އަންނަ އަހަރުގެ ޖެނުއަރީ މަހުގެ 24 ވަނަ ދުވަހު ރާއްޖޭގެ ފުޓްބޯޅަ ސީޒަން ފެށުމަށް ޑްރާފްޓް ކަލަންޑަރެއް އެކުލަވާލައި، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކުލަބުތަކުގެ ޚިޔާލު ހޯދުމަށް ފޮނުވައިފިއެވެ.
މިދިޔަ އަހަރުގެ ޑިސެމްބަރު މަހުގެ 19 ވަނަ ދުވަހު ނިމުނު ދިވެހި ޕްރިމިއާ ލީގުގެ ފަހުން، ރާއްޖޭގައި ފުރަތަމަ ޑިވިޝަނުގެ ކުޅުން ކުރިއަށް ގެންގޮސްފައެއް ނުވެއެވެ. އެހެންކަމުން ރާއްޖޭގައި ފުރަތަމަ ޑިވިޝަނުގެ ފުޓްބޯޅަ ނުކުޅޭތާ 11 މަސް ދުވަސް ވަނީ ވެފައެވެ.
މީގެ ކުރިން އެފްއޭއެމް އިން މިދިޔަ މެއި މަހުގެ 10 ވަނަ ދުވަހު ފުޓްބޯޅަ ސީޒަން ފަށާގޮތަށް ޑްރާފްޓް ކަލަންޑަރެއް އެކުލަވާލި ނަމަވެސް، އެ ފަހަރު ކުލަބުތަކުން އެދުނީ، ސީޒަން ފެށުން ޖޫން މަހަށް ފަސްކުރާށެވެ. އެކަމަކު ބޮއްސުންލާފައިވާ އެފްއޭއެމްގެ ހިންގުން ޖުލައި މަހުގެ ތެރޭގައި ނޯމަލައިޒިން ކޮމިޓީއަކާ ހަވާލުކުރަން ދުނިޔޭގެ މައި ފުޓްބޯޅަ އިދާރާ (ފީފާ) އިން ނިންމުމާއެކު، ފުރަތަމަ ޑިވިޝަނުގެ ފުޓްބޯޅަ ފެށުން އަނެއްކާވެސް ވަނީ ފަސްވެފައެވެ.
ކުރީގެ ޔޫތު އެންޑް ސްޕޯޓްސް މިނިސްޓަރު އަޙްމަދު ޒުހޫރުގެ ޗެއާމަންކަމުގެ ދަށުން ހިންގަމުން އަންނަ ނޯމަލައިޒޭޝަން ކޮމިޓީން އެފްއޭއެމްގެ ކަންކަން ހަމަމަގަށް އެޅުމަށް ގިނަ މަަސައްކަތްތަކެއް ކުރަމުން އަންނައިރު، އެ އިދާރާއިން ކުލަބުތަކަށް ފޮނުވި ޑްރާފްޓް ކަލަންޑަރުގައި ވަނީ ޖެނުއަރީ މަހުގެ 24 ވަނަ ދުވަހަށް ސީޒަން ހުޅުވުމަށް ކުޅޭ ޗެރިޓީ ޝީލްޑް މެޗު ތާވަލުކޮށްފައެވެ.
އަދި ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕް ޖެނުއަރީ މަހުގެ 29 ވަނަ ދުވަހަށް ތާވަލުކޮށްފައިވާއިރު، ދިވެހި ޕްރިމިއާ ލީގު ފަށަން ތާވަލުކޮށްފައިވަނީ ފެބްރުއަރީ މަހުގެ 25 ވަނަ ދުވަހެވެ. ކުރިއަށް އޮތް ސީޒަނުގެ އެފްއޭ ކަޕް ޖޫން މަހުގެ 20 ވަނަ ދުވަހަށް ތާވަލުކޮށްފައިވާއިރު، އެ މަހުގެ 12 ވަނަ ދުވަހު 19 އަހަރުން ދަށުގެ ޔޫތު ޗެމްޕިއަންޝިޕް ފެށުމަށްވެސް ވަނީ ތާވަލުކޮށްފައެވެ. އަދި ދެވަނަ ޑިވިޝަނުގެ ކުޅުން ޖުލައި މަހުގެ 26 ވަނަ ދުވަހަށް ތާވަލުކޮށްފައިވާއިރު، ތިންވަނަ ޑިވިޝަން ފެށުމަށް ހަމަޖައްސާފައިވަނީ ސެޕްޓެމްބަރު މަހުގެ 10 ވަނަ ދުވަހެވެ.
މީގެ އިތުރުން މި ކަލަންޑަރުގައި ވަނީ ގައުމީ ޓީމުގެ ގިނަ މެޗުތަކެއްވެސް ހިމަނާފައެވެ. އެގޮތުން އަންނަ އަހަރުގެ މާޗު މަހުން ފެށިގެން ގައުމީ ފުޓްބޯޅަ ޓީމުން އޭޝިއަން ކަޕް ކޮލިފައިން މެޗުތައް ކުޅޭއިރު، ސާފް ޗެމްޕިއަންޝިޕް ޖޫން/ޖުލައި މަހަށް ވަނީ ތާވަލުކޮށްފައެވެ. ނަމަވެސް ރަސްމީކޮށް ސާފް ޗެމްޕިއަންޝިޕް ބާއްވާނެ ގައުމަކާއި ދުވަހެއް އަދި މިހާތަނަށް ފައިނަލް ކޮށްފައެއް ނުވެއެވެ. މީގެ އިތުރުން ސެޕްޓެމްބަރު މަހު އިންވިޓޭޝަނަލް މުބާރާތެއް ކުޅުމަށްވެސް މި ކަލަންޑަރުގައި ވަނީ ހިމަނާފައެވެ.
މި ކަލަންޑަރުގައި ގައުމީ ޓީމުގެ ގިނަ މެޗުތަކެއް ހިމެނިއިރު، މި ފަހުން ގައުމީ ޓީމުން ވަނީ ބައިނަލްއަގުވާމީ އެކުވެރިކަމުގެ ދެ މެޗު ކުޅެފައެވެ. އެގޮތުން މި އިންޓަނޭޝަނަލް ބްރޭކުގައި ރާއްޖެއިން ބަންގްލަދޭޝްއާ ދެކޮޅަށް ދެ މެޗު ކުޅުނުއިރު، ފުރަތަމަ މެޗުން ރާއްޖެ ވަނީ 1-0 ގެ ނަތީޖާއަކުން އެ ގައުމު ބަލިކޮށްފައެވެ. ނަމަވެސް ދެވަނަ މެޗުގައި ބަންގްލަދޭޝްއިން ވަނީ 2-1 ގެ ނަތީޖާއަކުން ރާއްޖެ ބަލިކޮށްފައެވެ.