މެންޗެސްޓާ ޔުނައިޓެޑުގެ އައު ކޯޗު ރުބެން އަމޮރިމްގެ ބެކްރޫމް ސްޓާފުންގެ ތެރޭގައި އޭނާ އާއެކު ސްޕޯޓިން ލިޒްބަންގައި މަސައްކަތްކޮށްފައިވާ ފަސް ކޯޗުން ހިމަނައިފިއެވެ.
އުމުރުން 39 އަހަރުގެ އަމޮރިމްގެ ކޯޗިންގ ސްޓާފުންގެ ގޮތުގައި ގުޅިފައިވަނީ، ކާލޯސް ފެނާންޑޭސް، ޖޯޖް ވިޓަލް، އަޑެލިއޯ ކެންޑީޑޯ، އެމަނުއެލް ފެރޯ އާއި ޕައުލޯ ބަރޭރާ އެވެ. އަދި، ޔުނައިޓެޑްގެ ކުރީގެ މެނޭޖަރު އެރިކް ޓެން ހާގްގެ ދަށުން ފަސްޓް ޓީމް ކޯޗުންގެ ގޮތުގައި މަސައްކަތްކުރި ޑަރެން ފްލެޗާ އާއި އަންދްރެއަސް ޖޯޖްސަން އަދި އެސިސްޓެންޓް ގޯލްކީޕަރ ކޯޗު، ކްރެއިގް މޯސަން ވެސް އެ ކްލަބުގެ ކޯޗިންގ ސްޓާފުންގެ ތެރޭގައި ދެމިތިބޭނެ އެވެ.
އަމޮރިމް އާއެކު ޕޯޗުގަލްގެ ކާސާ ޕިއާ އާއި ބްރާގާ އަދި ސްޕޯޓިންގައި މަސައްކަތްކޮށްފައިވާ ފެނާންޑޭސް އަކީ އެސިސްޓެންޓް ހެޑް ކޯޗެވެ. ގޯލްކީޕަރު ކޯޗެއްގެ ގޮތުގައި ވިޓަލް ގުޅޭއިރު، ކެންޑީޑޯ އާއި ފެރޯ މަސައްކަތްކުރާނީ ޔުނައިޓެޑްގެ ސީނިއާ ޓީމުގެ ކޯޗުންގެ ގޮތުގައެވެ. އަދި، ކުރީން އާސެނަލް އާއި ލިވަޕޫލްގައި މަސައްކަތްކޮށްފައިވާ ބަރޭރާ އަކީ ފިޒިކަލް ޕާފޯމަންސް ކޯޗެވެ.
ކެންޑީޑޯ އެ ޓީމާ ގުޅޭނީ ވިސާ ހަމަޖެހުމުންނެވެ. އަދި، އެނަލިސްޓް އެޑުއާޑޯ ރޮސަލީނޯ ވެސް ވިސާ ހަމަޖެހުމުން ފަހުން ގުޅޭނެ ކަމަށް ހަބަރުތައް ބުނެއެވެ.
ޔުނައިޓެޑްގެ ކޯޗުގެ މަގާމުން ޓެން ހާގް ދުރުކުރުމަށްފަހު ބަދަލުގައި އެންމެ ފުރަތަމަ ގެންނަން މަސައްކަތްކުރި ކޯޗަކީ އަމޮރިމް އަށް ވުމުގެ ފަހަތުގައި ހިމެނޭ އެންމެ މުހިއްމު އެއްސަބަބަކީ، އޭނާ އަކީ މިވަގުތު ޔޫރަޕްގައި ތިބި އެންމެ ޒުވާން ގާބިލް ކޯޗެއްގެ ގޮތުގައި ގިނަ ބަޔަކު ގަބޫލުކުރުމެވެ. ހަމައެއާއެކު، ޕޯޗުގީޒް ލީގުގައި ސްޕޯޓިންގ ލިޒްބަން އާއެކު ހޯދަމުންއައި ކާމިޔާބީތަކަކީ ވެސް ޔުނައިޓެޑަށް އެ ނިންމުން ނިންމަން ފަސޭހަވި ސަބަބުތަކުގެ ތެރެއިން އެއްސަބަބުވެސް މެއެވެ.
އަމޮރިމް ވަނީ ސްޕޯޓިންގައި ހޭދަކުރީ މުއްދަތުގައި ދެ ފަހަރު ލީގު ޗެމްޕިއަންކަން ހޯދައި، ޕޯޗުގީޒް ލީގު ކަޕް ވެސް ދެފަހަރު ކާމިޔާބުކުރިއެވެ. މީގެތެރޭގައި، 19 އަހަރުގެ މެދުކެނޑުމަކަށްފަހު އެ ޓީމަށް ލީގު ކާމިޔާބުކޮށްދިނުން ފާހަގަކޮށްލެވުނެވެ.
ސްޕޯޓިންގެ ކޯޗުގެ މަގާމު އަމޮރިމް ދޫކޮށްލިއިރު، މި ސީޒަންގައި ލީގުގައި ކުޅުނު 11 މެޗުގެ ތެރެއިން ހުރިހާ މެޗެއް ކާމިޔާބުކޮށް، 39 ގޯލު ޖަހައި، ބައިކޮޅަށް ފަސް ލަނޑު ވަތްއިރު އޮތީ ތާވަލްގެ އެންމެ ކުރީގައެވެ. އަދި ޔުއެފާ ޗެމްޕިއަންސް ލީގުގެ އައު ފޯމެޓްގައި މިހާތަނަށް ކުޅުނު މެޗުތަކަށްފަހު، ތިން މެޗުން މޮޅުވެ، އެއްމެޗުން އެއްވަރުވެފައިވާއިރު އެ ޓީމު އޮތީ ދެވަނަ މަގާމުގައެވެ.
ޔުނައިޓެޑާއެކު އަމޮރިމް ނިކުންނާނެ ފުރަތަމަ މެޗަކީ، މި މަހުގެ 24 ވާ އާދީއްތަ ދުވަހު ރަށުން ބޭރުގައި އިޕްސްވިޗް ޓައުންއާ ދެކޮޅަށް ކުޅޭ މެޗެވެ.