބުނު މިއަނިޔާއާ ގުޅިގެން ވަނީ ބަދަލުކޮށްފައެވެ.
އެއަށްފަހު، މި ހަފްތާގެ އަންގާރަ ދުވަހު ހެދި އެމްއާރްއައި ސްކޭނުން ދައްކާގޮތުގައި، ވާޓްޒްގެ ކަނާތުފައިގެ ކުޑަހުޅުގެ ކެޕްސިއުލާ އަށް އަނިޔާވެފައިވާކަން ވަނީ ކަށަވަރުވެފައެވެ.
މިހާރު ވާޓްޒް ވަނީ މި އަނިޔާއަށް ލެވަކޫސަންގައި ފަރުވާ ހޯދަން ފަށާފައި ކަމަށާއި، އެކަމަކު އޭނާއަށް އެނބުރި ޓީމުގެ ފަރިތަކުރުންތަކުގައި ބައިވެރިވެވޭނީ ކިހާ ދުވަހަކުން ކަމެއް ބުނަން އަދި ނޭނގޭ ކަމަށް އެ ކްލަބުން ވަނީ ހާމަކޮށްފައެވެ.
ބެލެވޭގޮތުގައި، ވާޓްޒް އަށް ލިބުނު މި އަނިޔާގެ ސަބަބުން ކުރިއަށް އޮތް ހަފްތާބަންދުގައި ޖަރުމަނު ލީގުގައި އަމިއްލަ ދަނޑުގައި އެއިންޓްރަކްޓް ފްރޭންކްފާޓާ ދެކޮޅަށް ކުޅެންޖެހޭ މެޗު ގެއްލޭނެއެވެ.
ވާޓްޒްގެ ބަދަލުގައި ލެވަކޫސަންގައި އެ މަގާމަށް ކުޅެވިދާނެ ކުޅުންތެރިން މަދުނޫން ނަމަވެސް، އެ ޓީމުން ނިމިދިޔަ ސީޒަނުގައި މެޗަކުން ބަލިނުވެ ލީގު ނެގިއިރު އޭނާ ވަނީ ތަފާތު މޮޅު ކުޅުމެއްދައްކާފައެވެ. ވާޓްޒްގެ ބަދަލުގައި އެ ޓީމުގެ ކޯޗު، ޒާބީ އަލޮންސޯ އަށް އޭނާ ކުޅޭ މަގާމުގައި ބޭނުންކުރެވިދާނެ ކުޅުންތެރިންގެ ތެރޭގައި، ޖޯނަސް ހޮފްމަން، މާޓިން ޓެރިއާ އާއި ނޭތަން ޓެލާ ހިމެނެއެވެ.
ލެވަކޫސަން މިވަގުތު އޮތީ ލީގުގެ ފަސްވަނައިގައެވެ. އެއީ، ތާވަލްގެ އެއްވަނައިގައި އުޅޭ ބަޔާން މިއުނިކަށް ވުރެ ތިން ޕޮއިންޓް މަދުން ލިބިގެންނެވެ.