ސްޕެނިޝް ލަލީގާގައި މިރޭ ކުޅުމަށް ހަމަޖެހިފައިވާ އެލް ކްލަސިކޯ މެޗުން ވާދަވެރި ރެއާލް މެޑްރިޑް އަތުން އޭނާގެ ބާސެލޯނާ މޮޅުވާންޖެހޭ ކަމަށް ކޯޗު ހަންސީ ފްލިކް ބުނެފިއެވެ.
ބާސެލޯނާގެ ކޯޗު، ފްލިކް މިހެން ބުނީ، މެޗުގެ ކުރީން ނޫސްވެރިންނާ ވާހަކަދައްކަމުންނެވެ.
"އަހަރެމެން އެލް ކްލެސިކޯ ކާމިޔާބުކުރަން ޖެހޭނެ. އެއީ އަހަރެމެންގެ މަސްއޫލިއްޔަތެއް. ފުޓްބޯޅަ ކުޅެން ފަށާ ހިސާބުން ކޮންމެ މީހަކުވެސް އެލް ކްލެސިކޯގައި ކުޅެން ބޭނުންވޭ." ފްލިކް ބުންޏެވެ.
މި ފަހަރުގެ ސީޒަނުގެ ހުރިހާ މުބާރާތެއްގައި ވެސް ރަނގަޅު ކުޅުމެއްދައްކަމުންއަންނަ ބާސެލޯނާ އަށް ކުރިއަށް އޮތް މެޗުގެ މުހިއްމުކަމުގެ ވާހަކަ ކޯޗު، ފްލިކް ވަނީ ފާހަގަކޮށްފައެވެ. އަދި، މި ދެ ޓީމުގެ މެދުގައި ކުޅެވިގެންދާ މެޗަކީ ފުޓްބޯޅައިގެ ވާދަވެރިކަމުގެ އެންމެ މަތީ ފަންތީގައި ގުނާލެވޭ އެއްމެޗުގެ ގޮތުގައި އޭނާ ވަނީ ސިފަކޮށްފައެވެ.
ފްލިކް ބުނީ، ޖަރުމަނުގައި ވެސް ބައެއް މެޗުތަކަށް ކްލެސިކޯ ކިޔާ ކަމަށާއި، އެކަމަކު، ހަގީގީ އެލް ކްލެސިކޯ އަކީ ބާސާއާ ރެއާލް ދެމެދު ކުޅެވޭ މެޗު ކަމަށެވެ. އަދި، މި ދެ ޓީމުގެ މެދުގައި ކުޅެވިގެންދާ އެއްވަރުގެ އެހެން މެޗެއް ނެތް ކަމަށް ވެސް ފްލިކް ބުންޏެވެ.
"ހުރިހާ އެންމެންވެސް ތިބީ ވަރަށް އުފަލުން. އެމީހުން ވެސް އެކަމުގެ މަޖާ ނަގަންވާނެ. އަދި މަޖާ ނެގުމަށްޓަކައި ގަދައަޅައި މަސައްކަތްކުރަންޖެހޭ. އަހަރެމެންވެސް އެކަން ކުރާނަން." ފްލިކް ބުންޏެވެ.
މިހާތަށް މި ސީޒަނުގައި ބާސެލޯނާ އިން ދަނީ ރަނގަޅު ފެށުމަކާއެކު ގިނަ ގޯލްތަކެއް ޖަހަމުންނެވެ. އޭގެތެރޭގައި، ރަނގަޅު ފޯމެއްގައި ހުރި އެ ޓީމުގެ ޕޮލެންޑް ފޯވާޑް، ރޮބަޓް ލެވަންޑޯސްކީގެ ކުޅުން ވަކިން ފާހަގަކޮށްލެވެއެވެ. އޭނާގެ ކުރީގެ ކޯޗު، ފްލިކްގެ އިރުޝާދުގެ ދަށުން ބާސެލޯނާގައި ވަނީ މިހާތަނަށް ކުޅުނު 13 މެޗުގައި 15 ލަނޑުޖަހައިފައެވެ. މިވަގުތު ލީގުގެ ލަނޑުލިސްޓުގެ އެންމެ ކުރީގައި އުޅެނީ ވެސް ލެވަންޑޯސްކީ އެވެ. މީގެއިތުރުން، ބާސެލޯނާ އެންމެ ފަހުން ޔުއެފާ ޗެމްޕިއަންސް ލީގުގައި ބަޔާން މިއުނިކާ ދެކޮޅަށް ކުޅުނު މެޗުގައި ހެޓްރިކް ހެދި ބްރެޒިލްގެ ވިންގް، ރަފީނިއާ ވެސް މިވަގުތު ހުރީ ރަނގަޅު ފޯމެއްގައެވެ.
