ބޮޑެތި އަމިއްލަ ހޮސްޕިޓަލުތަކުން ހުށައަޅާ އަގުތައް ބޮޑު، އަގުތައް ކުޑަކުރުމަށް ދަނީ މަޝްވަރާކުރަމުން: އާސަންދަ
-
އާސަންދައިގެ ސީއީއޯ ވިދާޅުވީ ރާއްޖެއިން ބޭރަށް ފޮނުވުމަށްވުރެ ރާއްޖޭގެ ބައެއް ހޮސްޕިޓަލުތަކުގެ ޚަރަދު ބޮޑުކަމަށް
-
އަގުތައް ކުޑަކުރުމަށް ގިނަ މަޝްވަރާތަކެއް ކުރެވޭ
ބޮޑެތި އަމިއްލަ ހޮސްޕިޓަލުތަކުން ހުށައަޅާ އަގުތަކަކީ ފުދޭވަރަކަށް ބޮޑު އަގުތަކެއްކަމަށް އާސަންދަ ކުންފުނީގެ ސީއީއޯ އާމިނަތު ޒީނިޔާ ވިދާޅުވެއްޖެއެވެ.
ޒީނިޔާ ވިދާޅުވީ، އަގުތައް ކުޑަކުރުމަށް ހޮސްޕިޓަލްތަކާއެކު ގިނަ މަޝްވަރާތަކެއްވެސް ކުރައްވާކަމަށެވެ.
ރައްޔިތުންގެ މަޖިލީހުގެ އިޖުތިމާޢީ ކޮމިޓީގައި ވާހަކަދައްކަވަމުން އާސަންދަ ކުންފުނީގެ ސީއީއޯ އާމިނަތު ޒީނިޔާ ވިދާޅުވީ، އާސަންދައިގެ ޚިދުމަތް ރައްޔިތުންނަށް ފޯރުކޮށްދިނުމަށް ރާއްޖޭގައި ޚިދުމަތްދޭ ބޮޑެތި އަމިއްލަ ހޮސްޕިޓަލުތަކާއި ވާހަކަދައްކަވަފައިވާކަމަށެވެ.
އެގޮތުން އެހޮސްޕިޓަލުތަކުން ހުށައަޅަނީ ފުދޭވަރަކަށް ބޮޑު އަގުތަކެއްކަމަށް ޒީނިޔާ ވިދާޅުވިއެވެ. އަދި އެ ހޮސްޕިޓަލުތަކުން އަގުތައް ހަދާފައި ހުންނަނީ ބަލި މީހާ ހޮސްޕިޓަލަށް ވަންނަ ހިސާބުން ފެށިގެން ދެވޭ ކޮންމެ ޚިދުމަތަކަށް އަގު ހަދާފައިކަމަށެވެ. އެހެންކަމުން އަގުތައް ބޮޑުވާކަން ޒީނިޔާ ފާހަގަކުރެއްވިއެވެ.
"ރާއްޖެއިން ބޭރަށް ބަލި މީހުން ފޮނުވައިގެން ކުރާ ހޭދައަށްވުރެވެސް ޚަރަދު ބޮޑުއެބަވޭ މިހެން. އެއަގުތަކަށް ބަލާފަ އަޅުގަނޑުމެން ކޮމްޕެރިޒަންސްތަކެއް ހަދާފަ އަޅުގަނޑުމެން ނެގޯޝިއޭޓްކުރަން އެ އަގު ތިރިކުރުމަށްވެސް." ޒީނިޔާ ވިދާޅުވިއެވެ.
ޒީނިޔާ ވިދާޅުވީ، މީގެކުރިން އާސަންދައިން ކަވަރ ނުކުރާ ބައެއް ޚިދުމަތްތަކަށްވެސް މިހާރު އާސަންދަ ލިބޭނެކަމަށެވެ. އެގޮތުން އައިވީއެފްއާއި ތެލަސީމިއާގެ ޚިދުމަތްތައްވެސް މިހާރު އާސަންދައިން ކަވަރކުރާކަން ޒީނިޔާ ފާހަގަކުރެއްވިއެވެ. އަދި މިހާރު މަސައްކަތް ކުރަމުންދަނީ ހޮސްޕިޓަލުތަކުންދޭ ޚިދުމަތްތައް ޕެކޭޖްކުރުމުގެ މަސައްކަތް ކަމަށެވެ.
