ބޯހިޔާވަހިކަމުގެ މަޝްރޫޢާއެކު އާބާދީއާ ތަރައްގީ އެއްފަސްކުރުމުގެ ނާރެހަކަށް އޭދަފުށި ވާނެ: ވަޒީރު މުއްޠަލިބު

އޭދަފުށީގައި ތަރައްގީކުރާ 1000 ހައުސިން ޔުނިޓް މަޝްރޫއާއެކުު އާބާދީއާ ތަރައްޤީ އެއްފަސްކުރުމުގެ ނާރެހަކަށް އޭދަފުށި ވާނެކަމަށް އިމާރާތް ކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވެއްޖެއެވެ.

ވަޒީރު މުއްޠަލިބު ވިދާޅުވީ މިމަޝްރޫއާއެކު އާބާދީއާއި ވަޒީފާގެ ފުރުސަތުތައް އިތުރުވެގެން ދިއުމުގެ އިތުރުން އޭދަފުއްޓާ ކައިރި ރިޒޯޓްތަކުގައި މަސައްކަތްކުރާ ދިވެހިންގެ އަދަދުވެސް އިތުރުވެގެންދާނެކަމަށެވެ.

ބ.އޭދަފުށީ 1000 ހައުސިން ޔުނިޓު ޢިމާރާތްކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ޢިމާރާތްކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވީ، އޭދަފުށީގައި ހައުސިންގެ ބޮޑު މަޝްރޫޢެއް ޢިއުލާންކުރައްވަން ސަރުކާރުން ނިންމެވީ އެރަށަކީ، އިތުރަށް ބިން ހިއްކެން ނެތް ރަށަކަށްވުމާއެކު ރަށުގެ ބިމުގެ ބޭނުން އެންމެ ހެޔޮގޮތުގައި ހިފުމަށްކަމަށެވެ. އެހެންކަމުން ވަރޓިކަލް ހައުސިން މޮޑެލްއަށް އެރަށުގައި ބޯހިޔާވަހިކަން ތަރައްޤީކުރުމުން އޭގެ ފައިދާ ދެމެހެއްޓެނިވިގޮތެއްގައި ރަށަށް ލިބިގެންދާނެކަމަށް ވަޒީރު ވިދާޅުވިއެވެ.

"މިރަށަކީ އާބާދީއާއި ތަރައްޤީ އެއްފަސްކުރެވޭނެ ނާރެހަކަށްވެސް ވެގެންދާނެ ބ.އަތޮޅުގައި. އެއާ އެއްކޮށް ވަށައިގެން ގިނަ ޢަދަދެއްގެ ރިސޯޓު ހުރުމާއެއްކޮށް ރައީސުލްޖުމްހޫރިއްޔާގެ ވަރަށް މުހިންމު ވަޢުދެއްގެ ތެރެއިން، ޓޫރިޒަމް ދާއިރާގައި މަސައްކަތްކުރައްވާ ފަރާތްތަކަށް އެމަސައްކަތްކުރައްވާ ސަރަޙައްދުން ޢާއިލާއާއެކު ދިރިއުޅެވޭނެގޮތަށް ބޯހިޔާވަހިކަމުގެ ފުރުސަތު ހޯދާދެއްވުމުގެ ވަޢުދުގެތެރެއިން، އޭދަފުއްޓަކީ މިކަން ކުރުމަށް އެންމެ ރަނގަޅު އެއް ރަށެއްކަމަށް އަޅުގަނޑުމެންނަށް ފާހަގަކުރެވޭ." އިމާރާތް ކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވިއެވެ.

އޭދަފުށީގައި ތަރައްޤީކުރާ 1000 ހައުސިން މަޝްރޫޢުގެ މަސައްކަތުގެ މިއެއްބަސްވުމުގައި ސޮއިކުރެވުމާއެކު މިމަޝްރޫއަށް ފައިނޭންސް ހޯދުމުގެ މަސައްކަތް ކޮންޓްރެކްޓަރ ފަށާނެ ކަމަށާއި، އެއާއެކު ސަރވޭއާއި އެހެން މަސައްކަތްތައްވެސް ކުރެވޭމެ ކަމަށް ވަޒީރު ވިދާޅުވިއެވެ. އަދި އުއްމީދަކީ 2025 ވަނަ އހަރު މިމަޝްރޫޢަށް ފައިސާ ހަމަޖެހި ޢަމަލީ މަސައްކަތް ފެށުން ކަމަށް ވިދާޅުވެ، މިދައުރުގެ ތެރޭގައި މިފްލެޓްތަކުގައި ދިރިއުޅެވޭނެކަމަށް ޔަޤީން ކުރައްވާކަމަށް ވަޒީރު މުއްޠަލިބު ވިދާޅުވިއެވެ.

މިމަޝްރޫއާއެކު އޭދަފުށިގެ އާބާދީ އިތުރުވެ، ސަރަޙައްދުގައި ހުރި ރިސޯޓުތަކުގައި މަސައްކަތް ކުރާ ދިވެހީންގެ އަދަދުވެސް އިތުރުވާނެކަމަށް ސަރުކާރުންވިދާޅުވެއެވެ. އޭދަފުށި ވަށައިގެން ގިނަ ރިސޯޓުތައް ހުރުމާއެކު، ޓޫރިޒަމް ދާއިރާގައި މަސައްކަތްކުރާ ފަރާތްތަކަށް، އެފަރާތްތައް މަސައްކަތްކުރާ ސަރަޙައްދުން ޢާއިލާއަށް ދިރިއުޅެވޭނެގޮތަށް ބޯހިޔާވަހިކަން ހަމަޖެހިގެންދާނެއެވެ.

އޭދަފުށްޓަކީ ތަޢުލީމީ ނިޒާމާއި ސިއްޙީ ޚިދުމަތްވެސް އެކަށީގެންވާ މިންވަރަށް ލިބޭ ރަށެއްކަމަށާއި، ކަނޑާއި ވައިގެ މަގުން މާލެއައުން ފަސޭހަ ރަށެއްކަމުން އަރބަން ސެންޓަރު ތަރައްޤީކޮށް އާބާދީއާއި ތަރައްޤީ އެއްފަސްކުރުމަށް މުހިންމު ރަށެއްގެ ގޮތުގައި އޭދަފުށިވެގެންދާކަމަށްވެސް އިމާރާތް ކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބު ވިދާޅުވިއެވެ.