މިއީ ދެމޫސުން ބެދޭ ވިއްސާރަ، ކުރިއަށް އޮތް 3 ދުވަހުވެސް މޫސުން ގޯސް
-
މިިދޔަ 24 ގަޑިއިރު އެންމެ ގިނައިން ވާރޭ ވެހުނީ ސ.ހިތަދޫއަށް
ރާއްޖެއަށް މިހާރު ކުރަމުން މިދަނީ ދެ މޫސުން ބެދޭ ވިއްސާރަކަމަށާއި ކުރިއަށް އޮތް 3 ދުވަހުވެސް ރާއްޖެއަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ.
މޫސުމާ ބެހޭ ޤައުމީ އިދާރާއިން ނެރުނު ނޫސްބަޔާނެއްގައި ވިދާޅުވީ ރާއްޖެ ސަރަޙައްދުގައި ހުޅަނޑު މޫސުން ނިމި، އިރުވައި މޫސުން ފެށޭ ދުވަސްވަރާ ދިމާކޮށް އެ ސަރަޙައްދުގައި ލޯ ލެވެލް ސަރކިއުލޭޝަންއެއް އުފެދިފައިވާކަމަށެވެ. އެހެންކަމުން މިހާރު ކުރަމުންދާ މިދާ ވިއްސާރައިގައި ވޭތުވެދިޔަ 24 ގަޑިއިރު ރާއްޖޭގެ ބޮޑުބަޔަކަށް ވިއްސާރަކޮށް ބައެއް ރަށްތަކަށް ބޯކޮށް ވާރޭވެހިފައިވާކަމަށެވެ.
އެގޮތުން އެންމެ ގިނައިން ވާރޭ ވެހުނުކަމަށް ރެކޯޑުކުރެވިފައި ވަނީ އައްޑޫ ސިޓީ ހިތަދޫއަށްކަމަށާއި އެރަށަށް 110 މިލިމިީޓަރަށް ވާރޭ ވެހިފައިވަކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ. އަދި މިހާރު ކުރަމުންދާ ވިއްސާރަ ކުރިއަށް އޮތް 3 ދުވަހުވެސް ރާއްޖެއަށް ކުރާނެކަމަށް އެ އިދާރާއިން ވިދާޅުވެއެވެ. އެހެންކަމުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކުރައްވާފައެވެ.
ރާއްޖެއަށް މިހާރު ކުރަމުންދާ ވިއްސާރައިގައި މާލޭގެ އިތުރުން ބައެއް ރަށްރަށުގައިވެސް ފެންބޮޑުވެ ގެތަކަށް ވަނީ ފެންވަދެފައެވެ. އެހެންކަމުން ފެންބޮޑުވުމުގެ ސަބަބުން ލިބިދާނެ ގެއްލުމަށް ދުރާލާ ރައްކާތެރިވުން މުހިއްމެވެ.