ފަލަސްޠީނުގެ ހައްގުގައި އެންމެ ސާބިތު މަސައްކަތެއްކުރައްވާ ވެރިޔަކީ ރައީސް ޑރ. މުޢިއްޒު: ރައީސް ވަޙީދު

އިސްރާޢީލުން ފަލަސްޠީނުގައި ހިންގަމުންދާ ލާއިންސާނީ ޣަތުލުއާންމު ހުއްޓުވުމަށް ގޮވާލައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވާ މަސައްކަތްޕުޅަކީ މިހާތަނަށް ރާއްޖޭގެ ވެރިއަކުކުރައްވާ އެންމެ ވަރުގަދަ އަދި ސާބިތު މަސައްކަތްޕުޅުކަމަށް ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ސަރުކާރަށް އެއް އަހަރުވުމާއި ގުޅިގެން، ސަރުކާރުގެ ސިޔާސަތުތަކާގުޅޭގޮތުން ދެއްވި ސްޓޭޓްމަންޓެއްގައެވެ.

ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު ވިދާޅުވީ، 2023ވަނަ އަހަރު ރިޔާސީ ދައުރު ބަދަލުވީއިރު ރާއްޖެއަށް ކުރިމަތިވެފައިވާ ގިނަ މައްސަލތަކެއް ހުރިކަމަށާއި، އޭގެތެރޭގައި ޚާރިޖީ، ދާޚިލީ އަދި އިޤްތިޞާދީ ގޮތުން ގޮންޖެހުންތަކެއް ހުރިކަމަށެވެ.

ދައުރު ބަދަލުވީއިރު ބައެއް ޤައުމުތަކާމެދު ދިވެހީންގެ ހިތްހަމަނުޖެހުންތަކެއް ހުރިކަމަށާއި، އޭރު އިންޑިއާއެކުއޮތް ޒަމަންވީ ގުޅުމާމެދުވެސް ސުވާލުތަކެއް އުފެދިފައި ހުރިކަމަށް ރައީސް ވަޙީދު ވިދާޅުވިއެވެ. އިންޑިއާގެ އިތުރުން ޗައިނާއާ މެދުވެސް އޮތް ގުޅުމަށް ނުރަނގަޅު އަސަރުތަކެއް އޭރު އޮތްކަން ފާހަގަކުރައްވާ ރައީސް ވަޙީދު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައީސްކަމަށް ވަޑައިގެން މާގިނަ ދުވަހެއްނުވެ އެގުޅުންތައް ބަދަހިކުރަން ގިނަ މަސައްކަތްތަކެއް ކުރެވިކަމަށެވެ. މިއާއެކު ދެޤައުމާމެދު އޮތް ގުޅުން ބަދަހިވެގެން ދިޔަކަމަށާއި، އޭގެސަބަބުން ބައިނަލްއަޤްވާމީގޮތުން ގިނަގުނަ ފައިދާތަކެއް ކުރަމުންދާކަމަށް ރައީސް ވަޙީދު ވިދާޅުވިއެވެ.

ސަރުކާރުން ކުރެއްވި މަސައްކަތްތަކުގެތެރެއިން އެންމެ އުފާކުރާކަމަކީ ފަލަސްތީނުގައި ހިނގަމުންދާ ގަތުލް ޢާންމު ހުއްޓުވުމަށް ކުރަމުންދާ މިންނެތް މަސައްކަމަށާއި، އެގޮތުން އޯއައިސީ ބައްދަލުވުމުގައި ރައީސް ޑރ. މުޢިއްޒު ދެއްވި ތަގުރީރަކީ ފަހަކަށް އައިސް ޤައުމެއްގެ ވެރިޔަކު ދެއްވި އެންމެ ވަރުގަދަ އަދި ސާބިތު ތަގުރީރުކަމަށްވެސް ރައީސް ވަޙީދު ވިދާޅުވިއެވެ.

"އިސްރާޢީލާ ދެކޮޅަށް ސައުތު އެފްރިކާގެ ފަރާތުން އިންޓަރނޭޝަނަލް ކޯޓު އޮފް ޖަސްޓިސްއަށް ހުށައަޅާފައިވާ މައްސަލައަސް ތާއިދުކުރައްވާ ރާއްޖޭގެ ފަރާތުން ވަރަށް ވަރުގަދަ ވަކީލުންގެ ޓީމެއް ފޮނުއްވިކަން އަޅުގަނޑު އުފަލާއެކު ފާހަގަކުރަން. ހުޅަނގުގެ އެހީއާއެކު އިސްރާޢީލުން ފަލަސްޠީނުގައި ހިންގާ ނާތަހުޒީބު އަނިޔާވެރި އަދި ލަދެއްނެތް އަމަލުތަކަކީ މި ވޭތުވެދިޔަ 100 އަހަރުގެތެރޭގައިވެސް ހިންގާފައިވާ އެންމެ ބޮޑު ޖަރީމާ. ދިވެހި ރައްޔިތުންގެ ހިތްތަކުގައި އުފެދެމުންދާ އުދާސްތަކާއި، ވޭނާއި ހިތްދަތިކަމުގެ އަސަރު ރައީސް ޑރ. މުޢިއްޒު އިހްސާސްކުރައްވައި އެމަނިކުފާނު ދައްކަވާ ކޮންމެ ވާހަކަފުޅެއްގައިވެސް ސާބިތުކަމައެކު ފާޅުކުރައްވަމުން ގެންދަވާކަމަށްޓަކައި އަޅުގަނޑު އެމަނިކުފާނަށް ޝުކުރު ދަންނަވަން.: ކުރީގެ ރައީސް ޑރ. މުޙައްމަދު ވަޙިދު ޙަސަން މަނިކު ވިދާޅުވިއެވެ.

ރާއްޖޭގެ އަދުގެ ޙާލަތަށް އަލިއަޅުއްވާލައްވާ ރައީސް ވަޙީދު ވިދާޅުވީ، ރައީސް ޑރ. މުޢިއްޒު ވެރިކަމަށް ވަޑައިގެންނެވިއިރު ރާއްޖެއޮތީ އިޤްތިޞާދީގޮތުން ވަރަށް ދަތި ފައްތަރެއްގައިކަމަށާއި، ނަމަވެސް ރައްޔިތުންނަށް އުފުލަންޖެހޭ ބުރަ ލުއިކުރުމަށް ސަރުކާރުން ދަނީ ގިނަގުނަ މަސައްކަތްތަކެއް ކުރައްވަމުންކަމަށްވެސް ރައީސް ވަޙީދު ވިދާޅުވިއެވެ. އެގޮތުން ދައުލަތުގެ ޚަރަދުތައް ކުޑަކުރުމަށާއި، އާމްދަނީ އިތުރުކުރުމަށާއި އައު މަޝްރޫޢުތައް ފެށުމަށްވެސް ސަރުކާރުން ގިނަގުނަ މަސައްކަތްތަކެއް ކުރަމުންދާކަން ރައީސް ވަޙީދު ފާހަގަކުރެއްވިއެވެ. އިޤްތިޞާދީ ގޮތުން ސަރުކާރުން އަޅަމުންދާ ފިޔަވަޅުތަކަކީ ފަސޭހަ ފިޔަވަޅުތަކެއް ނޫންކަމަށާއި، ނަމަވެސް ސަރުކާރަށް އެއްބާރުލުންދީގެން މަސައްކަތްކުރުމަކީ ހުރިހައި އެންމެންގެ ޒިންމާއެއްކަމަށްވެސް ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކު ވިދާޅުވިއެވެ.