ސީ-ޓު-އެއަރގެ ޚިދުމަތާ ވޯލްޑް ކާގޯ އެއަރލައިން ގުޅިއްޖެ

ސީ-ޓު-އެއަރ ކާގޯގެ ޚިދުމަތަށް އައު އެއަރލައިނެއް އިތުރުވެއްޖެއެވެ. މިފަހަރު މި ޚިދުމަތް ދޭން ފަށާފައިވަނީ ވޯލްޑް ކާގޯ އެއަރލައިނުންނެވެ.

މި ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ. މިމަސައްކަތަކީ، ދުނިޔޭގެ ވަރަށް ގިނަ ގައުމުތަކުން ކުރަމުން އަންނަ، އަދި މިމަސައްކަތުން އެގައުމުތަކުގެ އިޤްތިޞާދަށް ބޮޑެތި މަންފާތަކެއް ލިބެމުން އަންނަ މަސައްކަތެކެވެ.

މެލޭޝިއާގެ އެއަރލައިނެއް ކަމުގައިވާ ވޯލްޑް ކާގޯ އެއަރލައިނުން ސީ-ޓު-އެއަރ ކާގޯގެ ޚިދުމަތާ އަލަށް ގުޅިފައިވާއިރު، މި ޚިދުމަތް ފެށުމުގެ ގޮތުން އެއެއާލައިނުން ވަނީ ބަންގްލަދޭޝުން ރާއްޖެއަށް ކަނޑު މަގުން ގެނައި އަންނައުނުގެ ބާވަތްތައް ޔޫރަޕްގެ އެކި ޤައުމުތަކަށް ގެންގޮސްފައެވެ.

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން މޯލްޑިވްސް ޕޯޓްސް ލިމިޓެޑް، އެމްޕީއެލް އާއި މޯލްޑިވްސް ކަސްޓަމްސް ސަރވިސް ގުޅިގެން ފޯރުކޮށްދޭ މި ޚިދުމަތް ތަޢާރަފްކުރީ މިއަހަރުގެ މާރޗުމަހުގެ ތެރޭގައެވެ. ސީ-ޓު-އެއަރ ކާގޯގެ ޚިދުމަތުގެ ފުރަތަމަ ޝިޕްމަންޓް ރާއްޖޭން ފޮނުވީ މިއަހަރުގެ މެއިމަހުގެ ތެރޭގައެވެ. މިހާތަނަށް 12 އެއަރލައިން ވަނީ ސީ-ޓު-އެއަރގެ ޚިދުމަތާއި ގުޅިފައެވެ.

މި ޚިދުމަތަކީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ރާއްޖޭގެ އިގުތިޞާދު ހަރުދަނާ ކުރެއްވުމަށް ވެރިކަމުގެ ފުރަތަމަ އަހަރު، ފެށްޓެވި މަސައްކަތްޕުޅުތަކުގެ ތެރޭ ހިމެނޭ ކަމެކެވެ. މި ޚިދުމަތް މިހާރު ބާރު ސްޕީޑްގައި ފުޅާވަމުން އަންނަކަމަށް އެމްޕީއެލްއިން ވަނީ ބުނެފައެވެ. އެގޮތުން މިހާތަނަށް މި މަސައްކަތުން ރާއްޖޭގެ އިޤްތިސާދަށް 3 މިލިޔަނަށްވުރެ ގިނަ ޑޮލަރު ވަދެފައިވާކަމަށް އެ ކުންފުނިން ވަނީ ހާމަކޮށްފައެވެ.