ސްޓުޓްގާޓާ ދެކޮޅަށް ޖަރުމަން ލީގުގައި ބަޔާން މިއުނިކުން ކުޅުމަށް ހަމަޖެހިފައިވާ މެޗުގައި އަނިޔާގެ ސަބަބުން ޖަރުމަނުގެ މިޑްފީލްޑަރު ޖަމާލް މުސިއާލާއަށް ނުކުޅެވޭނެ ކަމަށް މީޑިއާ ރިޕޯޓުތައް ބުނެފިއެވެ.
އުމުރުން 21 އަހަރުގެ މުސިއާލާ އެންމެ ފަހުން ބަޔާނަށް ކުޅެފައިވަނީ ޔުއެފާ ޗެމްޕިއަންސް ލީގުގައި މި މަހުގެ ދެވަނަ ދުވަހު އެސްޓަން ވިލާ އަތުން 1-0 އިން ބަލިވި މެޗުގައެވެ. އޭގެ ދެ ދުވަސް ފަހުން، ބަޔާނުން ވަނީ މުސިއާލާ އަށް ލިބިފައިވާ އަނިޔާގެ ސަބަބުން ދުވަސްތަކަކަށް ކުޅުމާ ދުރުގައި ހުންނަން ޖެހޭނެ ކަމަށް ބުނެފައެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ބަޔާންގެ ކޯޗު، ވިންސެންޓް ކޮމްޕެނީ ބުނީ މިރޭގެ މެޗަށް އެކުލަވާލާ ސްކޮޑުގައި އޭނާ ނުހިމެނޭނެ ކަމަށް ބުނެފައެވެ.
ބަޔާންގެ ކޯޗު، ކޮމްޕެނީ ވަނީ، އެ ޓީމުގެ ފްރާންސް ޑިފެންޑަރު، ޑަޔޮޓް އުޕަމެކާނޯ އަށް ވެސް ކުރިއަށް އޮތް ސްޓުޓްގާޓް މެޗުގައި ކުޅެވޭނެކަމާމެދު ޔަގީންކަމެއް ނެތް ކަމަށް ބުނެފައެވެ. އެހެންކަމުން، އުޕަމެކާނޯ ނެތްތަން ފޫބެއްދުމަށްޓަކައި ސެންޓްރަލް ޑިފެންސްގައި ކިމް މިން-ޖޭ އާއެކު އެރިކް ޑަޔާ ނުވަތަ ލެއޮން ގްރެޓްޒްކާ ބޭނުންކުރުން އެކަށީގެންވާ ކަމަށް ހަބަރުތައް ބުނެއެވެ.
ބަޔާނުން މި ފަހަރުގެ ސީޒަނުގައި އައު ކޯޗު، ކޮމްޕެނީ އާއެކު މިހާތަނަށް ލީގުގައި ބަލިނުވެ ހަ މެޗު ފުރިހަމަކޮށްފައިވާއިރު، ތާވަލްގެ އެއްވަނައިގައި އޮތީ ފައިދާގޯލްގެ ތަފާތުންނެވެ. ބަޔާންގެ އިތުރުން ދެވަނައިގައި އޮތް އާރްބީ ލީޕްޒިގަށް ވެސް ހަ މެޗުން ލިބިފައިވަނީ 14 ޕޮއިންޓެވެ.
ނިމިދިޔަ ސީޒަނުގެ ލީގުގައި މޮޅު ކުޅުމެއް ދައްކާ ރަނަރަޕް މަގާމު ހާސިލްކުރި ސްޓުޓްގާޓުން މި ފަހަރުގެ ސީޒަނުގައި މިހާތަނަށް މަސްހުނި ނަތީޖާތަކެއް ހޯދާފައިވާއިރު، ސެބާސްޓިއަން ހޮއެނެސްގެ އިރުޝާދުގެ ދަށުން ކުޅެމުން އަންނަ އެ ޓީމުން ވަނީ އަމިއްލަ ދަނޑުގައި 5-1 ގެ ތަފާތު ބޮޑު ނަތީޖާއަކުން ބޮރޫޝިއާ ޑޯޓްމުންޑް ބަލިކޮށްފައެވެ. ސްޓުޓްގާޓް އޮތީ ހަ މެޗުން ލިބުނު ނުވަ ޕޮއިންޓާއެކު އަށްވަނައިގައެވެ.