ނަމަވެސް، ފްލިކް ދެކޭގޮތުގައި ބާސެލޯނާ އަށް އަދިވެސް ރަނގަޅުކުރެވޭނެ ކަންކަން އެބަހުއްޓެވެ.
"އަހަރެމެން އަދިވެސް ކުޑަކޮށް ރަނގަޅުކޮށްލަންޖެހޭ ކަންތައް އެބަހުރި،" ފްލިކް ބުންޏެވެ.
"ކޮންމެ މެޗަކާއެކުވެސް އެކަން އެހެން އޮވޭ. އަހަރެމެންނަށް ދެން އޮތް މެޗަށް ފުރިހަމައަށް ތައްޔާރުވާންޖެހޭ. ރެއާލްއާ ދެކޮޅަށް ވެސް ކަންކުރަން މިޖެހެނީ އެގޮތަށް." ފްލިކް ބުންޏެވެ.
ފްލިކް ވަނީ، މީގެކުރީން ބަޔާންގެ އިތުރުން ލީގުގެ އެހެން ޓީމުތަކާ ދެކޮޅަށް ވެސް ބާސެލޯނާ ކުޅެފައިވާ މެޗުތަކަށް މިސާލުޖަހައިފައެވެ. އެ ޓީމުތަކުގައި ވަރަށް ހަލުވި ކުޅުންތެރިން ތިބި ކަމަށާއި، ކުރިއަށް މިއޮތް ރެއާލްގައި ދުނިޔޭގެ ފެންވަރުގެ މޮޅު ގިނަ ކުޅުންތެރިންތަކެއް ތިބިކަން ފްލިކް ފާހަގަކުރިއެވެ.
ވޭތުވެދިޔަ މެޗުތަކުގައި ބާސެލޯނާ ދެއްކި ކުޅުމަށް ބަލާއިރު، ކުރިއަށް އޮތް މެޗާ ކުރިމަތިލާއިރު އޭނާގެ ޓީމަށް ވަރަށް ބޮޑަށް އިތުބާރު ކުރާ ކަމަށާއި، ބަޔާން މެޗުގައި ކޮންމެވެސް ވަރަކަށް އުނދަގޫތައް ކުރިމަތިވިނަމަވެސް ފަހުން ވަރަށް ފުރިހަމަ ކުޅުމެއްދައްކާފައިވާ ކަމަށް ވެސް ފްލިކް ވަނީ ބުނެފައެވެ.
ނިންމާލަމުން ފްލިކް ބުނީ، އޭނާގެ ޓީމުން ބޯޅަ އާއެކު އަދި ބޯޅަ ނެތި ވެސް ވަރަށް ރަނގަޅު ކުޅުމެއް ދައްކާ ކަމަށެވެ. އަދި، އެފަދަ ކުޅުމަކަށް އެކަށޭނަ ކޮލިޓީ ކުޅުންތެރިން އެ ޓީމުގައި އެބަތިބިކަމަށް ވެސް ފްލިކް ބުންޏެވެ. އޭނާ ދެކެން ބޭނުންވާ ގޮތަށް، ހުރިހާ ކުޅުންތެރިން އެކަކު އަނެކަކަށް އެހީތެރިވެ، ފުރިހަމަ އަށް މަސައްކަތްކުރާ ކަމަށާއި، އޭނާގެ ޓީމުގެ އެންމެ ބޮޑު ސްޓްރެންތަކީ ވެސް އެއީ ކަމަށް ފްލިކް ބުނެފައިވެއެވެ.
ލީގުގެ އެންމެ ކުރީގައި އުޅޭ ބާސެލޯނާއާ ދެވަނައިގައި އޮތް ރެއާލްގެ މެދުގައި ކުޅުމަށް ހަމަޖެހިފައިވާ މި މެޗު ފަށާނީ ރާއްޖޭގަޑިން މިރޭ ދަންވަރު 12 ޖަހާއިރު އެވެ.