ސަބްސިޑީގެ ނިޒާމަށް ގެންނަ ބަދަލުތައް ތަންފީޒުކުރާނީ ފިޔަވަހިތަކަށް ބަހާލައިގެން: މާލީ ވަޒީރު

ސަބްސިޑީގެ ނިޒާމަށް ގެންނަ ބަދަލުތައް ތަންފީޒުކުރާނީ ފިޔަވަހިތަކަށް ބަހާލައިގެން ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ ރައްޔިތުން މަޖިލީހުގެ ބަޖެޓު ދިރާސާ ކުރާ ކޮމިޓީގެ ބައްދަލުވުމުގައެވެ.

ބަޖެޓު ދިރާސާކުރާ ކޮމެޓީއަށް މާލީ ވަޒީރުގެ އިތުރުން މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަދު މުނައްވަރާއި، އޮޑިޓަރ ޖެނެރަލް ޙުސައިން ނިޔާޒީ ވަނީ ހާޒިރުކޮށްފައެވެ.

މި ބައްދަލުވުމުގައި މާލީ ވަޒީރު މޫސާ ޒަމީރު ވިދާޅުވީ ދައުލަތުގެ ޚަރަދުތައް ކުޑަކުރުމަށް އިސްލާޙީ ގިނަ ފިޔަވަޅުތަކެއް އެޅުމަށް ސަރުކާރުން ނިންމާފައިވާއިރު، އެ ފިޔަވަޅުތައް ތަންފީޒުކުރުމުގައި އެންމެ ބޮޑު އިސްކަމެއް ދިނުމަށް ހަމަޖެހިފައިވަނީ ރައްޔިތުންނަށް އެ ބަދަލުގެ ސަބަބުން އުފުލަންޖެހޭނެ ބުރަ ކުޑަކުރުމަށްކަމަށެވެ.

އެގޮތުން ގެންނަ އެއް ބަދަލަކީ ސިފައިންނާއި ފުލުހުންގެ ހެލްތު އިންޝުއަރެންސް ނިޒާމެވެ. އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓުގައި ބުނެފައިވަނީ ސިފައިންނާއި ފުލުހުންގެ އާއިލާތަކަށް ޕްރައިވެޓް އިންޝުއަރެންސް ޕެކޭޖެއް ހަމަޖައްސައި، ދައުލަތުން ޚަރަދުކުރަން ޖެހޭ އަދަދު ކޮންޓްރޯލް ކުރުމަށެވެ. އަދި ޕްރައިވެޓް އިންޝުއަރެންސް ހަމަވުމަށް ފަހު، އާސަންދަ ނިޒާމުގެ ތެރެއިން ވެސް ސިއްޙީ ފަރުވާ ލިބޭނެކަމަށް ބުނެފައިވެއެވެ.

ބަޖެޓު ދިރާސާ ކުރާ ކޮމެޓީގެ ބައްދަލުވުމުގައި މާލީ ވަޒީރު މޫސާ ޒަމީރު ވިދާޅުވީ ސިފައިންނާއި ފުލުހުންގެ އާސަންދަ ނިޒާމު ޕްރައިވެޓު އިންޝުއަރެންސް ސްކީމަކަށް ބަދަލުކުރި ނަމަވެސް އަމިއްލަ ޖީބުން ހޭދަ ކުރަން ނުޖެހޭނެ ކަމަށެވެ.

"ރައީސް ނިންމަވާފައި އޮތީ މިހާރުވެސް ކޮށްދޭގޮތަށް ކޮށްދޭނެ، އަމިއްލަ ބަޔަކާއި ހަވާލުކޮށްގެން ކުރުމުން ޚަރަދުތައް އޮޕްޓިމައިޒުކޮށް ޚަރަދުތައް ބަލަހައްޓާނެ، އެހެންވެ އަމިއްލަ ބަޔަކާއި ހަވާލުކޮށްގެން ކުރިއަށްގެންދަން ލަފާ އެރުވީ" ވަޒީރު ވިދާޅުވިއެވެ.

ވަޒީރު މޫސާ ޒަމީރު ވިދާޅުވީ ސަބްސިޑީގެ ނިޒާމަށް އަންނަ އަހަރުތެރޭ ބޮޑު ބަދަލެއް ގެނައުމަށް ނިންމާފައިވާއިރު، މިއީ ރައްޔިތުންނާއި ސީދާ ގުޅުންހުރި ބަދަލެއް ކަމަށެވެ. އެހެންކަމުން އެފަދަ ބަދަލެއް ގެނައުމުގައި ރައްޔިތުންނަށް އެބަދަލުގެ ސަބަބުން ބުރައެއް އުފުލަން ނުޖެހޭނެ ފަދަ ގޮތަކަށް ކަންކަން އިންތިޒާމުކުރުމަށް ޚާއްސަ ސަމާލުކަމެއް ސަރުކާރުން ދެއްވާނެ ކަމަށް ވިދާޅުވިއެވެ. އަދި އެބަދަލު ގެންނާނީ ޓެސްޓިން މަރުހަލާއަކާއެކު ކަމަށެވެސް މާލީ ވަޒީރު ވިދާޅުވިއެވެ.

"މަސައްކަތް ފަށާތާ 6 ހަފްތާތެރޭ ނިންމޭނެ، އެއްފަހަރާ މުޅި ރާއްޖޭގައި ރޯލް އައުޓެއް ނުކުރާނެ، ވަކިން ޓެސްޓުކޮށްފައި ކުރާނެ، ރައްޔިތުންނަށް ބުރައެއް އުފުލަން ނުޖެހޭނެ ކަމުގެ ޔަޤީންކަން އަރުވަން" ވަޒީރު ޒަމީރު ވިދާޅުވިއެވެ.

އެންމެ ބޭނުންޖެހިފައިވާ މީހުންނަށް ޢަމާޒުކޮށްގެން ސަބްސިޑީ ދޭންފެށުމުން، ރައްޔިތުންގެ ފުދުންތެރިކަން އިތުރުވެގެންދާނެ ކަމަށް މާލީ ވަޒީރު ވިދާޅުވިއެވެ.

ސަރުކާރުން އަންނަނީ އަންނަ އަހަރުގެ އޭޕްރީލް މަހުން ފެށިގެން ސަބްސިޑީ ނިޒާމަށް ބަދަލުތަކެއް ގެންނަން މަސައްކަތްކުރަމުންނެވެ.

މާލީ ވުޒާރާއިން ވަނީ މިހާރު ދެމުންދާ ސަބްސިޑީތައް ކަނޑާލުލުމުން އާބާދީގެ އެންމެ ފަޤީރު %20ގައި އުޅޭ ގޭބީސީތަކުގެ ޚަރަދު 1770 ރުފިޔާއަށް އިތުރުވާނެ ކަމަށް ލަފާ ކުރެވޭކަމަށް ވިދާޅުވެފައެވެ. ނަމަވެސް ސީދާ ގޭބީސީތަކަށް ފައިސާ ދޭ ނިޒާމަކަށް އެނިޒާމު ބަދަލުވާއިރު، ގޭބީސީތަކަށް މަހަކު ގާތްގަނޑަކަށް 2450 ރުފިޔާ، އައު ސަބްސިޑީ ނިޒާމުގެ ދަށުން ދެވޭނެއެވެ. އެހެން ކަމުން މަދު އާމްދަނީ ލިބޭ ގޭބީސީތަކަށް މި ނިޒާމުގެ ސަބަބުން ކުރާ ފައިދާ ބޮޑުވާނެކަން ސަރުކާރުން ފާހަގަކުރައްވައެވެ.