އިނގިރޭސި ޕްރިމިއަރ ލީގުގައި ރޭ ސައުތެމްޓަނާ ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް، ތާވަލުގެ އެއްވަނަ މަގާމު މެންޗެސްޓާ ސިޓީން ހޯދައިފިއެވެ.
ލީގުގައި މިހާތަނަށް ސިޓީ 9 މެޗު ކުޅެފައިވާއިރު އެ ޓީމަށް ވަނީ 23 ޕޮއިންޓާއެކު އެއްވަނަ މަގާމް ލިބިފަ އެވެ. ދެވަނައިގައި އޮތް ލިވަޕޫލްއަށް 8 މެޗުން 21 ޕޮއިންޓް ލިބިފައިވާއިރު މިއަދު އާސެނަލް އާއި ދެކޮޅަށް ކުޅޭ މެޗު ކާމިޔާބުކޮށްގެން އަލުން ލިވަޕޫލް އަށް ތާވަލުގެ ކުރި ހޯދުމުގެ ފުރުސަތު އެބައޮތެވެ.
މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 5 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ އާލިން ހާލަންޑް އެވެ. މިއީ ހާލަންޑް މި ސީޒަނުގައި ޖެހި 11 ވަނަ ލަނޑެވެ.
މިއީ ޕްރިމިއާ ލީގުގައި މެންޗެސްޓަރ ސިޓީން ބަލިނުވެ ހަމަކުރި 32 ވަނަ މެޗެވެ. ލީގުގައި އެންމެ ފަހުން ސިޓީ ބަލިވެފައިވަނީ މިދިޔަ އަހަރުގެ ޑިސެމްބަރ މަހުގެ 6 ވަނަ ދުވަހު އެސްޓަން ވިލާ އަތުންނެވެ.
މެޗުގެ ވަރަށް ކުރީކޮޅު ސިޓީން ލީޑު ނެގުމާއިއެކު ގިނަ ބަޔަކު ގަބޫލުކުރީ މި މެޗުގައި ސިޓީން ތަފާތު ބޮޑު ނަތީޖާއެއް ނެރޭނެ ކަމަށެވެ. ނަމަވެސް ސައުތެމްޓަން އަށް ލަނޑެއް ކާމިޔާބުކުރެވިފައިނުވި ނަމަވެސް އެ ޓީމުން ވަނީ ސިޓީ އާއި ދެކޮޅަށް ރަގަޅު ކުޅުމެއް ދައްކާފަ އެވެ.
މި މެޗުން ސައުތެމްޓަން ބަލިވެފައިވާއިރު ލީގުގައި މިހާތަނަށް އެ ޓީމު 9 މެޗު ކުޅެފައިވާއިރު އެއްވެސް މެޗަކުން މޮޅުވެފައެއް ނުވެއެވެ. އަދި އެއް މެޗުން އެއްވަރުވެ ލިބުނު ހަމައެކަނި ޕޮއިންޓާއެކު އެ ޓީމު އޮތީ ތާވަލުގެ ފުލުގަ އެވެ.