ރައްޔިތުންގެ މަޖިލީހުގެ އިޖްތިމާޢީ ކޮމިޓީއަށް ހުށަހެޅިފައިވާ މައްސަލައަކާ ގުޅިގެން ނޭޝަނަލް ސޯޝަލް ޕްރޮޓެކްޝަން އޭޖެންސީ އަދި އާސަންދަ ކޮމްޕެނީ ލިމިޓެޑްގެ ބޭފުޅުންނާ ބައްދަލުކުރުން pic.twitter.com/KxVzt8xvir
— People's Majlis (@mvpeoplesmajlis) November 19, 2024
އިޖުތިމާޢީ ކޮމިޓީގައި ވާހަކަދައްކަވަމުން، ނޭޝަނަލް ސޯޝަލް ޕްރޮޓެކްޝަން އޭޖެންސީގެ ސީއީއޯ ހީނާ ވަލީދު ވިދާޅުވީ، އާސަންދަ ނިޒާމަކީ ވޭތުވެދިޔަ ހުރިހާ ދައުރެއްގައިވެސް ސިޔާސީ ބޭނުމަށް ބޭނުންކުރަމުން ދިޔަ އެއްޗެއްކަމަށެވެ. އަދި ވޭތުވެދިޔަ ހުރިހާ ސަރުކާރަކަށްވެސް އާސަންދައިގެ ޚަރަދުތައް ބޮޑުވަމުންދިޔަ މަންޒަރު ތަފާސްހިސާބުތަކުން ފެންނަމުންދިޔަކަމަށެވެ. އެހެންނަމަވެސް އެއްވެސް ސަރުކާރަކުން އާސަންދަ އިސްލާޙުކުރުމަށް އެކަށީގެންވާ ފިޔަވަޅެއް އަޅުއްވާފައިނުވާކަމަށް ހީނާ ވިދާޅުވިއެވެ.
"ހަގީގަތަކީ ގިނަ ފަރާތްތަކަކުން ވިޔަފާރިގެ މަންފާއަށް އާސަންދަ ބޭނުންކުރަމުންދިޔަކަން. ދިވެހިރާއްޖޭގައި ބޭހުގެ އަގުތައް ހުރީ، ބޭރުގެ ޤައުމުތަކާ އަޅާބަލާއިރު 15 ގުނަ މަތީގައި. އަދަޔާ ޚިލާފު ބޮޑެތި އަގުތަކެއްގައި ބޭސް ވިއްކަމުންދަނީ." ހީނާ ވިދާޅުވިއެވެ.
ހީނާ ވިދާޅުވީ، މި ސަރުކާރު އައިއިރުވެސް އާސަންދައިގެ ވަރަށް ގިނަ ބިލްތަކެއް ނުދެއްކި ހުރިކަމަށެވެ. އެހެންކަމުން ސަރުކާރުން ފިނޭންސް މިނިސްޓްރީގެ ތެރެއިން މަސައްކަތްކުރަމުންދަނީ ވީއެންމެ އަވަހަކަށް އާސަންދައިގެ ދަށުން ނުދެއްކި ހުރި ބިލްތައް އަވަހަށް ދެއްކުމަށްކަމަށެވެ.
ރައްޔިތުންގެ މަޖިލީހުގެ އިޖުތިމާޢީ ކޮމިޓީގައިވަނީ އާސަންދައާއި ގުޅިގެން ރައްޔިތުންގެ ހުރި ކަންބޮޑުންތަކާ ގުޅޭގޮތުން އާސަންދައިގެ އިސްވެރިންނާ ސުވާލުކުރައްވާފައެވެ.