އިންޑިޔާގެ އުތުރު އުތާރް ޕްރަދޭޝްގައި ހަސްފަތާލެއްގައި ނުރައްކާތެރި އަލިފާނުގެ ހާދިސާއެއް ހިނގައި، 10 ތުއްތުކުރިން މަރުވެއްޖެއެެވެ. އަލިފާނުގެ ހާދިސާ ހިނގާފައި ވަނީ އެ ސްޓޭޓްގެ ވެރިރަށް ލަކްނަވުގެ ޖާސީ ޑިސްޓްރިކްޓުގެ ހުޅަނގުދެކުނުގައި ހުންނަ މަހާރާނީ ލަކްޝްމީބާއީ މެޑިކަލް ކޮލެޖުގެ ނިއޯނޭޓަލް އިންޓެންސިވް ކެއާ ޔުނިޓު (އެންއައިސީޔޫ)ގައެވެ.
އެ ސްޓޭޓްގެ ޗީފް މިނިސްޓަރުގެ ނައިބު ބްރަޖޭޝް ޕާތަކް ވިދާޅުވީ، މަހާރާނީ ލަކްޝްމީބާއީ މެޑިކަލް ކޮލެޖުގެ އެންއައިސީޔޫގައި އަލިފާން ރޯވި ވަގުތު އެ ތަނުގައި 49 ތުއްތުކުދިންނަށް ފަރުވާދެމުން ދިޔަ ކަމުގައެވެ. އަދި، އޭގެ ތެރެއިން 38 ތުއްތުކުދިން ސަލާމަތް ކުރެވިފައިވާ ކަމުގައެވެ. މި ހާދިސާގައި 10 ތުއްތުކުދިން މަރުވެފައި ވަނީ ފިހިގެންނާއި ފުއްޕާމެޔަށް ދުމުގެ އަސަރުކޮށް، ނޭވާ ނުލެވިގެންނެވެ.
"[އަލިފާނުގެ ހާދިސާގައި ފިހުނު އަދި ދުމުގެ އަސަރު ކުރި] 17 ތުއްތުކުދިންނަށް އެ ހަސްފަތާލުގެ އެހެން ވޯޑުތަކާއި އެހެން ހަސްފަތާލުތަކުގައި މިހާރު ވެސް ދަނީ ފަރުވާދެމުން،" ޕާތަކް ވިދާޅުވިއެވެ. މަރުވެފައިވާ ހަތް ކުއްޖެއްގެ ވަނަވަރު ދެނެގަނެފައިވާ ކަމުގައި ވެސް އޭނާ ވިދާޅުވިއެވެ. އަދި، ގެއްލިފައިވާ އިތުރު ކުއްޖެއްގެ ހަށިގަނޑު ހޯދުމުގެ މަސައްކަތް ކުރަމުންދާ ކަން އެ ސްޓޭޓްގެ އެހެން އޮފިޝަލަކު ހާމަކުރިއެވެ.
މަހާރާނީ ލަކްޝްމީބާއީ މެޑިކަލް ކޮލެޖުގެ އެންއައިސީޔޫގައި އަލިފާން ރޯވާން މެދުވެރިވި ސަބަބު ސާފެއް ނޫނެވެ. އެ ކަން ދެނެގަތުމަށް ފުރިހަމަ ތަޙުޤީޤެއް ހިންގުމަށް އުތާރް ޕްރަދޭޝްގެ ޗީފް މިނިސްޓަރ ޔޯގީ އާދިތުޔަނާތު ވަނީ އަމުރު ކުރައްވާފައެވެ. އެ ތަނުގައި ހިނގި އަލިފާނުގެ ހާދިސާއާ ގުޅިގެން އިންޑިޔާގެ ބޮޑުވަޒީރު ނަރެންދްރަ މޯދީ ވަނީ ހިތާމަ ފާޅު ކުރައްވައި، މަރުވި ތުއްތުކުދިންގެ ޢާއިލާތަކަށް ތަޢުޒިޔާ ދަންނަވާފައެވެ.