ނުފޫޒެއް ނެތް، ދެތިންމަހުން ގޯތިތަކުގެ ރަޖިސްޓްރީ ހަވާލުކޮށް ނިމޭނެ: ގެދޮރުވެރިކަމާބެހޭ ވަޒީރު

ގުޅިފަޅުން ގޯތި ލިބުނު މީހުންނަށް ރަޖިސްޓްރީ ހަވާލުކުރުމުގެ މަސައްކަތް ކުރިއަށް އޮތް ދެތިން މަހުގެ ތެރޭގައި ނިންމާލެވޭނެކަމަށް ގެދޮރުވެރިކަމާއި ބިމާ އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ. ވަޒީރު މިފަދައިން ވިދާޅުވީ ގުޅިފަޅުން ގޯތި ލިބުނު މީހުންނަށް ލިބޭ ބިން ކަނޑައެޅުމުގެ ގުރުއަތުލުން ކުރިއަށް ދާ ގޮތާ ގުޅޭގޮތުން ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.

ގެދޮރުވެރިކަމާއި ބިމާ އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވީ ގުޅިފަޅު ތަރައްޤީކުރުމަށްޓަކަށް ކުރީ ސަރުކާރުން އެކުލަވާލާފައިވާ ލޭންޑް ޔޫސް ޕްލޭނަކީ އެކަށީގެންވާ ގޮތެއްގައި ހަދާފައިވާ ޕްލޭނެއް ނޫންކަމަށެވެ. އެހެންނަމަވެސް މިހާރު އެކުލަވާލާފައިވާ ލޭންޑް ޔޫސް ޕްލޭންއަކީ އެތަނުގައި ދިރިއުޅޭ މީހުންނަށް ވީހާވެސް ހިތްފަސޭހަ މާހައުލެއްގައި ދިރިއުޅެވޭނެ މަގު ތަނަވަސްކޮށްދެވޭނެ ގޮތަކަށް ހަދާފައިވާ ޕްލޭނެއްކަމަށް ވަޒީރު ވިދާޅުވިއެވެ. އަދި ގުޅިފަޅު ވާނީ އިޖްތިމާޢީ ބޭނުންތަކާއި އިޤްތިޞާދީ ބޭނުންތަކާއި މުނިފޫހި ފިލުވުމުގެ ގޮތުން ކުޅިވަރު ކުޅޭވޭނެ ސަރަހައްދުތައްވެސް ކަނޑައަޅައިގެން ތައްޔާރުކޮށްފައިވާ ލޭންޑް ޔޫސް ޕްލޭނަކަށްކަމަށް ވަޒީރު ވިދާޅުވިއެވެ.

ޙައިދަރު ވިދާޅުވީ ގޯތި ލިބުނު މީހުންނަށް ބިން ކަނޑައެޅުމުގެ ކަންކަން ކުރިއަށް ގެންދަނީ އިންސާފުވެރިކަމާއެކީގައި ކަމަށާއި އެއްވެސް މީހެއްގެ ނުފޫޒެއް ނޯންނާނެކަމަށެވެ. އަދި ގޯތި ލިބުނު މީހުންނަށް ރަޖިސްޓްރީ ހަވާލުކުރުމުގެ މަސައްކަތްތައް ދެތިން މަހެއްގެ ތެރޭގައި ނިންމާލެވޭނެކަމަށާއި، ބިން ކަނޑާ ހަވާލުކުރެވޭނީ ތިލަމާލެ ބްރިޖްގެ މަސައްކަތް ނިމުމުންކަމަށްވެސް ވަޒީރުވެ.

"ހިއްކާފައި އޮތް ބިންތަކަށް ރަޖިސްޓްރީދެވޭނެ ޤަވާއިދު އޮންނަގޮތުން ނުހިއްކާ ބިމުން ރަޖިސްޓްރީއެއް ނުދެވޭނެ. ނަމަވެސް ލިޔުމެއް ދޭނެ." ގެދޮރުވެރިކަމާއި ބިމާ އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވިއެވެ.

ގުޅިފަޅުން 7 ސައިޒެއްގެ ޖުމުލަ 3520 ގޯތި ދޫކުރެއެވެ. މިފަރާތްތަކުގެ ގުރުއަތުނެގުމުގެ ކަންކަން ކުރިއަށް ގެންދަނީ ގެދޮރުވެރިކަމާ ބެހޭ ވުޒާރާއިން އެކުލަވާލާފައިވާ ލިސްޓުގައިވާ ތަރުތީބުންނެވެ. އަދި މިހާރު އެކުލަވާލާފައިވާ ލޭންށް ޔޫސް ޕްލޭންއާއި ގޯތި ލިބުނު ސަރަޙައްދު ހިޔާވަހި ޕޯޓަލްއިން ފެންނަން ހުނާނެއެވެ.

ގުޅ\ިފަޅުގެ ކުރީގެ ލޭންޑް ޔޫސް ޕެލޭނުގައި ސިނާޢީ މަސައްކަތްކުރާ ސަރަހައްދާއި މީހުން ދިރިއުޅޭ ސަރަހައްދާ ދެމެދު 100 ފޫޓުގެ ދުރުމިންވެސް ނެތެވެ. އަދި ރައްޔިތުންނަށް ޢާންމު ޚިދުމަތްތައް ފޯރުކޮށްދޭ ތަންތަނަށް މީހުން ދިރިއުޅޭ ސަރަހައްދާ ދުރުކަމަށްވެސް ފާހަގަކޮށްފައިވެއެވެ. އަދި އެކަށީގެންވާވަރަށް ކުޅިވަރު ކުޅޭނެ ތަންތަނާއި ޕާކުތައް މީހުން ދިރިއުޅޭ ސަރަހައްދުތަކުގައި ހިމަނާފައިނުވެއެވެ. މީގެ އިތުރުން ގްރީން ސްޕޭސްގެ ގޮތުގައި ކަނޑައަޅާފައިވަނީ އެންމެ 8 އިންސައްތައެވެ.

އެހެންނަމަވެސް މިހާރު ގެދޮރުވެރިކަމާ ބެހޭ ވުޒާރާއިން އެކުލަވާލާފައިވާ ލޭންޑް ޔޫސް ޕްލޭންގައި ބިމުގެ 21 އިންސައްތަ ކަނޑައަޅާފައިވަނީ ޕާކުތަކަށާއި ގްރީން ސްޕޭސްތަކަށެވެ. އަދި މީހުން ދިރިއުޅޭ ސަރަހައްދުތަކުން ސްކޫލުތަކާއި ހުންނަނީ 10 މިނެޓުން ހިނގާފައިވާ ދެވޭވަރުގެ ދުރުމިނެކެވެ. އަދި މިސްކިތްތަކާ ދެމެދު ހުންނަނީ 5 މިނެޓުން ހިނގާފައި ދެވޭވަރުގެ ދުރުމިނެކެވެ. އަދި މި ލޭންޑް ޔޫސް ޕްލޭނުގައި މުޅި ގުޅީފަޅުގައި ވެހިކަލް ޕާކުކުރުމަށް 70،000 ޕާކިން ސަރަހައްދު ކަނޑައަޅާފައިވެއެވެ.