ޖަރުމަން ކަޕުގެ ދެވަނަ ބުރުގައި ރޭ ކުޅުނު މެޗުގައި ޖަމާލް މުސިއާލާ ހެދި ހެޓްރިކާއެކު ބަޔާން މިއުނިކުން 4-0 ގެ ނަތީޖާއަކުން މައިންޒް ބަލިކޮށްފިއެވެ.
މައިންޒްގެ ދަނޑުގައި ކުޅުނު މި މެޗު ފެށިތާ 90 ވަރަކަށް ސިކުންތުގެ ތެރޭގައި ބަޔާނުން ލީޑްނެގީ މުސިއާލާ ޖެހި ލަނޑުންނެވެ. އޭގެފަހުން، މެޗުގެ 37 ވަނަ މިނެޓުގައި މުސިއާލާ ވަނީ ބަޔާނަށް ދެ ލަނޑުގެ ލީޑެއްނަގައިދީފައެވެ. މި ދެ ލަނޑުޖެހުމަށް އެހީތެރިވެދިނީވެސް އެ ޓީމަށް ކުޅެމުން އަންނަ އިނގިރޭސި ފޯވާޑް، ހެރީ ކޭންއެވެ.
ފުރަތަމަ ހާފުގެ އިތުރުވަގުތުގެ އެއްވަނަ މިނެޓުގައި ބަޔާންގެ ތިންވަނަ ލަނޑުޖަހައިދިނީ އަލްފޮންސޯ ޑޭވީސް ދިން ބޯޅައަކުން ލެރޯއީ ސާނޭއެވެ. އަދި އޭގެފަހުން، އިތުރުވަގުތުގެ ހަތަރުވަނަ މިނެޓުގައި މުސިއާލާ ވަނީ ހެޓްރިކް ފުރިހަމަކޮށް ބަޔާންގެ ހަތަރުވަނަ ލަނޑުޖަހައިދީފައެވެ.
މި މުބާރާތުގައި ރޭ ކުޅުނު އަނެއް މެޗުގައި މި ފަހަރުގެ ޖަރުމަން ލީގުގައި ރަނގަޅު ކުޅުމެއް ދައްކަމުން އަންނަ ޔޫނިއަން ބާލިން ވަނީ ތިންވަނަ ޑިވިޝަނުގެ އާމީނިއާ ބިލެފީލްޑް އަތުން 2-0 ގެ ނަތީޖާއަކުން ބަލިވެ، މުބާރާތުން ކަޓާފައެވެ.
އަދި އެއިންޓްރަކްޓް ފްރެންކްފަޓުން އެއް ކުޅުންތެރިއަކު މަދުކޮށް ކުޅެ، ބޮރޫޝިއާ މުންޗެންގްލަޑްބަކް އަތުން މޮޅުވީ 2-1 ގެ ނަތީޖާއަކުންނެވެ. މީގެ އިތުރުން ހެއިޑެންހެއިމް އަތުން ދެވަނަ ޑިވިޝަނުގެ ހާތާ ބާލިން 2-1 ގެ ނަތީޖާއަކުން މޮޅުވިއިރު، ވާޑާ ބްރޭމަނުން ވަނީ 1-0 ގެ ނަތީޖާއަކުން ޕަޑެބޯން ބަލިކޮށް، އަނެއް ބުރަށް ދަތުރުކޮށްފައެވެ.